Неть читнестэ эрямостонть тусь эрзянь журналистэсь, сёрмадеесь Александр Сергеевич Тикшайкин.
Александр Тикшайкин чачсь 1960 иень январень 4-це чистэ Мордовиянь Дубенкань райононь Антоновка велесэ. 1968 иестэ семияст ютась эрямо Отяжелень райононь Сабанцеле велев. 1982 иестэ прядызе Н.П.Огарёв лемсэ МГУ-нь филологиянь факультетэнть. Важодсь корреспондентэкс «Молодой ленинец», Ромодановань райононь «Победа», «Эрзянь правда» газетатнесэ, «Сятко» журналсо ответственной секретарекс. «Ратор» эрзянь од ломанень журналонь главной редактороль.
Сонзэ эрзянь кельсэ васенце книгазо – «XX пингень ломань» – лиссь 2001 иестэ, омбоцесь – «Валдо кужо» (2002 ие), колмоцесь – «Урозкеть» (2008 ие).
Сонзэ ледстнемга макстано ёвтнемастонзо вейкенть.
Француз
– Хе, лездамс, мерят, теть эряви?
– Эряви, Иван Васильевич, вай, кода пек эряви! Кудонок войнадо икеле олгсо вельтязель. Се шкастонть саезь кавксошка иеть ютасть. Олгтне наксадсть. Вальманокак амаштовить – веень кирда путозь, секс кизна пиземесь лангозонок лосьсэ пизи, тельня ловось столенек лангс шушмот тейни. Сускомапеленекак кодамояк арась, секс, пелян, вай, кода пек пелян – кавто тейтерькан туртов од сюрось а учови, секень вант, тоначив туить... Улевельгак юртсонок цёра ломань, сестэ седе шожда улевель, ансяк вана арасть сынь. Мирдемгак, лелязояк ойнас чавовсть. Ней кавто семияс вейкеяк цёра арась...
– Аште-ка, аште-ка, аштека-а-а! Тон тесэ мезть лавгат?! Вана столень лангсо мирдеть конёвонзо. Тесэ чавовомадонзо ве валгак а неяви. Сон кулявтомо ёмась. Чарькодят, кулявтомо ёмась, – таргсесь валтнэнь Иван Васильевич. – Те мезде корты? Корты вана мезде. Лисни, сонзэ уловонзо кияк костояк эзизе муе. Минь, фр-р-ронтовиктне, тюремань паксясо верь валынек, а тонсесь, паряк, шумбра-паро, кодамояк Францияв оргодсь ды тосо франзуз ава марто элякали! Секс стяко тон монень совить, азе тестэ, ды кинть монь кенкшенть ёнов седе курок стувтык. Те кудостонть лезкс теть кияк а максы! Чапик тень судо прязот седе парсте!
* * *
Неть валтнэ Сайгушонь Танянь, те сон истя кортась райононь военной комиссаронть Панкратов марто, прок мандосо конянь трокс риштизь.
– Вай, – арсесь авась. – Те мекс сон монь истя? Мон, чай, аволь сонзэ кудонь столь лангсто кши кочом вешинь, государстванть кедьстэ кевкстнинь, а сон каршон оно мезе кепедсь...
Видьстэ меремс, бути а эйкакштнэ, Танянь пильгезэяк райцентрасонть а улевель. Семиянь весе стакачитнень бажась печтямс эсензэ вийсэ. Ансяк вана тейтерькатне... Икелень шкась седе шождаль. Вася мирдезэ важодсь вирьваныкс. Кизна кордонсо эрясть, тельня – велесэ. Ойнась зярдо сась, весемесь митялкут велявтсь, Танянь кучизь фермав, вазонь трямо, ансяк лезэденть семиянть туртов те кандсь аламо – колхозось важодемань кисэ, ловт, овсе эзь пандо. Эзть полавтово тевтне ниленьгемень котоце иестэнтькак, зярдо немецтнень лангсо изнямодонть мейле иеде ламо ютась. Кода икелеяк, истя нейгак, Сайгушонь кудосонть пенчтне-вакантнэ чуросто калдоргалесть. Кудазортнэ вачодо аштесть. Васенцекс лавшомсть эйкакштне. Анянень кемень топодсть, Веранень – кавксо – лиякс мерезь, самай касома шкаст. Сыненст ветексть-котоксть ярсамс эряви. Тень таркас паро, бути чизэнзэ тенст кавтошкань-кавтошка модамарть сатыть.
