Ков шка, малавикс ломантне, сынст марто ютазь иетне, теевить седеяк питнеекс. Сынст ютксо, невтемга, университетсэ тонавтнема ялгам Валя Гераськина. Сонзэ ней, нама, полавтовсь фамилиязо Герасимовакс, ды лемдитькак сонзэ Валентина Фёдоровнакс.
Велесэ весе мерить тензэ истя, аволь ансяк секс, мекс тонавтыцятненень мерить тетялемсэ. Те меремась корты вечкемадонзо. Ды ули мезень кисэ. Сон школасо важоди малав 43 иеть! Те – важодемань подвиг!
Кевкстядо: кодамо те ялга, зярдо сон ава-ломань? Алкуксонь ялга! Уш зяро иеть вейкеть келенек, кортамонок, мелявксонок, лездавксонок – весе те ялгаксчинь пелькст.
«Кодаяк бу вастовомс», – арсинь мон. Ледстнема кой-мезе, кой-кинь. Эдь од пингесь, тонавтнема иетне – сырнень шка!
Апак учне, апак кеме вастовоманок лангс – важодема таркасто кучимизь Кочкуровань райононь Кочкурвелев. Те паро! «Вана вастовангак тонавтнема шкань ялгам марто!» – кенярдозь арсинь мон.
Кочкуровав сазь, аламодо мелявтозь-ризнэзь совинь школас.
– Тынь ков? – аволь чевтестэ кевкстимизь авась, кона озадоль школас совамо морганть экшсэ. – Валентина Фёдоровна районной библиотекасо.
Ношкстынек тов, стяко.
– Аволь умок сон тусь тестэ ДК-в, да биш, Культурно-досуговой центрав, – толковасть библиотекасо. – Сайсь книгань тапаркс.
Капшазь туинек тов. Товгак эзинек кенере.
– Сон аноксты тонавтницянзо «Эрий вал» раськеютконь ловныцянь пелькстамонтень. Эрявить сёрмадовкст, оршамопельть, – толковасть ДК-со.
– Тыненк Валентина Фёдоровна? – содымизь школасо секе авась. – Сонензэ састь цела автобус тонавтницят Саранскойстэ, а зярдо тензэ. Паряк, учосынк прявтонть кедьсэ?
Минь эскелинек Василий Иванович Пяткиннэнь, школань прявтонтень. Сонзэ кедсэльть районной администрациясто важодицят. Видькстасть: анокстыть конёвт Саранскоев, энялдыть максомс тензэ казне.
– Тедедень иесь яволявтозь Педагогонь ды наставникень иекс, сондензэ паро тонавтыця районсонть арась, – видькстасть администрациясо. – Озадо ваксозонок, невтьсынек канстонзо, – лембестэ пшкадсть тенек. – Сехте питней казнекс Валентина Фёдоровна лови эйкакштнень вечкемаст, вейке-вейкень чарькодеманть. Ды тетятнень-аватнень, важодиця ялгатнень марто вейсэнь келень улемась.
– Казнензэ сонзэ ламо, – ушодызе кортамонзо школань прявтось. – РФ-нь Президентэнь фондонь Грантонь максомась, «Мордовия Республикань заслуженной тонавтыця» лемесь, МР-нь «Важодемасо сехте вадря» («Лучшая по профессии») лемесь, МР-нь Правительствань, МР-нь Госсобраниянь, МР-нь Образованиянь министерствань ды ламо лия таркасто дипломт, грамотат, благодарностть.
Гайгстась баягинесь ды школань коридорось пешкедсь эйкакшонь гайтте. Лиссть тонавтыцятне, инжетнеяк. Окойники, вастовинек Валентина Фёдоровна мартояк.
– Инжетненень невтнинь, ёвтнинь, кода важодян тонавтницятнень марто, класстнэсэ эрзят, рузт; кода литературанок сюлмавозь фольклоронть марто, кодат минек Кочкурова ёнксонь эрзятнень оршамост, – мельспаросо ёвтни сон. – Прядсынек школань столовойсэ. Ве ёндо сыця инжетнень каванясынек. Эдь эрзятнень кедьстэ зярдояк вачо а тукшныть. Те аволь ансяк каванямка. Те прок урок, конань лемезэ – «Эрзятнень ярсамост». Монсь ды эйкакштнеяк кандынек кудосто пидевкст-паневкст. Озадо мартонок!
Столь лангось пешксель эрьва мезде. Те эряви неемс, нама, варчамскак.
Седе тов Валентина Фёдоровна пек ламо ёвтнесь школадост, ялгадонзо, тонавтницядонзо. Мон пек ламо од маринь, карминь содамо. Таго прынь мельс: тонавтомась – те сехте стака ды эрявикс тев.
Кортамонть перть Валентина Фёдоровнань сельмензэ палозь палсть, валонзо гайгсть прок тундонь нармунень чоледемакс, тантей лисьмапрясто чудиця чудикерьксэкс… Кортамсто карминь содамо: В. Ф. Герасимова важоди тонавтыцякс 43-це ие. Ушодсь Симилейсэ, мейле Иван Михайлович мирдензэ марто – Од Пурнясо. Ней вана райононь школасо.
– Монь малав весе тонавтницян тештеть, – таго ушодсь Валентина Фёдоровна. – Невтемга, Ангелина Четвергова литературань коряс Республикань пелькстамосо изницятнень ютксоль. Мейле, иень трокс, истямо изницякс лиссь Ангелина Маштакова.
Ламо сон ёвтнесь Илья Кузьминдэ, конань содаса монгак. Весть «Шумбрат, Мордовия!» республиканской фестивальсэнть-пелькстамосонть Кочкуровань райононь концертэнть сон панжизе монь стихотворениясонть. Мон ульнинь ваныцятнень ютксо. Седе мейле карминь вастнеме те лементь седе сеедьстэ. Сон невтизе ёрокчинзэ Московсо «Одарённые дети» форумонь «Литературный салон» номинациясонть. А вана Ангелина Маштакова ды Ангелина Четвергова якасть «Орлёнок» Весероссиянь эйкакшонь центрав, ков кочкакшнынзе комиссиясь. Тов максозельть 7 мастортнэстэ ды Россиянь 62 регионтнэстэ 757 эйкакшонь важодевкст.
Прявттнэ ламо кортасть седе, кода сон домкасто вети уроктнень, тетятне-аватне ёвтнесть кецямодост, мекс эйкакшост тонавтыцяст истямо. Валентина Фёдоровна жо певтеме кортась тонавтницядонзо, конат сехте мазыйть, превейть, содыцят, сиземань асодыцят. Нать, уш сонськак истямо: В. Ф. Герасимова эйкакшонь вечкиця, келень ды литературань тонавтыця, кона пингензэ перть эйкакш марто.
Геннадий ГРЕБЕНЦОВ