Мордовиянь эрицятне поладыть лездамо минек цёратненень, конатне примить участия специальной военной операциясонть. Минек газетань лопатнесэ аволь весть ёвтневсь, кода школасо тонавтницятне, студенттнэ, предприятиятнень ды организациятнень важодицятне, пенсионертнэ ды весе сеть, кить мелявтыть эсь масторонть кисэ, путыть эсь виест вейсэнь тевентень – пурныть гуманитарной лезкс, рамить эрявиксэнть, кодыть-сюлмить кекшема сетть, кодыть лембе носкат ды стыть оршамот.
Тундонть самонзо марто боецтнэнь туртов эрявить кекшема сеткат, конат ладить пертьпельксэнтень. Теньсэ истя жо анокт лездамс республикань кедьчелькев аватнеяк. Истят улить Орданьбуесэ. Неть читнестэ минь вастовинек неть ёроков аватнень марто, кортынек СВО-нь участниктненень сынст лезкстэнть ды кекшемань сеттнень кодамонь маштомачитнеде.
Людмила Викторовна Ерошкина чачсь-кассь Мордовиянь Ицялонь районсо. Школадо мейле прядызе Нижней Новгородонь Вирень хозяйствань институтонть. 1985 иестэ направлениянь коряс кучизь Орданьбуень райононь Лесозавод посёлкав. Ды авась теске кадовськак.
Эряви меремс, Людмила Викторовна – ламо эйкакшонь триця ава. Ерошкинтнэнь семиясо эйкакштнеде кассть вете. Ней эштё кенярдовтыть кото нуцькат. Ансяк кудосо аштемс мель ялатеке арась. Кода корты сонсь авась, зярс улить вийть, эряви роботамс, котьмамс вечкевикс ды эрявикс тевсэ, лездамс лиятненень.
Орданьбуень районсо СВО-нь участниктнень туртов кекшема сеттнень кодамонь-сюлмамонь коряс куронть панжизе ды вети райононь ДК-нть юрсо Декоративно-прикладной искусствань отделэнь руководителесь Людмила Викторовна Ерошкина. Кундамс те тевентень аванть кияк эзизе кармавто. Ушодсь сонсь ды аламонь-аламонь эсь перьканзо пурнынзе лиятнень.
– Тевентень кундынек малав сеске, кода минек республикасто саизь мобилизованнойтнень васенце группанть, – корты Людмила Ерошкина. – Нама, ушодынек аволь сеттнень кодамостонть. Васняяк кодынек понань носкат. Эйстэдест цёратненень кучинек 120 парат. Те тевсэнть миненек пек лездась Лесозавод посёлкань эрицясь Любовь Фёдоровна Тараканова. Сон кодась малав 40 парат. Тургеневань аватне Татьяна Викторовна Ереминань прявтсо кодасть 30 парат. Мейле стынек нардамот, пракстат. «Шумбрат, Мордовия!» фестиваленть шкасто лиятнень пельде маринь сеттнень кодамодонть. Ардынь Саранскоев, вешния офисэнть, косо те тевсэнть котьмить, ды теевинь содавиксэкс организаторонть марто. Республикасонок сонзэ весе содасызь кода «Наталья-Z-сеть». Наталья весементень тонавтымим, мартон макссь сеттнень кодамонть-сюлмамонть туртов эрявиксэнть – панкскеть, ашо карькс.
Самай те ашо карьксэсь ашти юрокс, конантень сюлмсевить панкскетне. Нама, Саранскойстэ эрявикс материалось свал а кучневи, ансяк тень коряс мелявкст арасть. Ламосо лездыть райононь эрицятне. Кода мерсь Людмила Ерошкина, Интернетсэ эсь социальной сеттнесэ сон а кенери путомс пшкадема, вант, уш сыненст эскелить ломанть куш кодамо коцт ды панкске марто.
– Минек куронть юрс совицятнестэ седе ламотне – райононь Ветеранонь советэнь члентнэ. Мартон васенце ушодыцякс ульнесь Ветеранонь советэнь председателесь Мария Григорьевна Аппанина. Сон содавтымимгак лиятнень марто, конатнень ютксо Нина Викторовна Новикова. Цёразо – военной, ней СВО-со. Аволь умок лия военнослужащейтнень марто сакшнось отпусков. Истя жо тесэ Антонина Александровна Кудашкина, Антонина Николаевна Волгушкина, Анна Ивановна Татаринова (цёразо истя жо офицер), Вера Михайловна Дубинкина, Татьяна Павловна Новикова, Татьяна Фёдоровна Сербул, Татьяна Владимировна Конева, Ирина Вениаминовна Пестова, Елена Кузьминична Гулюшова, Любовь Владимировна Кириллова, Вера Дмитриевна Ларина, Вера Макеева.
