Эрямосонок свал истя эрси, зярдо ломанесь маласонок, эрятано вейке ошсо эли вейке республикасо, вастовомс шканок яла а саты. Эсь пачканок арсетяно, течи ламо тевенек, тень тейса ванды, вандыде мейлес кадса…
Тердематнень каршояк лиясто мутано сядо тевть, конат, паряк, топавтовольть седе тов. Неть арсематне сеедьстэ тень кармасть само, зярдо Мордовиясто тусь Ардатовань ды Атяшевань епископось, Иневанькс Вениамин Владыкась. Те иень сёксня сонзэ ладизь Кронштадтонь епископокс, Санкт-Петербургонь епархиянь викариекс, Свято-Троицкой Александро-Невской Лаврань наместникекс.
Тешкстаса, те арсеманть мария ламонь пельде, кить сеедьстэ яксесть тензэ службас, кинь туртов сон ульнесь духовной ломанекс.
Аволь умок православиянь кенярксчиденть – Покровдонть икеле Владыкась сакшнось тиринь ёнксов. Койсэнь, те шкась кочказель а стяко. Кода содатано, 2011 иень тунда Московонь ды весе Русень Кирилл Патриархонть баславамонзо коряс теезель Ардатовань ды Атяшевань епархиясь, сонзэ прявтокс аравтозель Саранскоень епархиянь клирикесь, Чуфаровань цёрань монастырень наместникесь, игуменэсь Вениамин (Кириллов). Теке жо иень октябрясто Ардатовань ды Атяшевань епархиясь совавтозель Мордовиянь Митрополияс. Кемготово иеде икеле, Покровонь кенярксчистэ, Московсо, Христос Спасителень храмсо, ютавтозель хиротониясь Вениамин архимандритэнть коряс.
Кода пачтясть МР-нь Прявтонь Пресс-службасто, тиринь республикасо улемстэ Кронштадтонь епископось вастневсь Мордовия Республикань Прявтонть Артём Здунов марто. Артём Алексеевич ёвтась сюкпря архиереентень республиканть лезэс ламо иень перть вадрясто служамонть кисэ. Гражданской сэтьмечинь кемекстамонть ды духовно-нравственной койтнень-кирдатнень ванстомантень покш путовксонть кисэ Артём Здунов казсь тензэ государственной награда – «За заслуги перед Республикой Мордовия» медаленть.
Омбоце чистэ сонзэ тердтнизь тиринь Дубёнкань районов, косо вастневсь те ёнксонь эрицятнень марто. Дубёнкань РДК-с Владыканть вастомо пурнавкшность образовательной учреждениятнесэ тонавтыцятне ды тонавтницятне, юнармеецтнэ, кадеттнэ ды те райононь эрицятне, кить парсте содасызь Владыканть.
Торжественной пельксстэнть Вениамин Владыкантень райононь прявтонть Виктор Нефёдовонь пельде максозель «Дубёнкань муниципальной райононь Почётной гражданин» лемесь.
Виде, неть кавто покш казнетне сонензэ максозь а стяко. Владыкась ламо тейсь аволь ансяк тиринь Дубёнкань, эштё Орданьбуень, Отяжелень, Чаунзань, Покш Игнатовань ды Покш Березникень районтнэнь лезэс, конат совить Ардатовань ды Атяшевань епархиянтень.
Те сонзэ служамонть пингстэ Отяжелень посёлкасо стявтозель Пазнэнь кемицятненень ды весе райононь эрицятненень Андрей Первозванный лемсэ мазыйдеяк мазый од церьковась, вакссонзо культурно-духовной центрась.
Кемгавтово иень перть те епархиясонть стявтозельть ламо од храмт, витнезельть ды одс вельмевтезельть таштотне.
Сондензэ паро ледстнемакс кадовсть епархиянь управлениянь од зданиясь ды музеесь, косо ванстовить церковно-исторической документт. Те сонзэ бажамонзо вельде Орданьбуесэ теезель Мордовияв сыця паломниктнень туртов гостиницась. Епархиясо важодицятне ёвтыть тензэ сюкпря важодемань таркаст паролгавтоманть кисэ. Шканзо асатноманть лангс апак вано, сон кенерькшнесь Н. П. Огарёв лемсэ МГУ-со культурология предметэнь коряс лекциянь ловномо, од ломантнень ютксо эрьва кодат пелькстамонь ютавтомо, республикань телевидениянь каналтнэсэ кода рузонь, истя тиринь кельтнесэ передачань ветямо, Пазнэнь кемицятнень кевкстемаст лангс каршо валонь ёвтамо.
Владыкась явсь покш мель кода од ломантненень, истя сыретнененьгак. Сеедьстэ яксесь эйдень кужотнес, эйкакшонь кудотнес ды сыре ломанень пансионаттнэс, косо сонзэ свал учость, эдь сон тенст макссь аволь ансяк казнеть, истя жо лембе, седеень оймавтыця валт.
Сон истя жо мелявты нужасо эрицятнеде. Самай те тувталонть коряс Епархиянь управлениянь зданиясонть ды Чаунзань Михайло-Архангельской храмонть юрсо теезельть гуманитарной лезксэнь складт.
Владыкась башка мель явсь правань ванстыця органонь важодицятненень. Васняяк сетненень, кить службаст кандыть «пси» точкатнесэ. Истя жо эзь кадо вановттомо масторонть икеле долгост топавтыцятнень, армияв служамо туицятнень. Меельце иетнестэ сонзэ служамонть пингстэ ушодозельть од храмонь стявтомат, конат ней эштё апак прядо. Сынст коряс неень шкане сехте пек мелявты Владыкась, сень лангс апак вано, што сонензэ савсь туемс служамо лия таркав. Невтемакс, Покш Березникень райононь Шугурова ды Эрзянь Найман велетнесэ ушодозь од церьковань строямот, конат неень шкане учить лезкс седеймариця ды Пазнэнь кемиця ломантнень пельде. Сон пек кеми, муевить чевте седей ломанть, кить лездыть неть ды лия ушодозь церьковатнень строямо.
Тешкстасынек, Владыкась Мордовиясо покш мель явсь од ломантнень ютксо православиянь теманть кемекстамонтень, штобу сынь седе ламо содавольть сеть ломантнень пельде, кинень малавикс те темась.
Эрьва ков кенерсь оймамонь а содыця Владыкась, эрьва чистэ сонзэ ульнесть ламо тевензэ, конатнень вельде сон служи Пазонтень ды весе сетненень, кить неень а шожда шкастонть пельдензэ учить лембе валт, оймавтыця превс путомат.
Валентина Юдина