Эх, од пора, од пора!.. Тон туить идем галакс ливтязь ды а велявтат мекев. Удалов кадовсть эйкакш пингень ялгатне ды налксематне, лия вайгельде пешксеть тиринь школань коридортнэ ды класстнэ, лия тонавтыцят эйкакштнень туртов казить тонавтнемантень вечкема. Ансяк монь мельс-превс кадовсь вейке ломанесь, покш буквасто тонавтыцясь – Николай Иванович Аржаев, кона Орозбиень школасо тонавтомань тевентень алтась 43 иеть.
Николай Ивановичень чачома-касома тарказо – Орданьбуень Орозбие велесь. Тесэ сон ютавтызе эйкакш пингензэ ды од шканзо. Тетянзо-аванзо важодсть колхозсо. Семиясонть, сондензэ башка, ульнесть эштё кавто ялакст: Михаил ды Александр. Николай Иванович юткстост сехте покшоль.
– Весе эйкакш пингем ютавтыя тонавтыцянь эйкакш ютксо. Эдь тетям-авам стявтсть кудо Тонавтыцянь курос. Се шкане минек школав сазь тонавтыцятненень максыльть эрямо таркат – ансяк важодть. Тонавтыцянь эйкакштнень лангс ванозь ды мартост кортнезь, мон панжинь эстень вана кодамо мель: куш сынь истя жо налксить мартонок вейсэ, ансяк ялатеке мейсэ-бути эйстэнек явовить, ды те монень, вишка цёрынькантень, а сеске чарькодевсь. Ды ансяк шкань ютазь, зярдо касынь ды седе превеинь, чарькодия, мезесь истя сестэ дивавтсь ды талакавтсь эйсэнь. Сынст марто кудосо кортасть теке лия кельсэ, нама, эрзякс, ансяк тетяст-аваст тонавтоматне-кармавтоматне ёвтавсть седе чевтестэ, апак пижне, кода мерить, интеллигентнойстэ. Неть ялган ульнесть книгань ловныцят, эрьва кодамо кельс чарькодицят. Минь, сокицянь-видицянь семиясо чачозь-касозь эйкакштне, кургонь автезь ванылинек лангозост. Паряк, самай сестэ монь чачськак мелем улемс сынст ёнов молицякс. Теевемс ламонь содыцякс, прянть вадрясто ветямо маштыцякс ды стакачиде а пелицякс. Мон ушодынь ламо ловномо. Ледстнян, сеть шкатнестэ библиотекатнесэ кедьс максыльть ансяк вейке книга, – ёвтни Николай Иванович.
Истя од цёрась нильнезь нильнесь книгатнень, тонавтнесь кельтнень, историянть ды математиканть. Вадрясто прядызе школанзо ды ялганзо марто тусь важодеме Московов.
– Монь ульнесь покш мелем неемс, кода эрить ломантне лия ошсо. Нама, седеесь пек сэредсь тиринь веленть кис, ансяк ялатеке арасель мелем велявтомс. Покш ошонть шалтозо тердсь эйсэнь икелев, ков-бути васов, – ледстни тонавтыцясь.
Московсо Николай Аржаев ие тонавтнесь профучилищасо, мейле цёранть саизь важодеме строительной бригадас. Мейле тусь армияв. Кавто иень ютазь, мекев велявтсь Московов, важодсь секе бригадасонть.
– Ансяк вановтом армиядо мейле пек полавтовсь. Зярдо кавто иень ютазь таго ушодынь котьмамо рудаз ды ведь потсо, чарькодинь, те тевесь а монь. Эряви муемс истямо важодема, конась карми седеенть кецявтомо, аволь ризнэвтеме. Варштынь каразь траншеянть ёнов ды серьгединь: «Эрь, Московонь эрицят, важодеде тынсь те кельме моданть потсо, а мон туян лия таркань вешнеме!» – ледстни цёрась.
