Мордовиясто специальной военной операциянь участниктненень кучозь гуманитарной лезкс. Весе эрявиксэсь рамазь республикань эрицятнень пельде максозь ярмактнень лангс. Финансовой покш лезкс максозель МР-ва Федеральной казначействань важодицятнень пельде, МР-ва Судебной приставонь службанть, Народной фронтонь активисттнэнь ды предпринимательтнень пельде.
Тиринь масторонь ванстыцятненень боень ветямо таркатнес пачтявить квадрокоптерт, лазерной прицелт, вень чоподасонть нееманть туртов приборт, дрононь глушительть, тепловизорт, кекшемань алтымат, обмундирования, автомобилень запасной пелькст ды лалмо лия кедьёнкст. Лембе ёнксонь регионтнэсэ ловонть соламонзо кувалма ушосонть ули покш рудаз. Тень мельсэ кирдезь, рамазь сезононь коряс карсемапельть. Кекшемань алтыматнеяк кодавить сезононть коряс.
«Дронтнэ ней аштить прявт оружиякс тюремань паксятнесэ, – мерсь Россиянь Мирэнь фондонь Мордовиянь отделениянь председателесь Ольга Филеткина. – Покш сюкпря весенень, кить эсь мельсэ ды тевсэ лездыть рамсемс истямо питней оборудования. 2022 иень сентябрясто саезь СВО-нь участниктненень эрявикс кедьёнкстнэнь рамамс минек региононь седеймариця ломантнень ды эрьва кодамо организациятнень пельде састь 137 миллиондо ламо целковойть. Гуманитарной лезксэсь, кода икелеяк, пурнави специальной военной операциянь участниктнень мелест-вешемаст коряс. Сынь сыть Мордовиянь Прявтонть Артём Алексеевич Здуновонь пингстэ робочей группас».
Народной фронтонь региональной штабонь сопредседателесь Игорь Ерёмкин тешкстась: «Ней седе ламо эрявить пилоттомо ливтниця аппаратт ды сынст правтомань средстват. Минь тейтяно весементь боецтнэнь туртов высокотехнологичной оборудованиянть пачтямга».