Сынсь тейтерькатне вадринеть касыть – а нернить, а вешить, весементь чарькодить, бажить лездамс. Онот, мелят састь кудов прясто пильгс рудазовт. Чамаст ашо-сэнть, а сельмест палозь палыть. Мейле ёвтызь кенярксчинь тувталонть – покш ломантнестэ кие-бути мерсь тенст, келя, кельмезь модамартнеяк ярсамс маштовить – човить ды крахмал эйстэст лиси. Ансяк ловось солась, сынь сайсть кукшинт ды адя велень эрицятнень тингест трокстнеме. Кукшинэнь кукшин кандсть. Седе мейле, тельня, таго ков-бути ёмасть. Часошкань ютазь Таня вансы – эйкакшонь салазкесэст мезть-бути ускить. Совавтызь юдмаст кудос, панжизь. Тосо ветешка килот сывель. Вай, кода патят-сазорт ацирьгадокшность-ризнэзевкшнесть, зярдо кармасть содамо – теяк, тонаяк тевест эзть лисе – модамартне уш кенерсть соламо ды наксадсть, сывелеськак эзь маштово. Фермасо кулось скал, колхозниктне керсизь сонзэ узересэ пельксэнь-пелькс ды ёртызь кардо удалов. Эйкакштне арсесть – сывелесь вадря ды вейке пакшонть пачтизь кудов.
Тедедень тунда тейтерькатне лавшомсть весемеде пек. Тень редизе аволь ансяк аваст, школасо тонавтыцясткак. Иван Петрович те недлястонть совсесь тенст ды мерсь, келя, Таня патяй, эйкакшот виест овсе прядовсть. Кода содат, минек школав молемстэ пандо пряв кузема. Ютазь пиземетнеде мейле кись рудазкадсь, нолажакс теевсь. Улкоть ванса – Анят-Верат, вейке омбоцентень лездазь, кузить-кузить верев – прыть. Стить – таго кузить. Овсе илыкест маштсть. Истя классов эль пачкодсть. Теде мейле кодат уш тосо тонавтнемат... Маринь, ламот аватне, конатнень эйкакшост войнасо тетяст чавовомадо мейле урозокс теевсть, райононь военной комиссаронтень энялдомо якасть. Пшкадть тензэ тонгак, паряк, кудонкак од олгсо вельтявтсы, сюрояк куш пондошка максовты. Сон кучинзе мирденек войнав, кадык ней куш мейсэяк лезды.
Кунсолызе Таня учителенть, кочкась тенень чи, мольсь комиссаронтень сюконямо, ды вана мезе тень эйстэ лиссь…
* * *
Комиссаронтень якамодо мейле омбоце чинь чокшнестэнть Сайгуштнень кенкшес вачкодсть, ды курок поровтонть трокс эскельдясь гимнастёркасо оршазь коськана рунго цёра. Те ульнесь Прокань Петя.
– Апак тердень инжеть нолдатадо? – келейстэ пейдезевсь совицясь.
– Ютак, ютак, Петя, – стясь каршонзо кудазоравась. – Озак икелев, столенть ваксс, ансяк вана каванямс а мезде.
– Вай, минекак теке тевесь – кудонть келес ве почткоморо, – стакасто лекстясь цёрась. – Маряви, сукстнэ-унжатнеяк вачочиденть кулость, а вана ломантне зярс эрить. Ней эрьга тевденть, конань коряс сынь. Шабрань аватне кортасть, келя, райононь прявтнэнь ёнов якить?
