Аволь умок Кочкурбуень Семилей веленть эйстэ аволь васоло панжовсь «Карнай» оймсема таркась. Теицязо-азорозо те тарканть – «Норов» агрофирмась.
Весть «Норов» агрофирмань прявтонть А. И. Поздняков марто кортамсто маринь пельдензэ: келя, шержейгадынь уш, а вана эрямонтень эзия полавто эсень вановтом. Кода од шкаваяк, нейгак арсян истя: свал эряви мазылгавтомс пертьпельксэнть. Ломаньсэ. Тевсэ. Цецясо. Весе эрямосот. Келя, ней ламот лиякс тонадсть арсеме – а вана монь мелем эзь полавтово. А эряви учнемс, ёвты тень кис кияк теть сюкпря эли а ёвты. Тонь теветь – теемс мазычинть.
Вельть уш тусть мелезэнь неть валтнэ. Сон, Александр Ильич, алкукскак истя эри – мазылгавты эсензэ кудочинзэ, мазылгавты Семилей велензэ, мазылгавты «Норовонть». Вана ансяк вейке покш тевдензэ ёвтнян. Аволь умок велень од куншкакуронтень стявтсь минек масторонь ине ванстыцятнень туртов покш монумент. Сон сэрей таркасо, ве ёндо ванат – теке мерят, менельс кепети. Монументэнть перька цецят, чувтынеть озавтнезь. Сынь зярс эзть виеме – ансяк зярыя иень ютазь тесэ ули мазыйдеяк мазый вирьбуло.
Карнай сёлтонть перька мазычинь тарканть теемаськак – неть сонзэ мельтнень-арсематнень седейшкава тевс совавтомась. Кувать арсесь тень лангсо, яла вешнесь кить-янт, кода весементь теемс седе превейстэ ды лезэвстэ. Лия таркаваяк ней уш улить истят оймсема таркат. А вана Карнаесь, монень маряви, аламо шкань ютазь сехте мазыекс карми сынст ютксо. Эрькесь покш, таркась перьканзо – секень вант, сельмсэ а саеви. Вана касыть чувтынетне... А уш сэднеть-кудынеть тейнезь. Тейнезь кеместэ-парсте, кода вечки тееме сонсь Александр Ильич. Илязо уле весе те ансяк ланга-прявань невтемакс – куватьс эрязо, кеняркст кандозо ломантненень!
Васенце кенярксось – эстензэ теицянстэнь! Ды теевсь парсте!
Весе лия кеняркстнэ – ломантненень! Садо! Оймседе! Укшнодо! Кундседе калт! Чийнеде-налкседе! Коштось тесэ тантей – цецянь чине!
Карнаесь – Мордовиянь сехте покш сёлттнэстэ вейкесь, покшолмазо – 816,5 кв. км, эйсэнзэ ведтенть – 7,57 млн кубометрат.
Ледстяса, мейстэ весемесь ушодовкшнось. Карнаесь сатотсь Семилеентень (сонзэ модатнень лангсо сёлтось) советэнь шкатнестэ тейневиця мелиорациянь важодематнеде мейле – чувсть сёлт, косто валность паксятнень. Те ульнесь 1980-це иетнестэ. Ютасть шкат – сёлтось кувать кадновсь азортомокс.
Сёлтонть лемезэ Карнай лейненть лементь эйстэ, кона саи ушодкс маласо виртнестэ. Тюркань кельтнестэ валось ютавтови истя: лейсэ домка тарка. Келя, ульнесь мараля, лемезэль Карнай. Сон сокась, видсь, мейле сизесь, сяворсь оймсеме ды матедевсь. Кувать удось маралясь – алкуксонь маралянь удомасо. Модась алонзо пек лепштявсь, ды те таркантень кармась пурнавомо покш ведь ванькс вишка лейнетнестэ. Вана кода эрзянь ломантне арсевтизь-полализь те тарканть лемензэ! Кие соды, истя-а истя те ульнесь? Вейкесь ванстовсь течинь чис седикелень шкатнестэ – сёлтонть лемезэ. Ды ведесь. Карнай сёлтось.
Кода уш меринь, тесэ улить уш зярыя кудынеть, икелепелев арсеви сынст пек седе ламолгавтомс. Оймсема таркасонть ули микшнема кудояк. Тосо ярсамопельть, оймсемантень весе эрявиксэсь. А уш ярсамопельтне кодат тантейть! Весе «Норовсто»! Ушодса мороженойстэнть, конань минськак рамсинек. Содан, «Норовонь» мороженоесь тантейдеяк тантей! Мороженойденть башка – колбасат, сывель, ловсот-топот, велькс ды ламо-ламо мезе – весе тряви-кастови ды тееви «Норовсо»!
Кинь ули мелезэ – кадык сонсь кундси сёлтсто калт, кинь арась мелезэ кундсемс – улить уш анок кундазь. Ули мелеть – тонсь пидек калонь ям, арась истямо мелеть – пидить теть ды каванятадызь!
Икелепелев арсеви теемс тесэ спортонь площадкат, ламо мезе лияяк. Истя, сонсь Александр Ильич Поздняков арси те тарканть вакссо теемс зоопарконь кондямо. Мерян: чинесь аволь оймсема таркань тосто карми молеме. Сон пейди каршон: «Бути весементь парсте урядамс – кодамояк чине а ули».
Карми улеме баняяк. Ведьс кирякстнема тарка. Чувтот, куракшт, цецят...
Весе тесэ ансяк-ансяк ушодови. Сы кизэстэнть ламот уш сыть тей оймсеме. Ды аволь ансяк кизна – эдь калонь кундсемась а лоткси иень перть. Тесэ ули косо удомс, косо пидемс эстеть ярсамопель.
Килангось тов уш теезь, шкань ютазь сон седеяк паролгавтови.
Ансяк вана минек обуцятнень витемс эряви седе ламо шка. Пек паро улевель, бути весе, кить сакшныть Карнаев оймсеме, мелявтовольть те мазычинть ванстомадо! А тейневельть шукшпрят, авольть ардтне паксянь трокс. Тедеяк арсемс савкшны оймсема тарканть теицянтень ды азоронтень. Секс путневить пирявкст – иляст ардтне кува а эряви. Лия масторсо истя а тейнить – а вана минек ломантне апак тонавто ванстомо эсест пертьпельксэнть, таркатнень, косо эрить ды оймсить. Вана савкшныяк сынст тонавтомс.
Истя вана арсевтеви ды топавтови велень туризмадо тевесь. Кадык эйкакштне, конат кармить сакшномо тей тетяст-аваст марто, кармить содамо, косто саевить ловсось, сывелесь, алтнэ, кода касы сюрось, кода кенерить эмежтне...
Тамара Баргова