Неть читнестэ МР-нь Пресс-центрасо пурназель промкс. Республикань журналисттнэнь марто вастовкшнось Мордовиява Россиянь Социальной фондонь Отделениянь управляющеесь Владимир Василькин. Ванновсть зярыя кевкстемат, башка мель явовсь СВО-нь участниктнень ды сынст семиятнень туртов лезксэнь явомань ёнкстнэнень.
Пандомат блокадной Ленинградонь
ванстыцятненень ды эрицятненень
2023 иень сентябрянь 19-це чистэ Россиянь Президентэсь сёрмадстсь Указ «За оборону Ленинграда» медальсэ эли «Жителю блокадного Ленинграда» знаксо казезтненень вешкань пандоматнень явомадо. Те сюлмавозь фашистэнь блокададонть Ленинградонть олякстомтомань 80 иетнень топодеманть марто. Вешкань пандоматнень покшолмась кемекстазь 50 тёжат целковойть. Сон максови Ленинградонь сеть блокадниктненень ды ванстыцятненень, конатне свалшкане эрить Россиясо, Латвиясо, Литвасо ды Эстониясо, истя жо Абхазиясо, Южной Осетиясо ды Приднестровьясо.
Мордовиясо истямо пандомась максневи весемезэ 12 ломаннень. Весе сынь казезь «Жителю блокадного Ленинграда» знаксонть. Ярмактне сыненст сыть декабрясто.
Социальной фондс пандоманть мельга пшкадемс а эряви, сон аравтови СФР-сэ улиця документтнэнь коряс.
СВО-нь участниктне ды сынст семиятне
Специальной военной операциянь боевой тевтнень участниктненень, инвалидтнэнень ды военнослужащейтненень Россиянь Социальной фондонть ёндо улить лезксэнь явомань зярыя ёнкст.
Эрьва ковонь пандоматне (ЕДВ)
СВО-нь участниктненень, конатненень максозь боевой тевтнень ветеранонь лемесь ды ули удостоверенияст, явовить эрьва ковонь пандомат, 3896 целковойть. Мордовиясо истят ломантнеде 803.
Истя жо эрьва ковонь пандомат улить Россиянь Геройтненень. Сонзэ покшолмазо 83 400 целковойть. Социальной фондось пандомо ушоды покш лементь максомадо мейле яволявтомавтомо.
Эрьва ковонь пандомат улить инвалидтнэнень (военной томбавоманть получазь) – 7081,49 целковойть.
Истя жо инвалидтнэнень максовкшны эрьва ковонь компенсация. Сон уш явозь группава: васенце группанть туртов – 21 922,12 целковойть, омбоце группанть – 10961,05 целковойть ды колмоце группанть – 4384,42 целковойть. Мордовиясо истямо компенсациясь максовкшны СВО-нь 11 участникнень.
Истя жо ЕДВ-сь пандови общей ормань коряс инвалидтнэнень.
Страховой пенсиясь
СВО-нь участниктнень улить льготаст гражданской пенсиятнень (СФР-нь ёнкссо) кемекстамсто. Истя, специальной военной операциясонть улемась стажс совавтови кавонькирда. Лиякс меремс, вейке иесь ловови кавтокс.
Теде башка, специальной военной операциясонть улеманть кисэ пандовить ламолгавтозь коэффициентт. Истя, СВО-нь таркатнесэ службанть ютамо шкань иенть кисэ максовить 3,6 пенсионной коэффициентт (лия военнослужащейтнень туртов, конатне службанть ютыть призывень коряс, сы шкань пенсиянтень явовить 1,8 коэффициентт).
Инвалидностень коряс пенсиясь
Кода сыречинь коряс пенсиянть кемекстамсто, инвалидностень коряс страховой пенсиянть эли социальной пенсиянть СВО-нь участниктненень Социальной фондось ладясы сестэ, бути тонась а получи пенсия силовой ды военной ведомстватнень пельде.
Те а токи ансяк доброволецтнэнь, конатне сёрмадстсть контракт. Инвалидностень коряс пенсиянть сыненст панды ансяк Социальной фондось.
Пенсиянть покшолмазо ашти инвалидностень группанть эйстэ: 1-це группась – 21 474,99 целковойть, 2-це группась – 17883,33 целковойть, 3-це группась – 12518,33 целковойть.
Инвалидностень коряс государственной пенсиянть покшолмазо касы, бути эсь олясо туицянть улить эйкакшонзо 18 иес ды 23 иес, бути эйкакшось тонавтни ВУЗ-со эли ССУЗ-со очной ёнксонь коряс.
Инвалидтнэнь
туртов реабилитациянь кедьёнкстнэ
СФР-сь, пенсиятнеде ды социальной пандоматнеде башка, СВО-нь участниктненень яви социальной лия лезкскак. Истя, военнослужащейтне, конатне спецоперациянть шкасто кармасть инвалидэкс, топавтовить реабилитациянь технической кедьёнкстнэсэ.
Сынст коряс весе информациясь ули СФР-нь официальной сайтсонть. Ломанентень эряви ансяк пшкадемс ды кандомс эрявикс документтнэнь. Тень мереви теемс Госуслугатнень порталонть вельде эли жо самс МФЦ-в.
Учётс аравтомадонть мейле кедьёнкстнэнь мереви рамамс колмо ёнкстнэнь вельде: каямс яволявтома СФР-с ды учомс сынст явоманть, рамамс эстеть, мейле получамс компенсация, сонзэ рамамсто нолдамс тевс электронной сертификатонть.
Лезкс СВО-нь участниктнень
семиятнень туртов
СВО-нь участниктнень семиятнень туртов эйкакштнень лангс пандоматне аравтовить мобилизованноенть доходонзо апак лово.
Невтемга, вешкань ды эрьва ковонь пандоматнень ладямсто васенце эйкакшонть чачомадо мейле а лововить сетнень доходост, кинь тердизь частичной мобилизациянть шкасто.
Теде башка, мобилизованноень семиянтень явови эрьва ковонь пандома военнослужащеень, конась юты служба призывень коряс, эйкакшонть лангс. Пандомась ладяви мобилизациянь чистэнть саезь вейке иес эли эйкакшонтень колмо иетнень топодемс.
2023 иестэ эйкакштненень пандоманть покшолмазо 15 548,07 целковойть.
Бути службас тердема шкастонть мобилизованноенть низэ ульнесь пешксесэ, семиянтень пандови вешкань лезкс. Сонзэ покшолмазо 36 278 целковойть.
Бути военнослужащеесь-доброволецэсь чавовсь эли кулявтомо ёмась, доватненень, тетятненень-аватненень пандови башка пенсия.
Юткошкань ютавтома центрат
пенсиясотнень туртов
Неень шкане Мордовиясо важодить кемзисемге центрат пенсионертнэнь юткошкаст ютавтоманть туртов.
«Центр общения старшего поколения» куротнень панжомась – Россиянь Социальной фондонь пилотной проект. Сон нолдави тевс зярыя регионтнэсэ, конатнень ютксо Мордовияськак. Проектэнть бажамокс ашти – «сырнень» иетнесэ ломантненень вастовомань ды кортнеманть туртов эрявикс условиятнень теемась ды сынст шкинемаст ды ёрокчист панжомга площадкатнень максомась.
Неть центратнесэ свалшкане ютавтовить вастовомат врачтнень, властень органтнэсэ важодицятнень марто, ловновить лекцият шумбрачинь ванстоманть коряс, ютавтовить шахматсо налксемань турнирт ды ламо лия мезе. Течинь чинтень весемезэ ютавтозь 740 ламо мероприятият.
Юлия Еремина
