«Доброделание» доброволецэнь курось ушодсь важодеме 2008 иестэ саезь. Сон панжовсь Мордовиянь православной од ломанень союзонть юрсо ды важоди Саранскоень ды Мордовиянь Владыканть Зиновиень лездамонзо вельде.
Те группась бажи лездамс весенень, кить понгсть зыянс, кодамояк стакачис ды учить лезкс. Сеедьстэ ломантне пшкалить, бути эрявить эйкакшонь лецямс ярмакт, сетне, кинень а мезде ярсамс. Покш мель явови сыре ломантненень. Волонтёронь курос совицятне яксить сыре ломанень ды инвалидэнь кудотнева, эйкакшонь кудотнева. Эрьва цетьверькстэ андыть кудовтомо ломантнень (истя жо максыть оршамопельть, лездыть теевтемс документэст).
– Минек вановтонок ало свал аштить 135 семият. Те – инвалидт, эйкакшт-инвалидт, ськамост эриця атинеть-бабинеть, ламо эйкакшонь триця семият, ават, кить ськамост трить эйкакшт, сетне, кить эрить нужачисэ. Теде башка, весе, кие пшкади, минь лездатано. Ськамост эриця сыре ломантне пек кецнить, сынь ёвтыть сюкпрянь валт, а кирдевить сельведест, мартост эряви кортамс ды кортамс. Валтнэде башка лездатано кудоютконь тевтнесэяк, – ёвтни «Доброделание» куронь прявтось Жанна Мишанина.
Курось важоди зярыя ёнксонь коряс: лавшосто неиця эйкакштненень ды сокор ломантненень теить тактильной книгат; ДЦП марто эйдетнень туртов ютавтнить «Уцяскав чи» акциянть; лездыть онкологиясо сэредиця эйдетненень (ютавтнить благотворительной марафонт ды ярмункат).
Паро тевень теемань куросонть малав ведьгемень активистт. Те – свал важодиця волонтёрт. Сынь интернетсэ кирдить группат, косо сёрмадыть-кевкстнить, кинень кодамо лезкс эряви, ды ёвтыть лиятненень. Эрьва чистэ пачтить лездамодо кулят. Аволь умок, саемга, витнезель-петнезель ськамонзо эйкашонь триця аванть нупалезэ.
«Доброделание» куронть ули гуманитарной складозояк. Сон ашти Красноармейская куронь 10-це кудосонть, А.С.Пушкин лемсэ парксо Успения Пресвятой Богородицы церькованть вакссо. Тей ломантне кандыть ярсамопельть, оршамопельть ды лия мезть. Сынь явшевить лиятненень.
Ней, зярдо масторсонок яки покш ормась, те курось полады важодеме. Сынь усксить ломантненень ярсамопельть, надобият, маскат, сурварьгат, дезинфекциянь кедьёнкст. Инечинь каршо ды сондензэ мейле «Доброделание» куронь волонтёртнэ явшесть кудова кулицят ды казнеть.
Татьяна Маторкина