2022 иенть прядовомсто Отяжелень райононь Ламбаське велесэ «Здравоохранение» национальной проектэнть лувсо панжовсь неень шкань фельдшерско-акушерской од пункт. Велень весе эрицятнень туртов те кармась вадря ды эрявикс казнекс, эдь медицинань лезксэсь сыненст икеле максовиль ФАП-сонть, конась ульнесь почтань зданиясонть ды стявтозель сон 1963 иестэ.
ФАП-нь од зданиясь ашти велень куншкакуросонть, перьканзо таркась ацазь брусчаткасо, ули пандус, фельдшерэнь тердемань кнопка. Вишка пациенттнэнь туртов тесэ истя жо весемесь ули: эйдетнень тапарямонь стольне, сталмонь ды сэрень онкстамкат. Лиякс меремс, весемесь теезь тесэнь эрицятнень туртов.
Фельдшерэкс тесэ малав весе эрямонзо перть, уш колоньгеменде ламо иеть, важоди Антонина Егоровна Автаева. Авась чачсь-кассь теске, Ламбаськесэ. Школадо мейле тонавтнесь Орданьбуень медучилищасо, конань прядозь велявтсь тиринь велев ды кармась роботамо фельдшерско-акушерской пунктсо.
– Арсинь, аламос роботан, эштё пурнан эрявикс содамочить ды туян ковгак ошов, – ёвтни Антонина Автаева. – Ансяк ливтясть ие, кавто, велесэ роботась тень вечкевсь ды уш ковгак туемс мелем арасель. Ней вана уш колоньгемень вейке ие топавтан вечкевикс тевем. Зярдо ушодынь важодеме, коллективенек ульнесь покш, эринек весе ялгаксчисэ. Сестэ ФАП-нь заведующеекс ульнесь Валентина Васильевна Билюшова. Мон покш сюкпря тензэ ёвтан, весементень тонавтымим, пек ламо содамочить тень макссь.
Антонина Егоровна Ламбаськень ФАП-с сась акушеркакс, эдь лия тарка арасель. Ламо иетнень перть роботась те тевсэнть, мейле аравтызь заведующеекс.
– Колоньгемень иетнень перть роботамс савсь эрьва кодамо зданиясо, иеде икеле минек Ламбаськесэ панжсть неень шкань од ФАП, конантень аравтозь весе эрявикс оборудованиясь ды техникась. Тесэ лембе, валдо. Ули процедуратнень теемань туртов кабинет, сыцятнень примамонь кабинет, хозяйственной помещения, санузел, – ёвтни Антонина Автаева. – Тей важодеме ютамодонть икеле якинь тонавтнеме од оборудованиянть марто важодемантень. Истя жо вете иес весть ардтнян квалификациянь кастомань курсатнес. Эрямось ве таркасо а ашти, свал появакшны мезеяк од ды те одонть эряви содамс ды чарькодемс.
Од оборудованиянть улеманзо марто эрицятненень медицинань лезксэнь максомань ёнкстнэяк седе ламолгадсть. Ней, бути эряви, Ламбаськень ФАП-сонть теить ЭКГ, саить эрьва кодат анализт – ванныть холестеринэнть, гемоглобинэнть, сахаронть. Ули сельметнесэ давлениянть онкстамонь аппарат. Веенст анализтнэ теевить сеске, лиятнень марто жо ломанесь арды Отяжелень поликлиникав, косо тензэ весементь вадрясто толковасызь.
А. Е. Автаевань вановт ало кавто велеть – Ламбаськесь ды Гаваева посёлкась, конась ашти 5-7 вайгельбень тарка. Ней тосо эрицяткак уш допрок эзть кадово, ансяк ульнесть шкат, зярдо эрясть ламо ломанть, важодсь школа, ульнесть эйкакшт ды весенень эрявсь макснемс медицинань лезкс.
– Велесэ фельдшертнэнь роботаст ламо. Минек Ламбаськесэ лововить 320 эрицят. Кизэнь шкасто жо ломантне ков седе ламолгадыть – эйкакштнень усксызь каникулас покштяст-бабаст туртов, дачникть ламо сакшныть, – корты Антонина Егоровна. – Ней вана диспансеризация ютавтынь. Весень марто эрявсь кортнемс, конёв лангс сёрмадомс пеняцямост, мелявтовтыця орматнень. Велесэнть эрицятнень седе покш пельксэсь пенсиясо ломанть, сынст шумбрачись уш аволь вадрятнестэ, сакшныть ды пшкалить свалшкасто. Сыре ломантнень ванномо свал якан тенст кудов. Течияк вана ульнесть пшкадемат, ниле ломаннень якинь кудос. Теке марто ламо сыцят ФАП-овгак. Эдь кинень райононь поликлиникасо уколт сёрмадстыть, кинень процедурат кодаткак. Весе сыть тей. Истя жо тесэ важоди велень хозяйствань покш предприятия – «МАПО «Восток» ООО-сь. Тосонь важодицятне, кадык ламот эйстэст шабра Чаунзань ды Ицялонь районтнэнь эрицятне, эсест поликлиникатнесэ максозь кармавтоматнень марто сакшныть миненек. Сыненст тей сакшномс седе вадря. Весень кунсолосынь, лездан валсояк, тевсэяк.
Кода тешкстась фельдшерэсь, седе сеедьстэ эрицятне пшкалить седеень-санонь, потмо орматнень марто, давлениянь коряс. Эрьвантень явови мель, ёвтави лецямо.
– Важоди велесэнть школаяк. Тосо неень шкасто тонавтнить вете велень эйкакшт, сынст марто истя жо важодян. Эйкакштненень путневить прививкат, ютавтовить ванкшномат. Минек велесэ меельце зярыя иетнень перть эзь чачокшно вейкеяк эйкакш. Ней жо вишка эйкакшонокак ули, иенть прядовомантень учотано эштё чачиця. Те пек кенярдовты.
Нама, орматне а кочксить сэредемань шкат. Секскак фельдшерэнть тердтнить ветькак. Лиясто кияк ормалгады, гайневти вень куншкане, чии сэредицянтень. Роботась истямо.
– Эйкакштнеяк ормалгадокшныть, истя жо покштнеяк-сыретнеяк, кинь давлениязо касы, кинь седеень ормась куродсы. Нама, васняяк фельдшернэнь гайневтить, – тешкстась Антонина Егоровна. – Теке марто, эряви меремс, ней тень коряс кармась аламодо седе шожда. Бути кие стардови куш веть, куш чить, ломантне сыньскак ды монгак гайневттяно медицинань куроксто лезксэнь максомань службатнес, конатне шкань апак таргсе ардыть ды тейсызь весе эрявиксэнть.
Колоньгеменде ламо иетнень перть фельдшерэнь тевенть топавтозь, Антонина Автаева эзь янксе ве чияк, мекс кочкизе те профессиянть. Сон тешксты, што лия тевсэ эсь прянзо овсе а неи.
– Меревлинь бу, монь топавтовсь эйкакш шкань мелем-бажамом. Минек семиянок ульнесь покш, эйкакштнеде котоненек. Вишкинестэ свал яла налксинек профессиясо. Бути арсезевемс, налксемстэ эйкакштнестэ ламотне неить эсь пряст тонавтыцякс. Мон жо уш сестэ налксинь лецицякс. Ды эрямонь тевекскак кочкия те профессиянть, – кемексты Антонина Автаева. – Эсень роботам пек вечкса, вечксынь ломантнень, конатне монень пшкалить, сакшныть. Монень тесэ пек шожда роботамс, эдь эрицятне кемить тень, ломанькс путыть эйсэнь.
Юлия Еремина