Аволь умок Саранск ошонь округонь Администрациянь Социальной политикань коряс департаментэсь ютавтсь «Тиринь келень ды литературань сехте паро тонавтыця» эйдень кужонь воспитательтнень ютксо пелькстамо. Те конкурсось од, сон моли ансяк омбоце ие. Эйсэнзэ невтить пряст дошкольной учреждениясо важодицятне, кить явить покш мель этнокультурной ёнксонтень.
Кода уш ледстинек ютазь номерсэ, «Воспитатель, реализующий программы этнокультурной направленности» номинациясо изницякс лиссь Саранскоень 14 № эйдень кужонь воспитателесь Наталья Кучерова. Минь вастовкшнынек кужонь важодицятнень марто ды кортынек эйдетнень трямодост-тонавтомадост. Прявтокс кужосонть важоди А. П. Калачина.
– Минек кужось од, сон стявтозель 2015 иестэ. Ней тесэ 11 группа ды 270 эйкакшт. Мартост важоди 31 тонавтыця, неть: воспитательть ды дополнительной образованиянь педагогт. Улить физической культурань коряс ды укшномань коряс инструкторт, музыкальной руководитель, педагог-психолог, логопед. Эйкакштнень трятано-касттано эрьва кодамо ёнксонь коряс. Минек кужось башка мель яви этнокультурной тонавтомантень. Содавттано эйкакштнень раськень культуранть, койтнень-кирдатнень, Саранск ошонть сюпавчинзэ марто. Школав молить паро содамочи марто. Истя жо ветятано «Ёвтамо» эрзянь келень кружок, – пачтясь 14 № эйдень кужонь старшей воспитателесь Ольга Сидорова.
Ольга Николаевна дошкольной образованиясо уш 19 иеть. Сон прядызе М. Е. Евсевьев лемсэ МГПИ-нть (ней МГПУ). Васня важодсь 5 № эйдень кужосо воспитателекс, седе тов ютась 80 № эйдень кужов, тосо ладизь старшей воспитателекс, те иестэнть сась 14 № эйдень кужов. Педагогось важоди педколлективенть марто, ваны тевест топавтоманть мельга, весемесь ютаволь программань коряс ды законодательствань апак кола. Сон лезды лия воспитательтненень эрьва кодамо тевень коряс.
«Тиринь келень ды литературань сехте паро тонавтыця» конкурссонть пелькстыть ансяк сеть эйдень кужотне, косо ютыть эрзянь эли мокшонь келень кружокт. Тедеде сонензэ явсь мель 21 кужо. Финалс ютасть кавксо кужот. Ютксост 14 № кужонь воспитателесь Н. М. Кучерова. Пелькстамось мольсь ошонь 5 № ды 90 № кужотнесэ. Эрявсь ютамс зярыя этапт, теемс визитной карточка, косо меревсь ёвтнемс эсь прядонть ды важодемадонть, анокстамс методической портфолио, ютавтомс занятия.
– Мон васенцеде пелькстынь истямо конкурссо. Нама, пек талнынь. Макссть тенек кото эйкакшт, конатнень а содасынек, сынст марто эрявсь муемс кель-вал, ютавтомс занятия. Анокстынь занятия-путешествия, конась алтавсь кезэрень пазтнэнень, сынь ёмасть книгань лопатнестэ ды эрявсть вешнемс. Теинек някат – Вирява, Ведява, Паксява, Кудатя ды седе тов. Весе сынь оршнезь мазый оршамопельсэ. Васня муинек пижесэ оршазь Виряванть, карминек содамо, кодат чувтот касыть вирьсэ, кода лемест эрзянь кельсэ. Ведяванть вельде ёвтнинь Инсар ды Мокша лейтнеде. Неть кезэрень пазтнэде аволь весть тенек, нуцькатненень, ёвтнесь вечкевикс бабам. Ды минь алкукс кеминек, сынь улить ды эрить ютксонок. Эйкакш пингестэ вирьга якамсто свал марявсь, кие-бути мельганок ваны, – кортась Наталья Кучерова.
Наталья Михайловна чачсь Саранскойсэ. Кудосо тетязо ды авазо кортасть эсь ютковаст ды эйкакшост марто эрзякс ды мокшокс. Тетязо Ковылкинань районсто, авазо – Чаунзабуень, тосо ютастькак весе каникулатне. Наталья тонавтнесь М. Е. Евсевьев лемсэ МГПИ-сэ (ней МГПУ) «Педагогика и методика начального образования» ды «Музыкань тонавтыця» специальносттнень коряс. Вуздо мейле важодсь школасо тонавтыцякс, эйдень кужосо воспитателекс, седе тов 15 иеть эрясь Московсо, косо истя жо важодсь эйдень кужосо, казезь Московонь Правительстванть пельде Почётной грамотасо. 2015 иестэ саезь, ансяк панжовсь Саранскойсэ 14 № кужось, сась тей. Сон паро мельсэ вети «Ёвтамо» эрзянь келень кружоконть, ков яксить 6-7 иесэ подготовительной группань эйкакштне. Мартост тонавтни эрзянь валт, стихть, морот, ловныть ёвкст, налксематнень вельде содавты раськень койтнень-кирдатнень, историянть ды культуранть марто. Эйкакштне сакшность «Чилисема» ды «Якстерь тяштеня» журналтнэнь юбилейс, косо ловность стихть.
– Эряви содамс, кить минь, кодамо раськень, кодат ундоксонок, кодамо культуранок. Эйкакштнень тетяст-аваст ютксо улить эрзят ды мокшот, ансяк эйдетне кель а содыть. Минек кружокось лезды витемс те тевенть, – корты Наталья Кучерова.
Сынст кужосо ули эрзянь кудыне, косо невтневить кезэрень ули-паротне, лемест сёрмадозь эрзянь кельсэ. Невтевить някатне-пазтнэ. Самай тесэ ютыть занятиятне. Эйкакштнень улить эрзянь оршамопелесткак, конатнень оршнить кенярксчитнес.
Курок Наталья Кучерова карми пелькстамо лия воспитательтнень марто республикань этапсонть. Арсетяно тензэ изнявкст ды икелев молемань тевть!
Татьяна МАТОРКИНА