А стувтомс эсь ундокстнэнь, косо бу аволинек уле – сехте эрявиксэсь эрьва ломаненть туртов, раськень историянь ледстнематнень ванстоманть туртов. Мордовиясо чачозетне свал явовсть раськень кеме сюлмотнесэ. Истя жо Крымсэяк пурназь Мордовиянь землячества. Тов совицятнень марто Симферопольсэ вастневсь Мордовиянь Прявтось Артём Здунов.
Эрьвась юткстост эсь шкасто туекшнесть тиринь республикасто, пачкодсть Крымев ды вейсэндявсть диаспорантень. Кой-конатне кармасть сонзэ участникекс аволь раськентень кандовоманть, а ёжомарямонть коряс. Ней сынь важодить эрьва кодат ёнкстнэнь коряс, ансяк кирдевить вейсэ, лездыть вейкест-вейкест туртов.
Артём Здунов сеске тешкстызе, сон ёвты сюкпря Мордовиянь диаспорантень совицятненень се сюлмонть кисэ, конань сынь лездыть кирдемс СВО-нь участниктнень марто: «Республикав отпусков сыця боецтнэ кортыть, сынст куш кодат энялдоматне топавтовить сеске. Сюкпря Пазонтень, Крымсэ ули минек землячестванок».
Мордовиянь диаспорантень совицятне ёвтнесть, мейсэ ды кода сынь эрить, кода ладяви вейсэнь тевтеемась од ломантнень марто, кода ветяви важодемась героической земляктнеде ледстнематнень ванстоманть коряс.
Кортамонть шкасто ёвтазельть зярыя эрявикс мельть-арсемат. Истя, Крымень Министратнень советэнь председателень полавтыцясь Михаил Назаров (икеле сон ульнесь МР-нь Следственной комитетэнь прявтокс) ёвтась мель максомс РФ-нь Героень лементь полковникентень Павел Максимович Ягуновнень – сон чачсь Чеберчино велесэ, маштовсь Ине Отечественной войнань иетнестэ Керчень оборонанть пингстэ.
Эштё вейке мелесь-арсемась токши Крымсэ свалшкане важодиця Мордовиянь землячествань ассоциациянь тееманть. 2007 иестэ саезь тесэ важоди эрзянь-мокшонь общества, конась вансты эрзянь-мокшонь раськень культуранть, вейсэнди земляктнень, терди од ломанть, лезды а ёмавтомс сюлмотнень историянь ундокстнэнь марто.
Севастопольсэ «Ялгат» эрзянь-мокшонь раськень-культурань обществань руководителесь, Атюрьевань райононь Кишалы велесэ чачозесь Николай Балашов ёвтась сюкпря Артём Здуновнень вастовомань анокстамонть кисэ ды тешкстызе земляктнень вейсэндявомань коряс важодемань эрявиксчинть.
Запорожской областень военно-гражданской администрациянь Культурань, спортонь ды туризмань министрась Радик Исякаев (икеле ульнесь Лямбирень райононь депутатокс) ёвтась мель Мелитопольсэ Феодор Ушаковонь часовнянть строямодо. Ёвтазель арсема полуостровсонть теемс Мордовиянь эрицятнень туртов шумбрачинь витемань центра. Тестэнь бизнес-сообществань представительтне тешкстызь Мордовиянь предпринимательтнень марто вейсэнь важодемань эрявиксчинть, ёвтасть анокчи топавтомс Крымсэ вейсэнь проектт.
Вастовомантень пурнавозтне ёвтасть сюкпря Артём Здуновнень раськень кевкстематненень мелень явоманть кисэ. МР-нь Прявтось кемевтсь, истямо кортамось а ули меельце, мекевлангт, Крымсэ диаспорань представительтнень марто кармить важодеме республикань ведомствань руководительтне. Теде башка, покш мель карми явовомо спецоперациянь участниктненень кода региононь властень органтнэнь пельде, истя жо землячестванть пельде.