АВГУСТОНЬ 5-це ЧИСТЭ САРАНСКОЙСЭ ЮТАВТОВСЬ «ГЕРОЙТНЕНЬ ШКА» («ВРЕМЯ ГЕРОЕВ») РАСЬКЕНЬ ВАСЕНЦЕ ПРЕМИЯНЬ ТОРЖЕСТВЕННОЙ ПРОМКСОСЬ, КОНАСЬ АЛТАЗЕЛЬ ИНЕ АДМИРАЛОНТЬ, ИНЕВАНЬКС ПРАВЕДНОЙ ВОИНЭНТЬ ФЕОДОР УШАКОВОНЬ КАНОНИЗАЦИЯНЬ 21-це ИЕНТЕНЬ. КЕНЯРКСЧИНЬ ПРОМКССОНТЬ УЛЬНЕСЬ РЕСПУБЛИКАНЬ ПРЯВТОСЬ АРТЁМ ЗДУНОВ.
«ПОДВИГ» КОМАНДАНЬ СПЕЦПРОЕКТЭСЬ НЕВТЕЗЕЛЬ КУЛЬТУРАНЬ УШОДКСТНЭНЬ ПРЕЗИДЕНТЭНЬ ФОНДОНЬ КОЛМОЦЕ ПЕЛЬКСТАМОСОНТЬ ДЫ СОНЕНЗЭ ЯВОЗЕЛЬ ГРАНТОНЬ ЛЕЗКС. «ВРЕМЯ ГЕРОЕВ» ПРЕМИЯСЬ КАРМАСЬ ЛОМАНТНЕНЬ ДУХОВНО-НРАВСТВЕННОЙ ПИТНЕЙЧИТНЕНЬ ТЕШКСЭКС.
Яволявтоматнень каямонь ушодовомадонть мейле зярыя читнень перть састь 500 ламо ёвтнемат Мордовиясо чачозь сеть ломантнеде, конатне идизь кинь-бути эрямост, алтызь эсь пряст ломантнень туртов пек эрявикс профессиянтень, од ломантнень кастомантень-тонавтомантень, эли зооволонтёрствантень, социальной важодемантень. Седейс токиця ёвтнематнень кисэ вайгелест максызь 380 тёжадо ламо ломанть. Геройтнень кочкизь вайгельтнень максомань ды экспертэнь советэнь мелест-вановтост коряс.
«Течи, Иневанькс праведной воинэнть Феодор Ушаковонь чистэ, минь ютавттано пек эрявикс мероприятия Мордовиянть ды Россиянть туртов. Масторонь Президентэнть Владимир Владимирович Путинэнь, Культурань ушодкстнэнь фондонть лезксэст вельде миненек мереви теемс те проектэнть национальнойкс», – мерсь Артём Здунов ды покш сюкпря ёвтась Мордовиянь эрицятнень пельде Президентэнтень истят проекттнэнень лездамонть кисэ.
Сон тешкстызе, премиянь участниктнестэ эрьвась невтизе эсь прянзо героекс. «Минек республикасонть минь кирдтяно каштанчи промышленниктнень, врачтнень, тонавтыцятнень кувалма. Эряви ваномс сынст лангс, бажамс паронтень. Бути ломанесь мелень явиця – сон свал муи эстензэ виде ки, венти кедь. Минек ламо вадря ломаненек, минь – вадря ёнксонть ёно!» – тешкстызе республикань Прявтось.
Сюкпрянь валт ёвтазельть анокстыцятнень-ютавтыцятнень ды весень лемс, кить кирдизь проектэнть, Мордовиянь предпринимательтненень ды МР-нь Промышленниктнень ды предпринимательтнень вейсэндявксонь председателентень Виктор Бирюковнень, кона ёвтась мель эрьва иестэ ютавтомс премиянть республикасонть, кемевтсь, бизнесэсь карми лездамо.
Мордовиянь Прявтось истя жо макссь Славань II степенень орден Россиянь Героентень, Мордовиянь Госсобраниянь депутатонтень, минек республикасо чачозентень Владимир Дежуровнень. Лётчикесь-космонавтось ёвтась сюкпря покш награданть кисэ: «Служан Россиянтень!» ды арсесь тиринь Мордовиянтень касома-кепетема.
Мордовиянь геройтненень статуэткатнень ды дипломтнень явшемань церемониядонть икеле раськень премиянь руководителесь Денис Шапкарин ёвтызе проектэнь смустенть неть валтнэсэ: «Минь эрятано аволь шожда шкасто – геройтнень шкасто!»
