Февралень 6-це чистэ «Старт» стадионсо ютавтовсть эй ланга мотогонкатнень коряс Мордовиянь сборной командатнень невтемань ардтнематне, конатне анокстазь Мордовиянь Прявтонть Артём Здуновонь мелензэ коряс. Ваныцятне – Донбассто Мордовияв сазетнень, специальной военной операциянь участниктнень эйкакшост, Ялгань эйкакштненень лездамонь центрань эйдетне, истя жо республикань Ёроков эйкакштнень туртов лицеень тонавтницятне.
Тешкстасынек, недлядо икеле Саранскойсэ, кемголмово иень ютазь, одс ветявсть спидвеень коряс официальной пелькстамотне – высшей лигань командатнень ютксо чемпионатонь ды кубоконь пелькстнэ. Мордовиясь свал ульнесь содавикс эй ланга мотогонкатнесэ – республикасо сынст вечксть ды поладыть вечкеме. Зярыя кементь иетнень перть Саранскоесь ульнесь эень спидвеень масторлангонь куншкакурокс. Республикась кастсь Россиянь, Европань ды масторлангонь чемпионт.
Эй ланга мотогонкатненень од эскелькс макссь Мордовиянь Прявтось Артём Здунов, вельмевтизе аламодо стувтовозь, ансяк вечкевикс ды мазый спортонь те видэнть. 2021 иестэ ды 2022 иень февральстэ Саранскойсэ ды Рузаевкасо ютавтовсть эй ланга спидвеень коряс невтемань ардтнематне, те иень январьстэ Мордовиясо ютавтовсть весероссиянь пелькстамотнень васенце пелькстнэ. Февральстэ «Стартсо» ютавтовить командань пелькстамотнесэ Россиянь чемпионатонь ды Россиянь кубоконь омбоце пелькстнэ.
«ДОСААФ – Мордовия» мотоклубонь ды Анатолий Миндров лемсэ спортонь технической видтнэнь центрань спортсментнэнь неть ардтнематне невтезельть эйкакштнень туртов, ламот юткстост марякшность эли уш ульнесть эй лангсо мотогонкатнень коряс пелькстамотнесэ. Лиятнень туртов неть ардтнематне кармасть спидвеенть марто содавтомакс.
Ардтнематнень прядовомга эйкакштненень меревсь кортнемс мотогонщиктнень марто, маласто ванномс сынст техниканть ды спортонь экипировканть, снимавомс спидвеень легендатнень марто. Эйкакштне покш мель марто ваннызь аволь ансяк спортсментнэнь «боевой алашаст», истя жо лия техниканть, конась невтезель мотоциклетной спортонть марто содавтоманть туртов. Эень трассанть лангсо ванноматнеде мейле эжнемс лездасть пси чаесь ды прякатне.
Ардтнематнень ванызь Артём Здунов ды Россиянь Теннисэнь федерациянь президентэсь, Раськеютконь Олимпийской комитетэнь исполкомонтень совицясь, Мордовия Республикань Почётной гражданинэсь Шамиль Тарпищев.