...Ушосо ульнесь тундо. Мордовиясь анокстась масторлангонь покш чис. 2011 иестэ Саранскойсэ арсезель ютавтомс «Россия – спортивная держава» покш форумонть. Самай се шкане минек оштнесэ ды районтнэсэ седе пек виевгавтовсь важодемась спортонь ламо объекттнэнь тееманть, эрямо кудотнень ламолгавтоманть ды прявт ошонть мазылгавтоманзо коряс.
Неень шкане яксетяно спортонь неть дворецтнэс шумбрачинек витеме, ламотнень эйкакшост, нуцькаст совасть эрямо од ды вадря кудос. Весе тень вельде мазылгадсь ошонок чачозо. Ансяк минь а свал ледстнетяно ды кирдтяно превсэ сеть ломантнень лемест, кить стявтызь неть кудотнень, кодамо стака важодема сынь топавтсть. Вере мон а стяко ледстия «Россия – спортивная держава» форумонть. Самай сестэ монень прась уцяска вейке чис полавтомс сёрмадыцянь тевенть строителень лездыцянть лангс. Оймсема чиденть икеле телефонга гайневтсь тень содавикс ялгам, превс путыцям, стака шкасто лездыцям, паро чистэ кисэнь мельспаросо аштицям Валентина Никитична Самарова.
Стяко валонь апак корта кевкстимим, мезе карман тееме оймсема чистэ, ды сонсь сеске тень ёвтась тев: «Сак лездамо тенек важодема таркав, бути улить кемевикс ялгат, саить мартот. Спортонь объектэсь тенек шкастонзо максома, ломаненек а сатыть». Ёвтан апак кенгеле, покш сюкпря В.Н.Самарованень аволь ансяк эсень, ялгам-тонавтыцянть пельдеяк, кие марто студентэкс улемстэ ульнинек вейсэ стройотрядсо. Виде, сестэ савсь тенек кудоткак вачкамс, ансяк шкась ламо ютась, ламось стувтовсь. Объектэнтень самсто, конась ульнесь Юго-Западонь эрямонь райононь вирь кужосо, рединек, сон уш аноколь. Соксонь-биатлононь центрасонть топавтовсь сонзэ ванськавтомась-мазылгавтомась. Видькстан, чись а шождаль, сизинек прамозонок, ансяк пря эзинек невте.
Сень лангс ванозь, кода важодсь (аволь невтнесь сурсо) Валентина Никитична, куш сон бригадань прявт, визькс ульнесь оймень таргамс эли кортнеме озамс. Стройкасонть важодемась лаказь лакась. Веенст вальмат ванськавтыть, омбонст киякст мазылгавтыть, колмонстнэ шукшпрят ливтить ды истя седе тов. Вейке тевест эль прядови, сынь ютыть уш омбоцентень. Секс пек кенярдынек, зярдо тердимизь обедамо, виде, аволь ярсамонтень, оймень таргамонтень. Весе тень неезь ды аламос те тевсэнть важодезь, допрок полавтовсь вановтонок строителень профессиянть коряс. Сынь аволь ансяк вачкить-артыть, эштё пек ламо лия тевтькак топавтыть. Те чись ульнесь лезэв аволь ансяк Самаровань бригадантень, седе пек миненек, тонавтыцянтень ды журналистэнтень, штобу аволинек пеняця стакачитнень лангс важодема таркасо ды ёвтневлинек теде ломантненень СМИ-нть вельде ды эйкакштненень, кить ансяк чалгить эрямонь покш килангонтень.
Тешкстасынек, од ломантнень марто важодемантень, строителень а шожда тевенть топавтомантень В. Н. Самарова, ловт, алтызе весе пингензэ. 61 ие важодсь стройкасо, эйстэст ниленьгементнень перть а лововияк зяро эрямо кудот, школат, эйдень кужот, больницят ды ламо лия объектт тейсь ялгатнень марто. Невтемакс, монень савсь улемс истят объекттнэнь панжомсто, кода Рузаевкань ды Зубова-Полянань ёнкссо од школатнень, Химмашонь районсо 14 этажсо кудонть, Юго-Западсо эйдень кужонть ды ламо лия од зданиятнень. Валентина Никитичнань покш путовксозо Мордовиянь храмтнень вельмевтемасо. Сонзэ бригадась стявтызе Митрополиянь покш ды мазый зданиянть. Зяро вийть путсть ялганзо марто нурька шкас Кириллэнь ды Мефодиень лемсэ храмонть строямсто. Сонзэ тёкшс варштамсто (сэрезэ 30 метрат), маряви, менельс токи, а сыненст тосо савсь важодемс…
Тешкстасынек, строителень тевсэнть Самаровтнень кудораськенть важодемань вейсэнь стажост – 130 иеть!
