Течи Эрзянь ды мокшонь национальной драматической театрасо ютась кенярксчинь вастовома, кона алтавсь Авань раськеютконь чинтень. Промксонть пурнызе «Союз женщин России» весероссиянь вейсэндявксонь минек ёнксонь отделениясь. Те чистэнть аватнень лемс ёвтазельть ламо лембе валт. Вейс пурнавкшность Союзонтень совицятне, райононь авань советэнь ветицятне. Весе эсь таркасост топавтыть покш тевть, ютавтыть эрьва кодат вастовомат.

– 2024 иесь яволявтозь Семиянь иекс. Минек учить лезэнь кандыця тевть. Васняяк, эрявить ванстомс семиятнень, ванстомс эсенек койтнень-кирдатнень, семиянь питнейчитнень. Кода свал, кармить ютамо семиянь конкурст. Республикань этапонь изницятне кучовить ёрокчист невтеме Весероссиянь пелькстамосо. 2023 иесь тень коряс сюпаволь. Исайкинтнэнь семиясо трявить-кастовить 10 эйкакшт. Аваст казевсь «Мать-героиня» лемсэ. Кото семият казевсть «Родительская слава» орденсэ, – пачтясь МР-нь Социальной ванстомань, трудонь ды занятостень министрань полавтыцясь С. И. Шувалова.

Лембе валт истя жо ёвтась «Союз женщин России» весероссиянь вейсэндявксонь минек ёнксонь отделениянь прявтось О. В. Игнатова.
Союзонтень совицятне, авань советэнь прявттнэ (Саранскоень ды районтнэнь) казевсть «Союз женщин России» вейсэндявксонть пельде памятной медальсэ. Казезтнень ютксо Елена Абрамовна Догадкина. Сон сась Покш Березникбуестэ. Важоди Ростелекомонь «Чамзинка» сервисной центрасо абоненттнэнь марто важодемаст коряс мастерэкс (Покш Березникень участкасо). Чачсь Архангельской областьстэ. Школань прядомадо мейле тонавтнесь связень техникумсо. Тей понгсь кучомань коряс 1988 иестэ. Лиссь мирденень ды кадовсь эрямо теске. Мирдензэ марто чачтсть кавто эйкакшт. Прядызе Самарань связень академиянть. Елена Абрамовна сови эсензэ районсо авань союзонтень.