Неть читнестэ чачома чинь юбилеензэ тешкстызе «Лайшема» ООО-нь прявтось, седеймариця ды весенень лездамо бажиця эрзянь авась Анастасия Николаевна Панькина. Мордовиясо сонзэ содыцянзо пек ламо. Анастасия Николаевнанень ламотне пшкалить лезкс мельга эрямосост сехте стака шкасто – малавиксэст куломсто.
Неень шкане прок стака он ледстнить Анастасия Николаевна ды сонзэ прявтсо коллективесь, зярдо масторсонок ульнесь «Ковид-19» стака ормась. Сестэ сонензэ аволь ансяк покш важодема савсь топавтомс, эштё ламо сэредицятнень вастомс ды стака шкасто оймавтомс, саемс эсензэ лангс весе сынст тевест.
Содазь, бути кундыть предпринимателень тевентень, конась сюлмавозь ломантненень услугань максоманть марто, сестэ эряви стувтомс оймсема читнень ды отпусконть. Ансяк седейшкава ды ломантнень мелест-арсемаст чарькодезь, тонь кармить ламо содыцят ды лезкс мельга теть сыцят. Лиякс те профессиясонть а кода.
Течи минек ловныцятненень пачтятано Анастасия Николаевна Панькинань эрямонь ды бизнесэнь ветямонь а шожда кидензэ.
Ламо эйкакшонь семиясо теитькак ламо
Анастасия Николаевна чачсь-кассь Покш Березникень райононь Чугур велень ламо эйкакшонь триця семиясо. Тетязо-авазо, Николай Николаевич ды Любовь Александровна Панькинтнэ, трясть-кастсть вете эйкакшт. Кудазорось ламо иень перть важодсь Калинин лемсэ колхозсо, Любовь Александровна одсто кундась строителень тевентень ды натой пингензэ алтызе, васень варштавкс лангс, цёрань а шожда роботантень. Виде, колхозсо важодицятнень коряс стройкасо сестэ пандстькак цють седе покш зарплата. Эдь эрявсь трямс-кастомс ды тонавтневтемс вете эйкакшт. Панькинтнэ тейсть весементь, штобу сынст эйкакштнень сельмест иляст сявадо ялгатнень лангс. Кудопотсост свал ульнесь сехте эрявиксэсь, лиясто мик содавикстнэ сакшность тенст ярмаконь займамо. Куш эрясть аволь сюпавсто, аваст, Любовь Александровна, весень марто маштсь ладямо ды стака шкасто куш кинень седейлембень каземе. Чугур велень сыре ломантне кортасть, те тейтерь-авасонть седе ламо обуцянь ёнкстнэ тетянзо – Александр Фёдоровичень пельде. Те алкуксонь, тевень вечкиця ломанесь ульнесь Анастасия Николаевнань покштязо, кинень савсь цидярдомс войнань толонть. Сон Ине Отечественной войнасо Смоленск ошонть ало пси тюрематнесэ маштовсь ды ёмась кулявтомо. Нинзэ туртов сестэ ульнесь ансяк 31 ие. Сонсь содась, зяро нужачи савсь печтямс сеть стака иетнестэ, ялатеке пря эзь нолда ды седеяк виевстэ важодсь кавтонь кисэ. Мирденень одс эзь лисе, куш саицянзо ульнесть, куломазонзо учось вечкевиксэнзэ. Паряк, ловныцятнень ютксто муеви истямояк, кие мери, эряви-арась течи теде ледстнемс? Койсэнек, эряви. Учёнойтне умок уш эйсэнек кемевтить, эрьва ломанентень ламось юты аволь ансяк тетянзо-аванзо, истя жо покштянзо-бабанзо раськензэ эйстэ. Анастасия Николаевнадо сёрмадовксонть ушодомсто минь а стяко ледстинек 90-це иетнень. Эдь сестэ кооперативень ды лия ёнксонь эсь тевень панжомо васняяк кармасть сеть, кинь раськесэ ульнесть кедьчелькев ломанть, кить эштё кезэрень шкатнестэ маштсть аволь ансяк эсь пряст трямо, истя жо лиятнененьгак тевень максомо. Истямокс кезэрень Чугур велесэ (сонензэ 400 ламо иеть) ульнесь Андрейкань (кудолемест) раськесь. Коллективизациянь стака иетнестэ сынст ули-парост саезель, таштавксост ламоль. Паряк, самай сеть обуцянь ёнкстнэ ютасть Панькинтнэнь васенце тейтерентень Анастасиянень.
Школасо сон тонавтнесь парсте, вечкевикс предметэзэ ульнесь математикась.