Пек лезды тенек Зинаида Алексеевна Забелина. Сон весементь теи куроксто ды маштозь, кадык тензэ уш 83 иеть. Лиясто пурнавкшныть кеменьшка ломанть, лиясто седе аламо. Кинь шказо пры, се сы мартонок лездамо. Лиятне жо весе тевест кадсызь, ошонть лия песэ эрить, ялатеке сакшныть. Неть ломантне бажить куш мейсэяк лездамс изнямонть малавгавтомга, – мерсь Людмила Викторовна.
Эряви меремс, эрьва теевксэнть Людмила Ерошкина снимасы телефонс ды кучсы республикасонть те тевенть ветицянтень Натальянень. Тонась ванносы ды, бути мезе а истя, мери витемс. Ды аватне весементь тейсызь эрявикс вешематнень коряс.
Течинь чинтень аватне кодасть-сюлмасть 60 сетть, эйстэст 49-тне уш кучозь передовойс. Вейке сетенть кувалмозо 3 метрат, сэрьс 2 метрат. Вейке чис Орданьбуень аватне эйстэдест теить зярдо вейке, зярдо вейке пель марто.
– Кода уш икеле ёвтынь, сеттнень кодамонть туртов ламо материал кандыть эрицятне. Ансяк вана сынь аволь весе содыть, кодамо тюсонь коцтось маштови тень туртов. Минь эдь весе сеттнень тейтяно истямо тюсонь, конась малавикс тосонь пертьпельксэнтень. Тельня неть тюстнэ ульнесть ашо марто, сёксня сёрмав марто тюжат, тунда таго лият теема, – корты Людмила Викторовна. – Вейке сыре авась малав весе коцтонзо кандынзе, а сынь эрьва кодамо тюсонь, мазыйть. Нама, сетень тееманть туртов эзть маштово. Ансяк арсинек-кортынек ды стынек цёратнень туртов алга оршамопельть. Вера Ларина ды Елена Агейкина те тевенть теизь вадрясто ды куроксто.
Эряви меремс, неть оршамопельтне кепедизь мельёжост СВО-нь цёратненьгак, кинень кучозельть посылкатне. Аволь умок аватненень инжекс сакшнось Редкодубьянь цёрась, конась ней СВО-нь таркатнесэ, ды ёвтнесь те посылканть самодо. Цёрась пачтясь, кучовксонть панжомсто сынь тосто редясть мезе-бути ламо тюсонь ды мазый. Арсезевсть, те мезе тенст кучсть? Зярдо жо калавтнизь тапарявксонть, неизь ламо тюсонь алга оршамопельтнень. Кучовксось ульнесь эрявикс. Эряви меремс, течинь чинтень аватне уш пурнасть малав 30 посылкат.
– Цёратнень пельде сюкпрянь валт минек лемс сакшныть ламо. Вана овсе неть читнестэ тенек совсесь эсенек райононь мобилизованноесь, конась ней сась отпусков. Минь сонензэ казинек кекшемань кавто сетть ды весе эрявиксэнть марто посылка. Икеле недлястонть истя жо совсесь отпускс сазь СВО-нь участник. Сась лезксэнть кисэ сюкпрянь ёвтамо каванямка марто. Кортнинек мартонзо, аламодо сельведтькак правтынек. Эдь минек кой-кона аватнень цёраст эли малавиксэст-содавиксэст тосот. Специальной военной операциянть эйстэ ве ёно течи кияк а ашти. Веенст минек масторонть кисэ аштить тосо, лиятне изнямонть малавгавтомга весементь теить тесэ. Те минек вейсэнь тев. Ды лездамо карматано, зярс эряви! – кемекстась Людмила Ерошкина.
Эряви меремс, Орданьбуень аватнень теевть кекшемань сеттне лиятнень ёнов а молицят. Эрьвась эйстэст кодазь-сюлмазь Пазонтень ознома марто. Кемтяно, те лезды минек цёратненень! Изнямось карми минек марто!
Юлия Еремина