Истямо лем ало те иень кизна «Эрзянь правда» газетась вейсэ Мордовиянь Тейтерь-авань вейсэндявксонть марто республикань эрицятнень ютксо яволявтокшнось пелькстамо. Сон алтазель газетань чачома чинтень, конась тешкставкшны эрьва иень сёксня. Тедеде тензэ топодсть 102 иеть. Редакцияв сыця ёроков важодевкстнэнь ванкшномадост мейле, сехте партнэнь ютксто кочказельть изницятне ды сынь тердезельть инжекс.
Васняяк ёвтасынек лемест. Васенце тарканть саизе Надежда Аитова, Отяжелень Цёлпанова велестэ, кие тонавтни теке райононь Ламбаськень средней школасо, 3-це классо. Омбоце таркас лиссть Чаунзань Комсомольский посёлкань эйдень кужонь воспитателесь Ольга Васильевна Гусева ды Екатерина тейтерезэ, кона тонавтни Комсомольский посёлкань 1 № средней школань 8-це классо. Колмоце таркатнень эсь ютковаст явизь Орданьбуень райононь мазый тейтертне-блогертнэ, эрзянь ды рузонь кельсэ парсте сёрмадомо маштыцятне, ушодыця журналисттнэ – Яна Кудашкина ды Алёна Артемьева.
Те чистэнть изницятнень ды редакциянь коллективенть марто вастовомо сакшность минек ветерантнэ, республикань содавикс журналисттнэ Татьяна Рябова ды Раиса Щанкина, Мордовиянь Тейтерь-авань вейсэндявксонь прявтонь полавтыцясь, «Надежда» республикань эйкакшонь ды од ломанень приютонь прявтось Татьяна Барашихина ды МР-нь Журналистэнь вейсэндявксонь секретаресь Екатерина Кочкуркина.
Мельспаронь вастовоманть ушодызе «Эрзянь правда» газетань прявт редакторось Марина Девятова. Марина Николаевна тешкстась, кодамо покш кенярксчи вастомс инжеть минек редакциясо неть сырнень сёксень маней читнестэ. Ды тувталоськак тенень пек кенярксов.
– Течи минь вейсэ Мордовия Республикань Журналистэнь вейсэндявксонть марто чествоватано сеть ломантнень, кить пингест алтызь журналистэнь а шожда тевентень, – мерсь Марина Николаевна ды макссь вал МР-нь Журналистэнь вейсэндявксонь секретарентень Екатерина Кочкуркинанень.
Журналисттнэ тевест
а кадныть
Екатерина Николаевна васняяк тешкстынзе тиринь кельсэ лисниця газетанть лиятнень ёнов а молиця ёнксонзо. Кода сон мерсь, те тееви весе редакциянь коллективенть вийсэ, ансяк вейсэ келенть вечкезь ды ойменть путозь ванстови эрзянь литературной келесь. Те пек эрявикс ды покш важодема.
Седе тов сон тешкстынзе минек ветерантнэнь покш путовксост тиринь кельсэ лисниця газетанть паролгавтомасо ды журналистэнь ламо пелькстамотнесэ изницякс лисемасо. Татьяна Рябованень ды Раиса Щанкинанень те чистэнть максозельть Благодарностть МР-нь Журналистэнь вейсэндявксонть ды казнеть «Эрзянь правда» газетанть пельде. Те иестэнть неть эрзянь аватне тешкстызь юбилеест. Сынь, ловт, весе пингест алтызь сёрмадомань а шожда тевентень ды нейгак, ков сатыть виест, лездыть тиринь газетантень, сеедьстэ сакшныть редакцияв, ёвтыть тенек превс путомат, седейшкава ризныть-палыть тиринь кельсэ лисиця газетанть кисэ.
Невтемакс, Раиса Щанкина, «Литова» эрзянь аватнень вейсэндявксонь прявтось, «Ламзурь» ансамблянь ветицясь, топавты ламо лия общественной тевть. Республикань томбалев якамсто, сеедьстэ сёрмали тенек тосо эриця эрзятнень ланга. Эрьва тевсэ те дока аванть аволь ансяк ламо публикациянзо тиринь газетасонть ды республикань лия СМИ-тнесэ, улить нолдазь книганзо, конатнень сон кази Мордовиянь библиотекатненень ды весе содавиксэнзэ туртов. Вана нейгак Раиса Борисовна миненек сась аволь чавонь кедть, од книганзо марто. Текенень поладсынек, сон варчни виензэ Грантонь сёрмадомасо, нама, изнякшныяк.
Кода мерсь Раиса Борисовна, журналистэкс улемс пек паро, бути ломанесь алкукс кундась те тевентень, те профессиясь карми тензэ эрямонь лувокс. А стяко редакциянть, косо сон важодсь колоньгемень иеть, лемдизе омбоце кудокс, конась тензэ макссь пек ламо. Те шкас ансяк паро валсо ледстни сеть ломантнень, ветерантнэнь, кить панжсть тензэ келей ки журналистэнь тевентень. Те, васняяк, содавикс сёрмадеесь Василий Радаев, конась редакциясо ветясь «Тештине» литературной куронть. Василий Кузьмич ламо од ломаннень лездась шкинемань ёрокчист панжомасо, сёрмадомо тонавтомасо.
МР-нь культурань заслуженной роботникесь ды Мордовиянь Журналистэнь вейсэндявксонтень совицясь Татьяна Рябова, куш «Эрзянь правда» редакциясто тусь 15 иеде икеле, ялатеке эзинзе ёмавто сюлмотнень тиринь газетанть марто.