– Якинь, истя эйкакштнэнень лездыксэлинь, ансяк видечи эзинь муе. Те зярдо а пряс, а лангс, а потс тейтерькатнень, ловт, мезесткак арась. Варштавлитькак мейсэ якить! Начко шкане – сёксня, тунда карьсэ кувать а якават, сеске пильгеть лоподить. Мон тенст оно мезе теинь – картнень алов лаз пинеть керсинь. Неть лаз пинетнень эйкакштнэ картнес карькссэ сюлмасызь – истя котат лисить. Сынсь тейтерькатне конькакс лемдизь. Зярдо кудос эли тосо школас совить – неть «конькатнень» каясызь.
Юбка Анянень тетянзо кавто гимнастёркасто стынь. Гимнастёркатне ульнесть аволь вейке тюсонь, секс юбкась киксэнь кикс лиссь – верьксэзэ чопода, алксозо – седе валдо. Те оршамопелеськак ёмась. Тевесь вана мейсэ – кшинь пидемс почтонок арасть, секс савкшны сонзэ анокстамс модамарь марто пекше лопань човорявкссто. Аволь умок патят-сазорт якасть вирев лопань сезнеме. Седе покшось – Аня, кузсь чувто пряс, прась тосто ды юбканть чачк сезизе. Видьстэ мерезь, ней а содангак, мейсэ сонзэ оршамс.
Весемеде покш бедась-кажось – ярсамопелесь малавгак а сатны. Тень кувалма эйкакштне школавгак а пачколить – виест арасть... Тень коряс пшкалиньгак военной комиссаронтень. Паряк, арсинь, куш сурпряшка сюро максовты. Сон панимим, келя азе тестэ, тесэ кияк теть а лезды.
– Вай, Таня, содаса те ломаненть, Панкратов сонзэ фамилиязо. Ды аволь ансяк мон, весе районось содасы. Колоньгеменце иетнестэ сон пурнась эстензэ банда ды адя эрзятнень лангсо нарьгамо. Кие колхозс а сови – сень ледьсызь эли Сибирев паньсызь.
Весемеде кежеекс юткстост вана самай те комиссарось ульнесь. Вай, кодат дивань тевть сон тесэ ансяк эзь тейне! Вана вейкесь эйстэст.
Тумо велень промкссо вейке вадря цёра – Прокань Микита, серьгедсь каршонзо, келя, тынь зярдо народонь верень потямодо лоткатадо? Ды, мерят, мезе? Омбоце чистэнть Микитань муизь ульця ютксто чавозь. Тоначив сонзэ ильтямо чистэ калмо лангс весе велесь пурнавсь. Тосояк Панкратов эсь прянзо невтизе – зярдо Микитань калмонтень нолдызь, Панкратов таргизе маузерэнзэ ды зярыяксть ледсь кандолазтнэнь лангс. Вейке пулясь понгсь Галимень Иванонь пряс. Сон те шкане комась калмонть вельксэс мода коморонь ёртомо – тесэ вастызеяк куломанть – уй-лай прась Микитань кандолазтнэнь ваксс.
Тень кисэ те седейкельмевксэнть кияк эзизе пекста, эзизь сёвнояк. Мекевланк – верев кузтизь, военной комиссарокс теизь. Те таркасонтькак апаро ёрокчинзэ невтизе.
– Мекс апаро? Онот зяро ордент, медальть мештензэ лангс понгавтозь. Чай, корты, фронтсо ульнесь, воёвась.
