Тедедень июлень 1-це чистэ Покш Игнатбуень Ташто Чамзасо панжовсь колмоце а покшке лавка. Сонзэ панжицязо – колмо эйдень авась Альбина Алексеевна Дорофеева. Свал тевсэ лакиця, кодамояк важодемадо а пелиця эрзянь авась пек вечксы тиринь велензэ. Монень, келя, ошсо эрямось мельс а тукшны, вечкан мода лангсо ды велень кудонь тевтнесэ котьмамо…
Ды те а стяконь валт. Альбина Алексеевна мирдензэ марто кирдить фермерэнь хозяйства – трить кемень букат. Саиксэльть эштё потявтовиця скалт, ансяк састь мельс панжомс лавка. Кастыть колмо цёрынькат. Сехте покшонтень – 13 иеть. Сон нейке уш лезды тетянстэнь-аванстэнь кудоютконь тевтнесэ. Велесэ истямо шкасто эйкакшось уш покшокс маряви – сянгось, коймесь кедьсэ кирдевить, ведь марто ведраськак кандови – те уш виде-паро лездыця.
Альбина Алексеевна чачсь Покш Игнатбуень Отяжелесэ. Лиссь мирденень Ташто Чамзав. Сонзэ экономической образованиязо. Лавкань панжомадо икеле важодсь «8 Марта» ООО-нь бухгалтериясо. Мирдезэ зярс кадовсь важодеме тоско. Лавкань панжомадо мелесь аванть прясо велясь умок. Эштё студентэкс улемстэ (сестэ ульнесь апак венчаяк) сон аламос важодсь микшнемань тевсэ. Те мелезэнзэ тукшнось. Ды ансяк сестэ, зярдо кармась покш семиязо, топавтовсь бажамозо.
Мирдезэ Михаил Иванович прядсь юридической факультет. Сон эрьва ладсо топавты важов нинзэ мельтнень: эсензэ машинасо Саранскойстэ ускси лавкас товар. «8 Марта» ООО-со важодемадо башка, сонзэ лавтовтнень лангсо кудонь фермась. Дивазеват, кона шкане тень весе кенеремс? Паряк, лездыть нинзэ валтнэ: «Зярс одтано, а эряви аштемс ве таркасо. Озадо аштеме карматано пенсиясо. Ней эряви важодемс, штобу мейле а пиштевтемс сыречисэ…»
Нама, васняяк ульнесь а покш пелема, цидярдыть-арась те тевсэнть. Чарькодеви, зярс а варчасак, содамо а кармат. Кевксттядо, мезде пелемс? Велесэ лавкань кирдемась – аволь шожда тев. Товаронть микшнемадо башка, эряви маштомс ладямо ломантнень марто. Тесэ весе содатадызь, теветь-валот кидеяк а кекшевить. Ды тесэяк Дорофеевтнень семияст а сави сялдомс: велень ломантне, а те седе ламотне – пенсионерт, кортыть лангаст ансяк паро валсо, мелень ванозь, шумбрачинь арсезь. Минек пингстэ совась лавкас пенсиясо авась Зинаида Сураева, кона лавкань азортнэде ёвтась истят валт:
«Сат, кевкстят, мезе теть эряви, свал кунсолотадызь, паро мельсэ ёвтнесызь, кодамо товарост ули, лиясто кевкстить, мезе ускомс. Сюкпря, зярдояк каршо а молить, меленек топавтыть, шумбрачи тенст седе ламо!» Велень лия эрицясь, рузавась Екатерина Анникова, мерсь истя: «К ним можно обратиться с любой просьбой. Всегда идут навстречу, молодцы!» Мекс истя ламо лембе валт марить лавкань азортнэ велень эрицятнень пельде? Тувталось вана мейсэ. Сеедьстэ велень ломантне максыть кармавтомат, ускомс те эли тона товаронть. Азортнэ кунсолосызь ды лиясто Михаил Иванович кармавтозенть усксы натой кудо вальмалов. Нама, истямо «сервисэсь» пек вечкеви ломантненень. Альбина Алексеевна истя ёвтни важодемань чидензэ:
– Лисян валске марто, сырькайтне учить эйсэнь лавка икеле. Весень пакетэст пурнасынь, сайсынь ярмакост ды ушодан явшеме конёв лангсо сёрмадозест коряс… Зярс явшан, обедэм прядови (мизолды). Важодян лавкасо ськамон, оймсема чивтеме. 9 чассто саезь 19 часос. Товаронть весе усксетяно минсь. Ансяк кшинть пачтить Ицялсто колмоксть – пондельникстэ, середасто ды пецясто.
– Альбина Алексеевна, кода кенертядо важодемеяк, эсенк фермасояк, кудонь тевтнень теемеяк, колмо эйкакшонь кастомояк?
– Букатнес мон а педсян, цёратне тосо азорт. Монь лангсо кудоютконь тевтне, пидемась-панемась, шлямось-муськемась. Эйкакштне уш покшкеть, сехте вишкиненть сайнеса мартон лавкав, тосо налкси…
Зяро лембе ды потмовий моли те колоньгемень кото иесэ авастонть! Корты стамбарнэ, апак покшкавтне, прянь апак шна. А эдь улевель мезень кисэ! Аволь эрьвась цидярды истя важодемс. Теде башка, Дорофеевтне чевте седей ломанть, конат васенце таркас путыть лиятнеде мелявтоманть. Велень ломантнень ладсо, миньгак арсетяно тенст шумбрачи ды икелев молема ки!
Марина Агафонова