Ушосонть сёксь, пертьпельксэсь кенярдовты эйсэнек эрьва кодамо мазый тюссонзо. Те шкантень ладиця ды мелень витиця оршамопель лангозост каясть Покш Березникень Кудонть-интернатонть перька касыця чувтотнеяк. Чистэ чис ды иестэ иес тесэнь эрицятне, сынст лангс ванозь, онкстыть эрямост, ледстнить од шкаст. Кизэнь кувака читнестэ икелест стить кувака пингень эрьва кодат свалшкань мелявксост, свал ков-бути капшамост ды ламо тееме бажамост. А вана ней сёксень якстере-тюжине лопинетне пачтить тенст сыречидест…

Самай те шкастонть, октябрясто, масторонь келес тешкстави Сыре ломантненень алтазь ковось. Ней сынст ули шкаст лоткамс, велявтомс сеть умонь шкатнес, зярдо весе малавиксэст ды содавиксэст туртов сынь ульнесть пек эрявиксэкс…

Куш кодамо паро Кудосо-интернатсо сыре ломанесь бу аволь эря, сехте питнеекс сонзэ туртов свал кармить тосонь важодицятнень ёндо лембе варштавксось, седеень эждиця валось, мельганзо седейшкавань якамось. Сыре ломанень социальной те учреждениясонть, конань прявтсо ламо иеть эрзянь цёрась Александр Петрович Акайкин, важодить тевест содыця ды седеймариця ломанть. Истятнэнь юткс сови те учреждениянь медсестрась Галина Кечайкина. Тешкстасынек, куш Галина Александровна аволь истя пек умок сась тей важодеме, сонзэ покш опытэзэ, медицинантень те эрзянь авась алтась ниленьгеменде ламо иеть. Течи сон минек редакциянь инже.

Кассь ламо эйкакшонь семиясо

Галина Кечайкина (тейтерькс – Киржаева) чачсь-кассь Покш Березникень райононь Шугурова велесэ. Тетязо-авазо, Александр Петрович ды Ольга Ивановна, трясть-кастсть вете эйкакшт: ниле тейтерть ды вейке цёра. Галина юткстост колмоце, сонензэ савсь аволь ансяк тетянзо-аванзо кунсоломс, эштё покш патятненьгак: Любань ды Машань. Ды эштё вишкинетнень, Людмилань ды Петянь, мельга ваномс. Эдь Александр Петрович ды Ольга Ивановна чинь перть важодема таркасольть, виень апак вансто роботасть Калинин лемсэ икельцетнень ютксо молиця колхозсонть. Сень лангс апак вано, кодамо ансяк стака тевть эзть саво тенст топавтомс, сынст свал ульнесь шкаст ветенест эйкакштнень марто кортнемантень, сатышка мелень явомантень. Икеле кудынест вишкинель, кода семияст кармась покшолгадомо, те ульнесь эштё советской шкатнестэ, ярмаконь асатноманть лангс апак вано, сынь кармасть кудонь путомо. Виде, се шкань Шугуровань эрицятнестэ аламот, кить кундакшность истямо покш ды стака тевс.

Киржаевтне жо цидярдызь весементь. Галина Александровнань эйкакш пингень ледстнематнестэ те шкас эзь стувтово, кода рана валскень зорят стякшность малавиксэнзэ ды чоподас эзть маштневе тевест, кардазпотмост свал пешксель ракшадо… Эйкакштнень лангсояк свал ульнесть ламо тевть. Сыненст эрявсь аволь ансяк ваньксстэ кирдемс кудопотмонть, эштё пиресэ пандятнень кочкамс ды истя седе тов. Самай истя Александр Петрович ды Ольга Ивановна эйкакштнень анокстасть эрямос, васняяк, а пелемс стакачиде, эрьва ушодозь тевенть топавтомс педе-пев. Сехте эрявиксэкс путсть ломаннень лезксэнь максоманть ды паро тевень тееманть. Нать, а стяко Галина Александровна эрямонь тевекс кочкизе медицинанть. Виде, тенень эштё лездась мирдезэ – Николай Васильевич.

