Ледстясынек, неть читнестэ Мордовияв сакшность Равчирень федеральной округонь кото регионсто инжеть Тиринь келень ды литературань од тонавтыцянь промксонтень (теде сёрмадынек ютазь номерсэнть). «Эрзянь правдань» корреспондентэсь кортнесь шабра Ульяновской областень эрзянь келень колмо од тонавтыцятнень марто.
Саранскоесь пек тусь мелезэст, тесэнь тонавтыцятнеде кортасть ансяк паро валсо. Карминек содамо, Ульяновской областенть келес эрзянь велетнесэ тиринь келенть тонавтнить весемезэ 247 школьникть. Эрзянь келесь тонавтови 1–4-це класстнэсэ, 5–8-цетнесэ факультативть.
Татьяна Николаевна БАРСУКОВА, Кузоватовской райононь Еделево велень тонавтыцясь, допрок од, ушодызе важодеманзо ансяк те иестэ. Тосонь школасо эрзянь келесь тонавтови кода предмет ды факультатив. Саранскойсэль сон васенцеде. Неезденть эсь мелензэ Татьяна Николаевна пачтизе миненекак: «Монь мельс пек тусть тынк ошось ды Мордовиянь тонавтыцятне. Маряви, тесэ пек покш питне путыть тиринь кельтненень, сон тенст истямо малавикс ды эрявикс, натой сельместкак цивтёрдыть сондензэ кортамсто. Нама, тиринь келесь эряви аволь ансяк миненек, истя жо эйкакштнененьгак. Сынсткак ули мелест содамс тиринь кельденть ды а стувтнемс эсь ундокстнэде».
– Кода сыремсь эйзэнк эрзянь келентень вечкемась?
– Монь сырькаем эзь машто парсте кортамо рузонь кельсэ, секскак аламонь-аламонь тонавтсь эйсэнек эрзякс. Минь, зярдо сылинек тензэ инжекс, васня эзинек чарькоде эйсэнзэ, кевкстнинек, те кодамо истямо келесь? Тень лангс апак вано, бабам ялатеке эзь лотксе эрзякс кортамо, ёвтнесь тенек ёвкскеть, морынеть, прибауткат-мезть, истя миньгак карминек келенть содамо. Те коесь ульнесь пек кеме – эрзянь велесэ свал кортамс ансяк эрзякс, – паро мельсэ ёвтнесь Татьяна Николаевна.
Лилия Анатольевна КНЯЗЬКИНА, Т. Н. Барсуковань ялгазо, истя жо ёвтнесь, кода сон кармась эрзянь келень тонавтыцякс: «Мон чачинь Кузоватовской райононь Кивать велесэ, косо ютни «Масторавань морот» раськеютконь фестивалесь. Вишка пингестэ саезь кортан эрзякс – тетям-авам, покштям-бабам – эрзянь ломанть. Мон прядыя В. И. Ульянов лемсэ МГПУ-нть, специальностень коряс информатикань тонавтыця. Еделево велень школасо важодян колмо иеть. 5–8-це класстнэсэ истя жо ветян «Культура моего народа» факультатив. Теде башка, ютынь одс тонавтнема, ней мон биологиянь тонавтыця ды воспитательной важодемань коряс прявтонь полавтыця. Минек школасо омбоце классто саезь эрзянь келесь ветяви кода предмет. Эйкакштненень пек вечкеви тонавтнемс эрзянь келенть. Мартост минь тейнетяно эрьва кодат налкшкеть, конатне сюлмавозь эрзянь культуранть марто, саемга, коцтонь някат…»
Ульяновск ёнксонь эрзянь келень колмоце тонавтыцясь ульнесь од цёра, неень шкане истямось вастневи пек чуросто. Тонадовсь, образованияс седе пек молить тейтерь-аватне… Егор Александрович КЕЖАЕВ чачсь Николаевской райононь Баевка эрзянь велесэ. Важоди тосонь школасо колмоце ие. Эрзянь кельде башка тонавты история ды обществознания. Эрзянь келесь тесэ тонавтови васенце классто саезь вейксэцес. Кенярдовты, эйкакштнень ютксо улить эрзякс кортыцят. «Мон монсь вете иес кортынь эрзякс, лиякс кияк мартон эзь кортне. Рузонь келенть карминь содамо, зярдо туинь школав. Прядыя Саранскоень М. Е. Евсевьев лемсэ пединститутонть (ней – университет). Тосо карминь седе ламо содамо эрзянь кельденть ды литературадонть. Тонавтнемась мелезэнь тукшнось, секскак оймесэнь сыремсь келентень седеяк покш вечкема. Ней тонавтнян аспирантурасо, научной прявтом – Ю.Г. Антонов. Саранскоенть лован уш эсень ошокс, сисемеце ие тей ардтнян. Важодян, кода меринь, эсень тиринь велесэ. Нама, вишка класстнэсэтнень туртов эрзянь келесь седе тукшны мельс. Мартост важодемаськак седе вечкеви. Кенярдан, мелят тонавтницям кармась изницякс эрзянь келень регионъютконь олимпиадасо», – кортась Егор Александрович.
Арсетяно од тонавтыцятненень икелепелев ламо изнявкст ды цитниця сельме марто тонавтницят! Бути тонавтыцятнень седейсэст карми паломо вечкема тиринь келентень, сынь кирвазтьсызь эйкакштненьгак. Ансяк сестэ эрзянь келесь зярдояк а ёми…
Марина АГАФОНОВА