Пятница, августа 14, 2020
Важное

 

И.А.Калинкинэнь чачома чистэнзэ саезь 85 иетненень

Топодсть кавксо иеть, кода арась ютксонок эрзянь раськень поэтэсь И.А.Калинкин. Парсте ды лембестэ сонзэ ледстнить сетне, кинень сон лездась ютамс творческой киява. Ризнэвти, монь кой-кона ялгатне паро тевтнень стувтнить. Юты шка, стувтсамизь минекак. Куроксто стувттано сетнень, кить арсесть тенек ансяк вадря.

Поэтэнть эрямозо поладови сонзэ стихотворениятнесэ ды поэматнесэ. Те панжадо ойме ломанесь свал бажась лездамс од поэттнэнень ды весенень, кить пшкалесть тензэ. Калинкин ламо иень перть ульнесь Мордовиянь Писателень союзонь правлениянь председателекс.

Иван Алексеевич Калинкин чачсь 1935 иень июнень 28-це чистэ Ульяновской областень Инзань райононь Чей эрзянь велесэ. Тетязо-авазо важодсть колхозсо. Войнань васенце читнестэ сон тусь фронтов ды чавовсь 1944 иестэ. Неть стака иетнестэ Калинкинтнэ састь эрямо Мордовиянь Покш Игнатова ёнксов. Спасской средней школанть прядомадо мейле Иван Калинкин служась Советской Армиясо.

1959 иестэ Иван Алексеевичень тердизь важодеме Покш Игнатовань «Знамя труда» райгазетав. Ульнесь литсотрудникекс Орданьбуень «Маяк», Ромодановань «Победа» газетатнесэяк.

1972 иестэ Калинкин сась эрямо Саранскоев. Важодсь «Эрзянь правда» газетасонть отделэнь прявтокс, литроботникекс, мейле – «Сятко» журналсо ответственной секретарекс, 1977-1984 иетнестэ – те журналонть прявт редактороль. 1984 иестэ кочказель Мордовиянь Писателень союзонь правлениянь председателекс.

И.А.Калинкин – стихень ды поэмань 19 книгань ды «Ава ды лей» стихсэ романонь автор. Калинкинэнь «Зорянь мизолкст» васенце поэтической книгазо нолдазель 1969 иестэ.

Иван Калинкинэнь творчествазо содавикс Мордовиянть томбалеяк. Сонзэ рузонь кельс ютавтозь стихотворениянзо печатазь «Литературная газета», «Литературная Россия» газетатнесэ, «Наш современник», «Дружба народов», «Нева», «Волга», «Огонек» журналтнэсэ. Московонь издательстватнесэ нолдазь «Черемуховый берег», «Зеленые костры» книганзо.

Эрзя-мокшонь поэзиясо сон васенцекс кармась сёрмадомо истямо стака жанрасонть, кода сонетэнь каштазось.

Иван Алексеевич Калинкинэнь творческой биографиясонзо сехте покш событиякс кармась «Ава ды лей» стихсэ романось. Сонзэ эйсэ невтеви Чей эрзянь велень эрицятнень эрямост. Произведениянь геройтне – Чей велень сокицятне-видицятне. Романось 1998 иестэ нолдазель рузонь кельсэ. 2003-2005 иетнестэ эрзянь кельсэ лиссь писателенть колмо томсо вейспурнавксозо.

«Пиче вирь», «Ояксчинь цецят», «Песни с берегов Суры и Мокши» стихень ды поэмань сборниктнень кис поэтэнтень 1998 иестэ максозь Мордовиянь Государственной премиянь лауреатонь лемесь.

Иван Алексеевич Калинкин – Мордовиянь народной поэт, Мордовиянь заслуженной поэт, Российской Федерациянь культурань заслуженной роботник. Сон ветясь общественной покш тевдеема. Кочкавкшнось Мордовиянь Верховной Советэнь депутатокс, Российской Федерациянь Писателень союзонь правлениянь секретарекс. Казезь «Знак Почёта» орденсэ, МР-нь Прявтонь премиянь лауреат. Кулось 2012 иень июнень 18-це чистэ.

Паро валсо ледстясынек эрзянь алкуксонь поэтэнть, минек покш ялганть Иван Калинкинэнь.

В.КОРЧЕГАНОВ,

Мордовия Республикань заслуженной поэт

Сёксень пель экшс чись ёмси яла.

Менельганть лажазь ливтить

каргт.

Мельгаст кардазсто ваныть

галат,

Арсить: минек тевенек парт.

 

Очктне ярсамопельде пешксеть,

А риштнить эйсэнек даволт;

Пайстомо каргтнень вере

эшксить

Кельме вармань виев коволт.

 

Виде, стакасто изнить янонть

Каргтне, секс рисьмест таргавсь

 санкс.

Ансяк а полавтсызь ливтямонть

Лембе кардазсо очконть лангс.

 

Чись каргтнень кист а курок

артсы,

Сынст покш кецямост – олячи.

...Удыть галатне лембе кардсо,

Эйсэст пшти узере учи.

 

Иван Калинкин

«Ойме лембень поэзия»

Июнень 18-це чистэ А.С.Пушкин лемсэ Национальной библиотекасо ютась «Ойме лембень поэзия» регионъютконь видеоконференция. Сон алтавсь эрзянь поэтэнть Иван Калинкинэнь чачома чистэнзэ саезь 85 иетненень. Видеоконференциянть пурнызе библиотекань национальной ды краеведениянь литературань отделэсь.

Иван Алексеевич чачсь Ульяновской областьсэ, секскак ульнесь мель сюлмавомс те вастовомасонть шабра ёнксонь библиотекатнень марто. Истя, конференциянтень явсть мель Н.П.Огарев лемсэ Инзань межпоселенческой центральной библиотекась ды теке райононь Оськина велень М.Е.Евсевьев лемсэ модельной библиотекась.

Лембе вал марто весе пурнавозтненень пшкадсь МР-нь Писателень союзонь прявтось, МР-нь заслуженной поэтэсь, «Чилисема» журналонь редакторось Н.И.Ишуткин.

Национальной ды краеведениянь литературань отделэнь прявт библиотекаресь В.Б.Бояркина анокстась поэтэнть произведениянзо коряс «Поэзиянь сёлмо лангсо» видеопрезентация.

Вал сайнесь Н.П.Огарев лемсэ МГУ-нь филологиянь факультетэнь доцентэсь, филологиянь наукань докторось Ю.Г.Антонов. Сон пачтясь И.Калинкинэнь поэзиядонть.

Содавикс земляктонть ламо ледстнесь Инзабуень Чей (Челдаева) велень эрицясь Нина Яковлевна Кисарова. Паро валт ёвтасть Ульяновской областень библиотекань важодицятне Светлана Полуднякова ды Елена Храброва.

Истя жо видеоконференциясонть ульнесть Отяжбуень районной эйкакшонь библиотекань ды центральной районной библиотекань важодицятне.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».