Весементь цидярдызь вейсэ

– Мирденень лисинь 19 иесэ, школань прядомадо мейле малав сеске, – ледстни Галина Александровна. – Теде икеле Николай марто минь цела ие вастневинек. Те шкас ёвтан сюкпря малавиксэнь туртов. Ули мезень кисэ. Венчамодо-урьвакстомадо мейле сон эзь мере тень ковгак ве ёнов туемс (кода эрси од семиятнесэ), мутано теть тев Покш Березникстэ. А вана кодамо тев лиси специальносттеме, башка толковамс а эряви… Секс мирдем мерсь: «Мон сень кисэ, штобу тон эрямонь тевекс кочкавлик медицинанть». Ды мон сонзэ кунсолыя, – ёвтнесь Галина Кечайкина.

Документэнзэ сон максынзе Саранскоень медицинской училищав (ней – колледж), экзаментнэнь парсте максомадо мейле теевсь чинь отделениянь студенткакс. Эдь средней медицинской тонавтнемань заведениясо заочной отделеният арасть, тень парсте чарькодсть мирдть-нить. Шкань ютазь Галина Александровна тонавтнеманзо поладызе заочна Самарань государственной университетсэ «сестринское дело» специальностень коряс (2005–2010 иетнестэ).
Галина Александровна марто кортнемстэ эштё весть чарькодинь, бути вечкиця ломантнень ютксо ули вейке-вейкенень кемема ды чарькодема, кодаткак пирявкст а лисить. Вана истя 80-це иетнестэ, медучилищасо тонавтнемстэ, Галина Кечайкина недлянь перть Саранскойсэль, оймсема читнестэ жо капшась Покш Березникев, косо эйсэнзэ учось мирдезэ, шкань ютазь чачсь Татьяна тейтерест, конась истя жо эзь карма пирявксокс тонавтнемантень. Галина Александровна те шкас ёвты сюкпря весе малавиксэнзэ туртов, кить се шкастонть лездасть тензэ тевсэ ды валсо.

Велявтсь тиринь районов

Шкань ютазьгак эзь стувтово, кодамо мельспаросо Галина Александровна велявтсь эрямо ды важодеме тиринь районов. Тесэ пек учость эйсэнзэ сехте малавикс ломанензэ ды важодема таркаяк сеске муевсь специальностень коряс Покш Березникень ЦРБ-нь поликлиникасо, косо кавксо иень перть топавтсь медсестрань тевенть эйкакшонь врачонть марто.

Нама, васень шкасто ульнесть тонавтыцянзо ды превс путыцянзо, лездасть тензэ специальностень коряс теориянь содамочитнень тевс нолдамо. Истямо ломанекс сонзэ туртов васень читнестэ саезь кармась поликлиникань отделениянь прявтось Светлана Ивановна Инкова. Чарькодеви, эйдень медицинской патронажной сестрантень, кинь участкасо ульнесть сядодо ламо эйкакшт, юткстост ламот ансяк чачозь, ульнесь а шожда… Куш, участказо райцентрасоль, китне се шкане аволь весе таркатнесэ парт ульнесть, резиновой кемензэ сёксень-тундонь шкане свал мартонзольть. Кодамо шкасто лезкс мельга сонензэ эзть пшкадекшне, кие бу аволь уле: малавиксэнзэ, лиясто мик аволь сонзэ участкань тетятне-аватне, свал аноколь самс лездамо.

60-це иетнестэ саезь колоньгеменде ламо иень перть Покш Березникень райбольницянь прявт врачокс ульнесь республикасонок содавикс ломанесь, тевензэ парсте содыця врачось Николай Яковлевич Хрулин. Сон покш мель явсь аволь ансяк административной тевтненень, конат путовить лецямонь эрьва учреждениянь прявтонть лангс, а седе вишкине мель путсь кадратненень. Сон парсте несь ды чарькодсь, кинь кодамо таркас аравтомс, кинень максомс ответственной те эли тона тевенть. Истя сон редизе Галина Кечайкинань важодемань ёрокчинзэ, одксчинзэ лангс апак вано, аравтызе Покш Березникень центральной райбольницянь старшей медсестракс. Шкась невтизе, сон эзь маняво. Комсь иень перть Галина Александровна топавтсь те а шожда тевенть. Сеть шкатнестэ лецямонь те учреждениясонть ульнесть 250 таркат, косо витсть шумбрачист ормалгадозтне.