«Герой по призванию. Огнеборец» – васенце номинациясонть изницякс кармась профессиональной идицясь Александр Безбородов. Сон идесь Саранскойсэ палыця ламо этажсо кудостонть кавто ковсо эйде марто ава. Призваниянь коряс героекс кармась Антон Макаров. Василий Мартынов, кона идизе вете ковонь эйденть, конань тандавтнесь ёртомс вальмасто тетязо, кармась «Правопорядкань героекс». «Герои мира» номинациясонть изнясь Равиль Халиков, республикасонть чачозесь, ДНР-нь Героесь.
Медицинань героекс кармасть: «Од профессионал» номинациясонть – Республикань инфекционной клинической больницянь анестезиологось-реаниматологось Константин Жирнов, «Сырнень кедть» номинациясонть – региононь 1-це № сосудистой центрань врачось, кона теи пряудемень операцият, Алексей Ховряков, «Ламо иень опыт» номинациясонть – Мордовиянь прявт хирургось, кардиохирургиянь научной куншкакуронь теицясь-панжицясь Владимир Ипатенко.
«Малый космический аппарат «Рузаевка -390» проектэнь тонавтыцясь ды анокстыцясь Дмитрий Пашков кармась «Наукань героекс». «Велень герой» номинациясонть изнясь Почтань связень Темниковань отделениянь почтальонось Любовь Сидорова, важодемань стажозо – 25 иеть. «Производствань героекс» кармась Россиянь заслуженной металлургось, «ВКМ-СТАЛЬ-сэ» участкань старшей мастерэсь Николай Чикнайкин. Тиринь Парынзэлень вельмевтицясь ды «Пайчалго» эрзянь-мокшонь ярсамопелень комбинатонь панжицясь Евгений Ледяйкин изнясь «Меценатствань герой» номинациясонть. Дубёнкань ёнкссо кудонь ракшатнень туртов частной приютонь панжицясь Ульяна Наумова кармась «Экологиянь героекс», Инсаронь районсто искусственной осеменениянь коряс специалистэсь Татьяна Ковыряшкина – «Коллективень героекс».
Виев ойме ломантнень ютксо, кить эрьва чистэ изнить аволь ансяк стакачитнень, истя жо эсь пелематненьгак, «Эсь пелематнень изнямонь героекс» кармась Дмитрий Ожогин – артыцясь, сон 23 иесэ сокоргадсь, ансяк эзинзе нолда кедензэ, тонавтнесь массажистэкс. «Спортонь герой» номинациясонть сехте вадрякс кармась содавикс шожда атлетэсь Денис Нижегородов. «Образованиянь героекс» ёвтазь Клавдия Шуляева – Мордовиянь заслуженной тонавтыцясь, стажозо – 40 иеть. Массовой мероприятиятнень режиссёрось, республикань культурань заслуженной важодицясь Оксана Вишнякова изнясь «Культурань герой» номинациясонть.
Елена ды Александр Висюлькинтнэнь семиясь Мордовиясо сехте покш – сынь трить-кастыть 18 эйкакшт, 12-тне ютксост – саезь, изнясь «Семиянь герой» номинациясонть.
Николай Кручинкин – 1941-1945 иетнень Войнань ды трудонь подвигень мемориальной музеень прявтось, историянь ванстыцясь ды тиринь ёнксонь тонавтницясь изнясь «Герой сохранения памяти» номинациясонть. «Социальной важодемань героекс» кармась Зубова-Полянань районсто социальной важодемань коряс специалистэсь Анна Забайкина, эсь тевентень алтась 30 ламо иеть.
Лавшо шумбрачи марто эйкакштнень туртов пространствань теицясь, кона пурнась эстензэ 100 ломаньстэ команда ды тевс нолдызе Мордовиясо паронь теемань системанть, Игорь Еремкин кармась «Добровольчествань героекс». Николай Карпов тонавтыцясь Ромодановасо эень ведьстэ идесь васенце классо тонавтниця, изнясь «Обычный герой» номинациясонть.
«Время героев» проектэсь – сетнеде ды сетнень туртов, кинень аволь ялатеке. Ков седе ламо ломанть вейсэндявить сонзэ юрс, тов седе виев карми минек Россиясь.
Раськень премиянь церемониясонть концерт макссть Сретенской монастырень хорось, «Росичи» раськень коллективесь, Юлия Михальчик морыцясь ды лия седицятне-морыцятне.