В. Н. Самаровань бригадась ламо тейсь Футболонь коряс масторлангонь чемпионатонтень анокстамосонть, сынст гостиницань комплексэсь теезель «ветес». Республикань прявттнэ свал ёвтасть тензэ ды сонзэ прявтсо бригадантень ансяк сюкпрянь валт. Эсь шкасто Валентина Никитична пурнась од ломанень бригада, конатнень кармась тонавтомо штукатуронь-маляронь а шожда тевентень. Нейгак сонензэ пшкалить лезкс мельга сеть ломантнень эйкакшост, нуцькаст, кинь зярдо-бути сон тонавтсь. Кода уш вере ледстинек, В. Н. Самаровань эрямосо аволь весемесь валанясто ютась. Сонзэ эйкакш пингесь прась Ине Отечественной войнадо мейлень стака шкантень. Чачома тарказо – Отяжеле ёнксонь Киржеман велесь. Тетязо-авазо – Никита Степанович ды Анна Захаровна Ютяевтне – овсе аламо вейсэ эрясть, ансяк колмо иеть. Ушодовсь войнась. Кудазорось Валя тейтерензэ чачомадо кармась содамо сёрмасто, вастовомс жо тенст эзь саво, сон маштовсь… Георгий лелянзо марто эрьва тевсэ ульнесть васень лездыцякс аваст туртов. Самай се шкане, эштё од тейтерькс кемекставсь сонзэ обуцясь. Кассь-кепететсь стакачиде а пелицякс, аволь сельмес эцицякс, седе ламо теицякс ды ансяк эзь прянть лангс кемицякс. Те сонензэ пек лездась эрямосо, тенень тонавтынзе колмонест эйкакшонзо. Истя уш лиссь сонзэ эрямосо, мирдензэ Анатолий Васильевич марто эрясть ансяк 13 иеть, сон кулось апак учо. Валентина Никитична кадовсь довакс колмо эйкакш марто. Покшонтень – Сергейнень – ульнесть 12, тейтеренстэнь Светлананень – 8, Василийнень – ансяк колмо ковт.
Виде, а шожда ульнесь, ансяк весементь цидярдызе те кеме обуця, стакачиде а пелиця, видечинть кисэ свал аштиця эрзянь авась. Чинь-чоп важодсь стройкасо, веть – ванстыцякс, валске рана – дворникекс. Кодат стака шкат эзь саво печтямс, сон эйкакштнень тонавтневтинзе ды тейсь весементь, штобу кинь лангскак зярдояк сельмест а сявадовольть. Свал кармавтсь эрямосо эсест вийсэ целковоенть добовамо, эрьва косо васняяк ломанекс кадовомо. Валентина Никитична эрямонзо перть вети общественной тев. Одсто ламо вийть макссь комсомолонтень, конась те иень сёксня тешкстынзе 105 иетнень топодеманть. Сонзэ прявтсо бригадась лиссь изницякс Т. Бибинань лемсэ пелькстамосонть. Мельспаронть тешкстамсто В.Н.Самарова мерсь ялгатненень, паряк, казненть – телевизоронть – макссынек Краснослободскоень эйдень кудов. Истя тейстькак. Ламось пингензэ перть а стувтови. Невтемакс, 1979 иесь кадовсь тензэ ледстневицякс: кочкакшнызь СССР-нь Верховной Советэнь депутатокс, седе икеле ульнесь Профсоюзонь XV инекужонь делегатокс, МР-нь Общественной палатань членэкс, кавксть пурнакшнызь МАССР-нь депутатокс. Ламо ломаннень сестэ лездакшнось ды течияк сеедьстэ тензэ эрсить пшкадицят лезэв превс путомань коряс. Те эрзянь аванть покш мельспарозо вете нуцьканзо: колмо тейтерькат ды кавто цёрынеть. Кавто нуцькатне – Елена ды Александр – поладыть сырькаест тевенть – строителень. Вете иеде икеле Валентина Никитичнанень максозель эштё вейке покш казне – «Гордость народа – гордость нации!» знакось.
Валентина Никитична Самарова – МАССР-нь заслуженной строитель, Трудовой Якстере Знамянь орденэнь кавксть кавалер, Раськетнень ояксчинь орденэнь кавалер, Славань колмонест степентнень ордентнэнь кавалер, Российской Федерациянь од ломантнень заслуженной наставник, Саранск ошонь ды Мордовия Республикань Почётной гражданин.
Те эрзянь авась эштё од порасто каменщикень профессиянтень тонавтнемадо мейле кундась строителень а шожда тевентень. Валентина Никитичнань прявт ало бригадась косо ансяк эзь важоде. Сынст вийсэ стявтозь кудотне ды социальной объекттнэ те шкас кеместэ аштить кода Саранскойсэ, истя жо республикань келес. Валентина Самарова вейсэ важодицянзо марто кепедсть «Светотехника» Мордовиянь сехте покш икелень предприятиянть, «Электровыпрямитель», медпрепаратонь, Приборостроительной ды ламо лия заводтнэнь. Сонзэ прявт ало бригадась мазылгавтсь ошонь неень шкань истят объекттнэнь, кода Кириллэнь ды Мефодиень лемсэ храмонть, «Мордовия-Арена» спортонь сооружениянть ды ламо лият.
Течи, декабрянь 27-це чистэ, В. Н. Самарова тешксты юбилеензэ. Сонзэ лемс ёвтавить поздоровт ды паронь арсемат.
Валентина Никитична! Арсетяно тенк кеме шумбрачи ламо иес, арсеманк топавтома, малавиксэнк ды ялганк пельде мелень явома! Кадык Пазось максы тенк ламо вийть ды эрямс кувака пинге.
Валентина Юдина