Эрзянь ды мокшонь раськень культурань музейсэ панжовсь «Узоры кружевниц» кружовасто кодамонь выставка. Сонзэ пурныцякс кармась Республикань Раськень творчествань кудось. Тесэ невтневить 30 авторонь 180 важодевкст.
Мордовиясо кружовасто кодамось теевсь-вельмесь Темниковасо. Тосо 1907 иестэ сюпав авась Демидова панжокшнось кружовасто кодамонь мастерской. Шкань ютазь панжсь школаяк, косо тонавтнесть кажовсто эрицятнень эйкакшост. Мастерскоесь ды школась важодсть 1930 иес, мейле пекставсть. Одс вельмевтизе те искусстванть А. А. Мануилова. Кружовасто кодамо сон тонавтсь тейтертнень Саранскоень культурань училищасо. Ней неть тейтертне теевсть содавикс педагогокс, саемга, Е. М. Краснова, Н. В. Матвеева ды лиятне. Тевест поладызь тонавтницяст.
Выставкань панжомсто лембе валт ёвтасть Республикань Раськень творчествань кудонь прявтось Л. И. Наркаева, Эрзянь ды мокшонь раськень культурань музеень прявтось Н. П. Баулина, М. Е. Евсевьев лемсэ МГПУ-нь художественной ды музыкальной образованиянь кафедрань прявтось В. А. Варданян, Темниковасто кружовасто кодамонь мастерэсь Л. Г. Ненюкова.
– Анокстынек выставканть ды дивсинек, зяро республикасонок улить ломанть, конат важодить кружовань кодамонь техникасо. Мастертнэ аволь ансяк Саранскоень, сынь састь Рузаевкань, Ицялонь, Краснослободскоень ды Темниковань районтнэстэ. Кодат сынь превейть, машты кедь ломанть! Зяро мазычи тейсть! Тесэ коклюшкасо, спицасо, крючоксо кодавкст. Улить салфеткат, киякс ланга ацамот, оршамопелень мазылгавтомат – сиветь. Улить эйкакшонь важодевкст, истя жо покш ломанень. Кружовасто кодамось – аволь шожда тев. Эряви покш мелень явома, вийть, цидярдома, паро сельметь. Эрьва теевксэнть лангсо сави ламо важодемс. Выставкадонть башка, карматано ютавтомо кружовасто кодамонь мастер-класст, кинь ули мелезэ содамс те тевенть – тердтяно, садо! – кортась музеень старшей научной важодицясь В. Н. Захарина.
Дарья Ершкова чачсь ды эри Рузаевкасо. Школанть прядомадо мейле тонавтнесь Н. П. Огарёв лемсэ МГУ-нь Раськень культурань институтсо. Самай тосо васенцеде кармась содамо кружовасто кодамонь тевденть. Студенттнэнень дисциплинанть ветясь Е. М. Краснова тонавтыцясь. Од тейтерентень пек тусь мельс те тевесь. Сон варчизе – ды тевезэ лиссь. Валонзо коряс, те кодамось аволь шожда, ансяк парсте оймавты ломаненть, панси берянь мельтнень-арсематнень. Васенце шкастонть стакаль тонавтнемс. А уш седе тов кедесь тонадсь ды весе юткошкастонзо бажась кодамонтень. Ней Дарья важоди А. В. Ухтомский лемсэ клубсо ды эйкакшонь художественной школасо. Вейкесэнть тонавты эйкакшт, лиясонть – покш ломанть. Заочна тонавтни М. Е. Евсевьев лемсэ МГПУ-со изобразительной искусствань специальностенть коряс.
– Президентэнь грантонть лезксэнзэ вельде минь панжинек кружевницань мастерской. Колмоце ие тосо важодтяно. Тонавтницян уш пенсиясот, ансяк покш мелест мезеяк теемс, ансяк бу а аштемс ве таркасо. Неть: Л. И. Синицына, Г. В. Авдеева, И. Н. Савельева, П. В. Щукина (сонензэ уш 77 иеть). Весе теевксэст невтевить выставкасонть. Кружовасто кодамось явови искусствань лия творческой тевтнеде. Сон аволь викшневкс, аволь кодавкс… Неяви тунь лиякс, мазый, ажурной. Кружовасто кодамс эряви тодовне. Коклюшкатне – прявт инструмент. Эрявить салмукст ды схемат. Схемавтомо мезеяк а тееви. Тевс нолдавить хлопкань суреть. Сехте мазый кодавкстнэ лисить чова суринестэ, – ёвтни Дарья Ершкова.
Выставкасонть невтневить Дарья Владимировнань ды тонавтницянзо 45 теевкст: паннот, салфеткат, манжетт, ажурной сиветь, конат пек мазылгавтыть аватнень паляст. Воротничок ашти эсензэ лангсояк ды кружовасто кодазь пилекст. Кружовасто кодамодо башка, тейтерь-авась тейни эрьгестэ сумкинеть. Сынст паро мельсэ рамсить аватне. Истямо сумкине киньгак кедьстэ а неят ды лавкастояк а муят.
Те выставкасонть невтевить оршамопелень коллекцият, весе сынь мазылгавтозь кружовасо: «Рузонь кружоват, «Рузонь сарафант», «Иень шкат». Сынст теизь 1 № эйкакшонь художественной школань тонавтницятне ды тонавтыцяст М.В. Акаемова, Я. И. Волгаева.
Кружовасто кодамонь искусствась ковгак эзь ёма. Сон кармась вечкевикс тевекс ламонь туртов. Паро, те тевентень тонавтыть эйкакштнень, сонензэ явить мель од ломантнеяк. Выставкась карми важодеме ковонь перть. Истямо мазычинть эряви неемс эсь сельмесэ!
Татьяна Маторкина