– Кодамо сон фронто-ви-и-ик! Окоптнень эзинзе нейнеяк. Велетнева, колхозтнэва пурнась ярсамопельть, оршамопельть, ускинзе армияв, тосо покш штабтнесэ генералтнэнь марто симсь-ярсась ды тесэ весе «фронтозо» прядовсь. Истя ордентнэньгак, сюпавчинтькак добовизе. Арсят, весе ули-паронть армияв усксизе? Цётмар! Весементь кавтов явнызе – вейке улавонтъ – фронтов, омбоценть – эсензэ утомс. Секс вана те шкастонть, зярдо лият вачодо кулсить, сон теке бояр эри. Неик – чамазо теке скалонь пуярмо, коткудав ланганзо а кузеви. Теде башка, манчеме тонадсь. Кие а сови тензэ – эрьванень манчи. Тонеть а лездамонтень кодамояк тувтал мусь?
– Келя, мирдем аволь чавовсь, кулявтомо ёмась, секс а лездытькак. Паряк, ней сон француз, француз ава марто элякали, сюпавчисэ экшели…
– Мезть теть кортынь – несак, кода «мендямо» машты, мик эрзянь масторстояк француз мусь! Иля кеме тензэ, ве валозонзояк иля кеме!
Тень коряс вана мезе теть ёвтан. Вася мирдеть марто вейке дивизияс понгокшнынек. Ниленьгемень колмоце иестэнть минек полктненень макссть приказ печтямс Днепра леенть. Шожда меремс – «печтямс». Те леесь келейдеяк келей – малав Равонть келесэ. Уемс макссть тенек ансяк вишка плоткеть ды венчкеть. Ансяк сыргинек леенть тона чирев – немецтне кода кармить эйсэнек самолётсто бомбамо, пушкасто, пулемётсо леднеменек! Часошкань ютазь весе леесь – берёксто берёкс кулозь солдатто пешкедсь – ведьга уезевсть кементь тёжат рунгот. Марявсь, сетненень, кить мольсть мельганок, ней сэдьгак а эряви – прок чувто ланга ютак кулозтнень ланга ды сельгень прамс тона ёно улят...
Ней эрьга кортнетяно «чавовозь» ды «кулявтомо ёмазь» чарькодематнеде. Чавовозекс армиясо содат кинь ловсть? Се солдатонть эли тосо командирэнть, конань куломадо мейле зепестэнзэ документэнзэ таргизь ды кандызь штабов. Кинь документэнзэ эзизь муе ды штабов эзизь кандо – се лововсь «кулявтомо ёмазекс».
Истят арсематнень коряс лисни – весе сеть кементь тёжат солдаттнэ, офицертнэ, конат ваясть се чистэнть Днепрас – весе сынь «французт». Эдь весень сынст конёвост китькак зепестэст эзизь сае, ков эряви эзизь пачтя! Теде башка, войнань ниле иетнень перть зяро «Днепрат» ульне-е-есть! Тень мельсэ кирдезь, таго энялдан икелеть, Таня, комиссаронть ве пель валскак иля кеме!
Теньгак судозот чапик – минек кондятнэ прявтнэнень эрявкшныть ансяк паксясо, заводсо важодицякс, масторонь ванстыцякс, а вана энялдыцякс, лездамонь вешицякс а вечкевкшныть, секс тенст сюконякшномо иля яка. Бути стака теть карми – пшкадть малавикстнэнень, эсеть велень ломантненень. Сеть седе парсте лездыть, ды моньгак илямак стувтне. Мон ламос-мезес маштан – картькак кодан, кемтькак пандтнян, узерень кирдемеяк маштан. Вана ансяк пильгесь... Вай, атят-сэрдят, сеедьстэ сэредькшни, теде башка, овсе а витевкшны, ялатеке несак – чийнян! Секс тон, Таня, пшкалек, иля визде, мон сан! Миненек вейке омбоценень лездамс эряви, вай, кода эряви!..
Неть валтнэнь ёвтамодо мейле Петя икелень солдатось, ги-зэ-эрк, ги-зэ-эрк керш пильгензэ мельганзо ускозь, сыргась кудов.