70-це иетнестэ школасо тонавтницятнень ютксто аламот кить тукшность специальностес тонавтнеме ве ёнов. Виде, ней стака толковамс, мезе сестэ кармавтызе Анастасия Панькинань, эштё овсе од тейтерьканть, туемс Инсар ошов медучилищасо тонавтнеме. Паряк, седе курок покшокс улемс ды ушодомс тетянзо-аванзо туртов семиясост ламо эйкакштнень трямсто-кастомсто лездамо мелесь эли невтемс прянть лиятнень ёнов а молицякс…
Кенери эрьва тевс
Нама, Инсарсо медучилищасо тонавтнемань иетне ламо макссть Анастасия Панькинанень. Те ульнесь алкуксонь школакс, кода эряви ветямс прянть ялгатнень, тонавтыцятнень ды сиведезь квартирасо эрямсто кудазораванть марто. Ней уш ламо кементь иетнень ютазьгак тень кисэ путови тензэ «вете». Те сень мельс саезь: кинь марто тонавтнесь, те шкас кирди ояксчинь сюлмот, ламо иес тонавтыцянзо кадовсть превспутыцякс ды кинь кедьсэ эрясь квартирасо – мелявтсть кисэнзэ прок тиринь тейтерензэ кис.
Медучилищанть прядомадо мейле од специалистэсь А.Н. Панькина ушодсь важодеме специальностень коряс Саранскоень 4№ больницясо, шкань ютазь тонавтнеманзо поладызе Н.П. Огарёв лемсэ МГУ-нь химиянь ды биологиянь факультетсэ. Паряк, те шкас бу поладоволь медицинасо важодеманть, бути масторонть туртов авольть са стака иетне. Медицинасо, кода лия сфератнесэяк, допрок лоткакшность зарплатань пандомадо. Анастасия Николаевна васня ушодсь ломантненень сехте эрявиксэнь тееме – стамо, эдь лавкань лавсятне сестэ тунь чавольть. Теке шкасто кундась истямо а шожда тевентень, кода ритуальной услугатнень топавтомо, сонзэ, кода тевензэ парсте содыцянть, кочкизь «Лайшема» МУП-нь прявтокс. Шкань ютазь Саранскойсэ ды кода весе Мордовиясонтькак сон васенцекс 2001 иестэ панжсь меельце килангов ильтямонь предприятия.
Сынь лездыть стака шкасто
Виде, ламо вийть, содамочить эрявсь путомс те а шожда тевенть ушодомсто. Эдь сыненст ломантне сыть пшкадема марто эрямосост сехте стака шкасто – малавиксэст куломсто. Покш седейризкстэнть башка, ломаненть лангс сеске прыть ламо мелявкст, конат теемат вейке-кавто чинь перть. Самай те шкастонть А. Н. Панькина саи эсензэ лангс сехте ламо тевтнень, конатнень вейсэ важодицянзо марто топавты шкастонзо ды тевень содазь.
Сонзэ марто важодицятнеде аволь пек ламо, кеменьшка ломанть, эрить ояксчисэ, бути эряви, вейкест-вейкест полавтыть. Эсест лангс саить пек ламо ответственной тевть: кулозенть шлямосто-оршамосто саезь (бути эряви, чачонтькак мазылгавтсызь) модапотс валямос ды весе лия мелявкстнэнь, конат эрявить теемс истямо стака шкасто.
Валентина Юдина
– Анастасия Николаевна Панькина марто теевинь содавиксэкс малав ведьгемень иеде икеле. Весе те шканть перть минь паро ялгат. Анастасия Николаевна, кода монгак, важодемань пингензэ истя жо ушодызе медицинасто. Медучилищанть прядомадо мейле сон важодсь Саранск ошонь 4№ больницянь реанимациянь отделениясо. Текень лангс эзь лотка, теде мейле эштё тонавтнесь Н. П. Огарёв лемсэ МГУ-нь химиянь ды биологиянь факультетсэ. Весе неть содамочитне тензэ маштовить неень шкань профессиясонзо.
Те ломанесь панжадо седей, валдо ойме, сон свал анок лездамс аволь ансяк малавиксэнзэ, весень туртов. Эрямосонзо эрьва кодат шкат ульнесть, сон весе цидярдынзе ды зярдояк кинь лангскак а пеняци. Юбилеензэ коряс арсян тензэ кеме шумбрачи, уцяска, кадык а полавтови, кадови истямо жо ламонь тееме кенерицякс, чевте седей авакс.
Анастасия Панькина – вечкиця ни, мелявтыця ава ды сырькай, кинь семиясо вете нуцькат.
Маргарита Николаевна Сухарева, «Центр репродуктивного здоровья» клиникань прявт.
– Неть читнестэ минь ёвтатано поздоровт Анастасия Николаевна Панькинань лемс чачома чинь юбилеензэ кувалма. Панькинтнэнь раськесэ ды семиясо сон – покш кемеманок, эрьва тевсэ весенень лездыцянок, свал минек вейсэндицянок ды паро превень максыцянок.
Видькстатано, неень шкане аволь весе семиятне истямо покш ояксчисэ эрить. Минек Настя жо весе ялакстнэнь ды сазоронзо туртов лездась важодема таркань муеме, семиясо ояксчинть ладямо ды вандынь чинтень кемеме тонавтомо. Сон аванзо кис мелявтыця тейтерь, кемевикс ни мирдензэ туртов. Кадык весе се парось, конань сон теи минек туртов, сядоксть велявты эстензэ, кадык парсте молить тевензэ важодема таркасо, кадык Пазось максы тензэ шожда ды кувака пинге.
Паронь арсезь, Панькинтнэнь, Бояркинтнэнь,
Исайкинтнэнь семиятне.