Теде башка, сон кандсь покш ответственность районсонть уликс 22 фельдшерско-акушерской пункттнэнь кис. Сонензэ савсь важодемс сядодо ламо средней медицинской персоналонть марто. Эрьванть эсензэ обуцязо, эрьванть эсензэ мелявксонзо кода важодема таркасо, истя кудоютксояк. Бути прявтось эсензэ таркасо, чарькодиця ды чевте седей, сонензэ совить аволь ансяк важодемань коряс кевкстема марто… Весень сон маштсь кунсоломо, бути эрявсь, ков виензэ сатотсть лездаськак: кинень валсо, кинень тевсэ. Паряк, те шкас бу сон топавтоволь вечкевикс тевензэ, бути авольть тееве одкстомтомат масторонь медицинской весе учреждениятнесэ. Самай те тувталонть кувалма савсь тензэ туемс те таркастонть. Теде мейле сон вете иеть ульнесь старшей медсестракс «Комсомольская ЦРБ» Покш Березникень чинь отделениянь стационарсо.

Ковидэнь шкась кувать а стувтови…

Пандемиянь шкадонть кортамсто, Галина Александровнань сеске полавтовсь ёжомарямозо, ёмась чачостонзо мизолксось. Сестэ сон кенерекшнесь само роботамо Покш Березникень Кудов-интернатов. Васняяк ёвтнесь ояксчисэ эриця ды важодиця коллективденть. Эдь самай истямо а шожда шкасто редяви, кинь кодамо питнезэ ды профессиянзо алкукс вечкемазо. Сон апак сёпо ёвтнесь, кода стака ульнесь ваномс те ормасонть сэредицятнень лангс, кода сынь весе виест путсть те кажонть каршо бороцямсто… Куш медицинань важодицятнень ютксто истя жо ламот ормалгадокшность, ялатеке тевест эзизь кадно. Ды ансяк кемнилее чинь ютазь, сынь, кода эсь ютковаст кортасть, вахтаст прядомадо мейле, тусть весе больницяв, эсь пряст лецямо. Эдь васень шкась сехте стакаль, зярдо ламось ульнесь а содавикс, варчневсть лецямонь од лувтне.

Эрить вейке-вейкеде мелявтозь

Кода вере ледстинек, Николай ды Галина Кечайкинтнэ содасть вейкест-вейкест эштё школасо тонавтнемстэ, куш нись ков седе од мирденть эйстэ. Умок содасынь сынст, Николай Кечайкин истя жо ламо эйкакшонь триця семиясто. Сон чачсь-кассь Покш Березникень Вейсэ посёлкасо. Тетязо-авазо, Василий Николаевич ды Любовь Семёновна, трясть-кастсть ниле эйкакшт, ды весень сынст кеместэ стявтызь пильге лангс. Николай семиясонть омбоце эйкакш, сон уш вишкинестэ несь, кода семиясост а пелить важодемадонть. Сонензэ ульнесь кинь пельде тонавтнемс. Покштязо, Николай Егорович, Ине Отечественной войнасоль, сонензэ прась уцяска велявтомс тиринь кудов эйкакшонзо кастомо-кепедеме, нуцьканзо нееме… Ульнесь нешкепирезэ, те тевенть мельганзо поладызе цёразо Василий Николаевич. Теде башка, Николаень тетязо ламо иеть важодсь Вейсэ посёлкань се шкане уликс ревень фермасо, эштё сон маштсь почтонь нолдамо. Аволь ансяк Вейсэ посёлкань, маласо шабра велетнень эрицятне те ведьгевентень сакшность яжавтомо. Паряк, кияк мери, мезень кисэ весе умонь шканть ледстия? Васняяк сень кисэ, се шкань эйкакштненень ульнесь кинь пельде тонавтнемс, велетне пешксельть ломанде, сынь несть, кода важодсть тетяст-аваст, покштяст-бабаст. Неть ёрокчитнень сынь аволь ансяк ванстызь, тевскак эйсэст нолдыть эсь эрямосост.

Вана истя, кода Николай ды Галина Кечайкинтнэ урьвакстсть-венчасть ды кармась улеме эсь эрямо таркаст, юткстост эрьвась эсензэ важодема таркадо башка кенерсь ды мусь шка кудоютконь тевень топавтомо, кардазпотмо ракшань кирдеме.

Кавто паро эйкакшт трясть-кастсть, кить тенст ниле нуцькинеть казсть. Кевкстеманок лангс, косто амольдить вийть, апак кавтолдо мерсть: вечкемась – весементень прявт.

Валентина Юдина