«Чавтан!..» – пижнесь, пеельсэ ахолязь, цёрась, сон ульнесь иредезь. Истя тандавтнесь нинзэ, кона Саранскойсэ важодсь троллейбуссо кондукторокс. Кудазорось симсь меельце шкане апак лотксе, ветясь прянзо пек беряньстэ. Дознавателенть кармавтоманзо коряс зыянонь кандыцянть арестовизь. Те зыянось лиссь 21 иеде икеле ды ульнесь васенце тевекс дознавателенть Александр Захаровонь важодемасонзо.
Цёрась чачсь Мордовиянь Дубёнкань райононь Кобалесэ, служась армиясо, тонавтнесь Н.П. Огарёв лемсэ МГУ-со инженерэкс-механикекс. Внутренней тевень органтнэсэ служамо сась 26 иесэ. Иень перть сон важодсь Саранск ошонь Пролетарской РОВД-нь милициянь участковой уполномоченноекс. 1998 иень августсто аравтозель дознавателень тевень топавтыцякс. Се шкастонть саезь полициянь подполковникесь Александр Николаевич Захаров важоди дознаниянь подразделениятнесэ. Од таркасо важодемстэ васенце ковонь перть прядынзе уголовной вете тевтнень ванкшноманть ды максынзе ванномс судс. Вете иень ютазь од ломанесь ладязель те подразделениянь ветицякс, кона кармась невтевкстнэнь коряс республикасо сехте паро подразделениякс.
«Отделениянь дознавательтне эзть кола уголовной тевтнень ванномань шканть, конат кемекстазь РФ-нь Уголовно-процессуальной кодекссэ, – ледстни Александр Николаевич. – Тевтне ваннозельть пштистэ ды парсте: прокурортнэ уголовной тевтнень зярдояк эзть велявтне мекев ванномс, судтнэ а чумондомань приговорт эзть максне».
Зярыя шкань ютазь Александр Николаевич ютавтозель Мордовия Республикава МВД-нь дознаниянь организациянь отделс. Ней сон – зональной контролень отделениянь прявт. Истя, киртявсть апак панжо преступлениятне, региононь территориальной органтнэнь важодицятнень ютксо ветяви вейсэнь важодема.
Александр Николаевич свал тонавтни, ванны лия регионтнэнь важодемань од ёнкстнэнь, весе содамочитнень тевс нолды важодемасонзо. Сонзэ роботанзо вельде Мордовия Республикава МВД-нть меельце иетнень перть паро невтевксэнзэ уголовной тевтнень шкастонзо ванноманть коряс. Дознаниянь подразделениятнень важодемань вейсэнь невтевкстнэнь коряс 2019 иестэ МР-ва МВД-сь аштесь котоце таркасо РФ-нь субъекттнэнь ютксо ды васенце таркасо – Равчирень федеральной округонь истямо жо подразделениятнень ютксо.
Тень пингстэ Александр Николаевичень улить ламо лия вечкевикс тевензэ. Полициянь подполковникесь вечки семиянзо марто ардтнеме лия ошка, ванномо мазый таркатнень, тукшны мелезэнзэ калонь кундсемась, пангонь кочкамось. Юткошкасто ловны рузонь ды омбо масторонь литературань классиктнень произведенияст. Сонськак сёрмады эрзянь кельсэ ёвтнемат. Произведениянзо лиснесть «Сятко» ды «Чилисема» журналтнэсэ. 2015 иестэ сон казевсь Илья Девин лемсэ литературань премиясо. Ёвтнеманзо лиснесть Мордовиянь од сёрмадыцятнень вейсэнь пусмосо.
Весе тевсэнзэ, од мельтнесэ-бажамотнесэ сонензэ лездыть Наталья Александровна низэ ды Александр цёразо, кона арси туемс тетянзо киява. Сы иестэ прядсы юристэкс тонавтнеманть. Армиясо служамодо мейле бажи важодемс кода тетязо, полициясо.
Анокстызе Татьяна Маторкина
Фотось Сергей Титовонь