Сон сайсь мель молемс тонавтнеме Московонь вузтнэстэ вейкень биолого-географической факультетэв, ансяк бажамозо эзь топавтово. Секскак цёрась кельмевтезь седей марто велявтсь тиринь Мордовияв. Кармась вешнеме важодема тарка Саранскойсэ.
– Секе жо чистэнть, зярдо сынь, Саранскойсэ саимизь важодеме светотехникань заводов – лампочкань пувамо. Та-кода весть сыргинь инжекс сазоркань туртов, кона важодсь стыцякс. Ды автобуссто валгомсто маринь истямо яволявтома: «Лотксема таркась – Пединститут», неть валтнэнь марязь, мон, мерят, стувтыя, ков сыргинь ды кинень, валгинь лотксема таркантень ды сыргинь од ломантнень мельга. Зярдо совинь институтонтень (ней – университет), сельмень икелев понгсь яволявтома: «Рабфаков пурнатано студентт! Учотано эрьванть!» Бути эрьванть, сестэ варчаса прям монгак, – корты тонавтыцясь.
Истя 21 иесэ цёрась одов озась парта экшс. Студентэнь шкасто теевсь содавиксэкс нинзэ марто.
– Татьяна Васильевнань васенцеде вастыя дискотекасо. А сёпан, седеем солавтызь кавто пулос кодазь черензэ ды чопода-тюжа сельмесэнзэ палыця сяткинетне. Малав 55 иеть эрятано вейсэ. Нама, вейсэнь эрямосонть эрьва мезе лисни, ансяк вечкемась, конась кеместэ совась се чокшнестэнть седеезэнек, апаротнеде виевель, – мизолдозь корты Николай Иванович.
Институтонть прядомадо мейле сась шка вешнемс важодема тарка. Педагогикась цёрантень пек вечкевсь. Ансяк кадовомс эрямо ошсо мель арасель. Истя цёрась велявтсь важодеме Орозбие велев.
– Косо илязан уле, мезе илязан тее, мельсэнь-превсэнь свал чачома велем. Ледстнян, кода чокшне мадезь конилинь сельмень, ды ононть таркас икелень стиль тиринь Орозбиесь. Сонзэ певтеме паксянзо, чопода лашмонзо-лушмонзо, човине, кувака яннэнзэ. Мелявтыця седеесь свал тердиль эйсэнь кудов. Секскак кувать эзинь арсе, ков молян тонавтнемадо мейле, нинть марто сынек велев, – ледстни тонавтыцясь.
Николай Иванович течинь чис лембестэ лемди нинзэ «декабристкакс», мекс сестэ тусь мирдензэ мельга Орозбиев, кадызе тиринь Рузаевканзо, тетянзо-аванзо ды тусь эрямо республикань лия пелев. Татьяна Васильевна истя жо тонавтыця. Пенсияс важодсь Орозбиень школасо физкультурань ветицякс.
Эряви тешкстамс, Аржаевтнень кудораськесь се шкане чачтсь эштё вейке тонавтыцянь семия. Николай Ивановичень Александр веженсь ялаксозо, покш лелянзо лангс ванозь, прядызе пединститутонть ды кармась географиянь тонавтыцякс, шкань ютазь сон урьвакстсь рузаванть Лидия Михайловна лангс, кона ветясь велень школасо математика. Истя кавто аватне велявтсть Орозбиень эрзянь авакс. Кавонест семиятнесэ чачсть эйкакшт. Николаень ды Татьянань колмо: цёраст – Сергей ды Станислав, тейтерест – Ирина. Александр ды Лидия чачтсть цёрабайть – Евгениень ды Артёмонь. Неень шкасто эйкакштнень уш улить эсест семияст, эйкакшост.
Ансяк ялаксост Михаил невтизе прянзо лиякс – сон кадызе тиринь велензэ ды армиядо мейле тусь васоло Белоруссияв. Эри тосо течинь чис, пурнась семия. Ялаксонзо марто кирди покш ояксчинь сюлмот, чачома таркавгак сакшны, тошнакадозь седеензэ витеме.
