Саранскоень 20-це № гимназиясо ютась «Лучший учитель родного языка и родной литературы» весероссиянь пелькстамонь ошонь этапось, конась алтазель эрзянь ды мокшонь кельтнень тонавтыцятнень важодемасо ёрокчист невтемга.
Пелькстамонть ютавтыцятне – Саранскоень Администрациянь Социальной политиканть коряс департаментэнь Образованиянь управлениясь, «Информационно-методический центр» МУ-сь вузонь специалисттнэнь лезксэст пингстэ. Оргкомитетэнтень совасть ИМЦ-нь важодицятне Н. Н. Волкова, Е. А. Богордаева, М. М. Вельмякина ды А. П. Пьянзина.
Конкурсось аштесь заочной ды очной турсто. Пелькстамонь заочной турсонть «Лучший учитель родного языка и родной литературы» лементь кис пелькстасть Саранскоень 15 тонавтыцят, вететне эйстэст лиссть финалс. Неть: 11, 15, 25, 41 №№ МОУ-нь ды Николаевкань школань тонавтыцятне. Очной турсонть ульнесть: «Урок» ды «Классной час» конкурсной заданият.
Уроктнесэ пелькстыцятне невтизь эрзянь ды мокшонь кельтнень тонавтомасо эсь профессиональной маштомачист, пачтясть инновационной педагогической опыттэст.
«Классный час» пелькстамонь заданиясонть, конась ульнесь «Популяризация народного искусства и сохранение народных традиций, памятников истории и культуры, этнокультурного многообразия, культурной самобытности всех народов и этнических общностей Российской Федерации» теманть лангс, пелькстыцятне невтизь ёрокчист ды домка содамочист эйкакштнень тонавтомасо-кастомасо.
Конкурссонть изницякс лиссть: «Центр образования № 15 «Высота» имени Героя Советского Союза М. П. Девятаева» МОУ-нь мокшонь келень тонавтыцясь Марина Николаевна Миронова ды «Николаевская средняя общеобразовательная школа» МОУ-нь эрзянь келень тонавтыцясь Татьяна Владимировна Яськина.
Пелькстамонь призёртнэ: «СОШ № 11» МОУ-нь эрзянь келень тонавтыцясь Людмила Руслановна Марьина; «СОШ № 41» МОУ-нь эрзянь келень тонавтыцясь Елена Сергеевна Толстова; «Лицей № 25 им. Героя Советского Союза В. Ф. Маргелова» МОУ-нь мокшонь келень тонавтыцясь Наталья Анатольевна Кулакова.
Пелькстамонь жюринтень совасть сисем кельсодыйть – университетэнь ды школань важодицят. Неть: филологиянь наукань докторось, профессорось, М. Е. Евсевьев лемсэ педуниверситетэнь тиринь келень ды литературань кафедрань прявтось О. И. Налдеева, Н.П. Огарёв лемсэ университетэнь филологиянь наукань кандидатось Т. П. Арискина, «Педагог 13.ру» этнокультурной образованиянь лабораториянь прявтось Е. М. Наумова, 37-це № школань прявтонь полавтыцясь О. В. Михеева, Луховкань лицеень прявтонь полавтыцясь Л. Н. Комарова, 26-це № лицеень эрзянь келень тонавтыцясь, педагогикань наукань кандидатось И. Г. Зубарева ды 33-це № школань прявтонь полавтыцясь А. И. Мусатова.
Республиканской этапось карми апрелень 25-це чистэ. Весенень арсетяно изнявкст ды икелев молема ки!
Марина Агафонова