Сон сеедьстэ гайневтни редакцияв, седейшкава мелявты тиринь газетанть лангс сёрмадстомань шкасто. Истя жо а стувтни лия ветерантнэньгак. Паро валсо ледстни весе тонавтыцянзо, кить покш лезкс макссть тензэ журналистэнь а шожда тевентень тонавтнемасо. Виде, ламот умок арасть ютксонок. Неть: икелень прявт редакторось, Ине Отечественной войнань участникесь Пётр Борейкин, отделэнь прявттнэ Николай Симдянов, Николай Майоров ды ламо лият.
Покш седейризкс марто ледстязель республикань келес содавикс журналистэсь Татьяна Ковалёва. Татьяна Михайловна аволь умок тусь эрямосто. Сон, ловт, куломазонзо сакшнось тенек редакцияв, сеедьстэ гайневтнесь телефононь вельде ды свал ульнесь мелезэ содамс, кода эри тиринь кельсэ лисниця газетась. Татьяна Михайловна превс путоманзо свал ёвтылинзе маштозь ды ломанень апак покорда. Кода мерсь Татьяна Дмитриевна, сон куломадонзо мейлеяк кадсь мельганзо истямо превс путома, конась васов аволь весенень сы мельс. Малавиксэнзэ мусть кудостонзо вейс пурназь ламо книгат, конатнень лангсо ульнесь сёрмадовкс, штобу сынст пачтямс Отяжелень райононь Таразбуень библиотекав… Аволь умок те меленть топавтызь «Эрзянь правда» газетань ветерантнэ.
Казнеть изницятненень
Те чистэнть покш мельспаросо ды мик аламодо талнозь саизь казнест те пелькстамосонть изницятне. Тень коряс валось максозель Мордовиянь Тейтерь-авань вейсэндявксонь прявтонь полавтыцянтень, «Надежда» республикань эйкакшонь ды од ломанень приютонь прявтонтень Татьяна Барашихинанень. Татьяна Васильевна изницятненень поздоровонь ёвтамодо мейле тешкстась, кодамо покш тев неень шкасто топавтыть национальной газетань журналисттнэ эрьва чинь важодемасост. Седейшкава сёрмадыть тейтерь-аватнень эрямодост. Тешкстызе сынст путовксост эрьва семиясонть сэтьмечинть, вечкеманть ванстомасо, ламо эйкакшонь трямосо.
Кода уш вере тешкстынек, васенце тарканть саизе Отяжелень райононь Цёлпанова эрзянь велень мазый тейтерькась Надежда Аитова, сон тонавтни Ламбаськень школасо. Нама, те изнявкссонть покш путовксост малавиксэнзэ. Васняяк, эряви меремс, бабанзо, Надежда Вдовинань, конась те чистэнть сась нуцькинензэ марто кенярксчинтень. Надежда Алексеевна ниленьгемень иеть ульнесь эрзянь келень тонавтыцякс ды школань прявтокс. Эрзянь келенть вечкеме тонавтызе тейтерензэяк, кие эштё школасо тонавтнемстэ яксесь эрзянь келень ды литературань олимпиадатнес. Ней тиринь келентень вечкемась ютась Надежда нуцькинензэ туртов, конась мельспаросо ловны «Эрзянь правда», «Эрзянь мастор» газетатнень ды «Чилисема» журналонть.
Надежда Аитова те изнявксонть кисэ ёвты покш сюкпря тонавтыцянстэнь Любовь Сергеевна Булыгинанень, сон эйсэнзэ эштё тонавты тиринь кельсэ морамояк. Вана истямо мазый «тештине» сакшнось минек редакцияв.
А седе вишкине мельспаросо минь вастынек омбоце таркань саицятнень – Ольга Васильевна Гусевань ды тейтерьканзо Екатеринань. Сынь сакшность Чаунзабуень Комсомольский посёлкасто. Ледстясынек, Ольга Васильевна – эйдень кужонь воспитатель, Екатерина – Комсомольский посёлкань 1-це номер школань 8-це классо тонавтниця.
Кода мерсь Ольга Васильевна, тиринь келентень вечкемась ульнесь истямо покшокс, сон мик кармась ветямо эрзянь келень курыне рузонь эйкакштнень туртовгак, косо сынь аволь ансяк валт тонавтнить, истя жо числат ды бажить тонавтнеме кортамо. Ольга Гусевань валонзо коряс, сынст эрзянь курынес якицятненень вейсэндявсть татаронь келень содыцятнеяк.
Меельцекс Екатерина Гусева весе пурнавозтнень кенярдовтынзе эрзянь кельсэ стихотворениянь мазыйстэ ёвтнемасо, валтнэнь ладсинзе вейсэ аванзо марто.
«Эрзянь правда» газетань прявт редакторось Марина Девятова сюкпрянь башка валт ёвтась Орданьбуень ёроков сёрмадыцятненень Алёна Артемьеванень ды Яна Кудашкинанень, кить пек лездасть сёрмадомасост тиринь газетантень ютазь кизэстэнть.
Теке жо чистэнть республикань прявттнэнь пельде покш казнеть максозельть «Эрзянь правда» газетань специальной корреспондентэнтень Татьяна Маторкинанень – Мордовия Республикань Правительствань Почётной Грамота, культурань ды социальной проблемань отделэнь прявтонтень Юлия Ерёминанень – МР-нь Прявтонь Благодарность. Кавонест журналисттнэ седейшкава важодить тиринь газетасо кеветее иеде ламо шкань перть, сеедьстэ ардтнить командировкав республикаванть ды сонзэ томбалев, кенярдовтыть минек ловныцятнень эсь публикациясост.
Меельцекс весе инжетнень каванизь тантей прякадо ды ламбамо чайде.
Валентина Юдина