– Ледстяса, кода васенцеде сынь Орозбиень школав. Ладимизь прявтонь полавтыцякс, мейле аравтыксэлимизь прявтокс, эзинь карма, варчия прям келень тонавтыцякс. Ды вана течинь чис мон языковед, – корты Николай Иванович.
Истя жо тонавтыцясь мельсэ кирди се шкань школанть, а стяко тензэ мерильть «вишка Китай ош», тонавтницятнеде ульнесть 3 тёжат. Тонавтнильть кавто сменасо, эйкакштне сыльть шабра велетнестэ ялго, тельня кие сокссо, кие лишмесэ.
– А стувтови зярдояк тонавтомань васенце чим. Ладимизь тонавтыцякс 5-це «Ж» классонтень. Эйкакштне те классонть лововсть пек стакакс. Ве вал потстост а таргат ды пряудемезэсткак путомс стакаль. Ламо ливезь ланган чудсь, ансяк иень прядомантень абунгавтыя весе школанть. Монь «кавтос» тонавтницятне кармасть, теке мерят, гимназистэкс, – пейди Николай Иванович. – Тевесь ульнесь истя: мон иень перть порксынь пря, кода жо неть эйкакштнень аравтомс виде килангс, кода мартост важодемс, ве валсо: кода кармавтомс сынст арсеме?! Ды вана аламонь-аламонь карминь тевс нолдамо эсень лувонть: бажинь эрьва эйденть седейс-превс муемс башка яннэ, кода седе чарькодевиксстэ максомс материалонть. Бути тердилия тонавтницянть доска икелев, кармилинь кевкстнеме эйсэнзэ апак пижне, чевтестэ, саемга: «Вася, кода арсят, мейс тесэ ашти запятоесь? Ёвтык эсеть мелеть-арсемат?» Бути тонавтницясь талакадыль, максылинь шка арсемс, озавтылия ды тердилинь лиянь. Тень каршо тонавтницяськак ваныль лиякс, лиясь сеске муиль каршо валт, кармиль седе домкасто арсеме. Тонавтыцянь лувом истямо: тонавтомс эйкакшонть арсеме, кортамо маштомо, а виздеме. Ды те психологической методонть коряс важодинь свал, кода чачсь прязон васенце важодемань иестэ ды эри эйсэнь течияк. Важодема таркав свал якилинь покш мельсэ, школасо маринь прям сёлмо марто нармунекс, конань седеезэ либордсь тевентень вечкемадонть, те жо покш уцяска, – корты цёрась.
Пенсияс туемадо мейлеяк Николай Иванович зярыя иеть яксесь школав ды лездась ОГЭ-тнес, ЕГЭ-тнес анокстамосо. Эйкакштне, конатне ульнесть те тонавтыцянть сёлмонзо ало, свал теилизь тевест «ветес».
А стяко, Орданьбуень райононь эрицятне лемдить Николай Ивановичень Пазонь пельде тонавтыцякс. Сон алкукскак истямо, течинь чис седейсэнзэ палы те тонавтомань сяткинесь. Тонавтыцясь нейгак анок чинек-венек лездамс эйкакштненень панжомс келень ды литературань келей масторонть.
Неень шкастояк Николай Иванович оймамо а соды. Сон ванкшнызе-тонавтнизе покштянзо-сырькаензэ ламо поколениянь историянть, кить сынь ульнесть, косо важодсть ды ней эйстэдест ёвтни нуцькатненень. Истя жо сон важоди эрзянь космологиядо статьянть лангсо. Покш мельспаро сонензэ казить эрзянь кельсэ сёрмадыцятне: Кузьма Абрамовсто саезь Марина Слугинас. Ды сон тешксты: кадык неень шкань од сёрмадыцятнень седе товгак шкинемаст а лепами ды сынь кецявтыть эрзянь кельсэ эсь сёрмадовкссост.
Алена Артемьева