Школав важодеме сон сась од тейтернекс. Ансяк-ансяк прядызе Ицялонь педучилищанть, тензэ ульнесть 18 иеть. Сась теке школантень, косо сонсь тонавтнесь. Васенце урокозо ютась 1-це классонь тонавтницятнень марто. Вишка эйдетне парсте кунсолость эрьва валонть ды домкасто вансть тонавтыцяст мельга. Сон карми тенст омбоце авакс весе ниле иетнень перть.
Те уроксонть, эйкакштнеде башка, аштесть педагогической училищань комсешка студентт ды методист. Од тонавтыцянть лангсо ульнесь ансяк стазь ашназа-серой од костюм. Уроконтень парсте анокстазь, талномань кекшезь, ушодовсь тонавтыцянь кизэ.
Вана истя ледстни школав самодонзо Марина Ивановна Четвергова. Сон уш 35 иень перть роботы Ицялонь средней общеобразовательной школасо вишка класстнэсэ тонавтыцякс. Ламо ютасть кедьганзо эйкакшт, ламо эйстэдест нолдась. Ней сон вети 2 «А» классо, косо 25 тонавтницят.
Марина Ивановна чачсь Ицялсо, эрзянь семиясо. Кудосо, нама, кортасть тиринь кельсэ, ансяк школасо сеть шкатнестэ кияк эзь ветя эрзянь кель. Васня сон аволь парсте содылизе рузонь келенть, мейле тонавтнизе. Школасто самодо мейле сеедьстэ налксиль кудосо «школынесэ». Ташто шифоньерэсь теевиль доскакс, козо сёрмадыль ашо порсо, някатне – тонавтницянзо. Ды уш истя тензэ вечкевиль тонавтомс, решамс задачат, сёрмалемс лаз лангс!
Ицялонь школасо рузонь келень ды литературань тонавтыцякс сынст ульнесь Нина Алексеевна Володина. Пек вадря, эсь тевень содыця, алкуксонь педагог. Кельденть башка, сон ветясь «Клуб искусства» кружок. Самай сонзэ пельде Марина Ивановнанень сась покш вечкема рузонь келентень. 8-це классонть прядомадо мейле сон кавтолдсь, ков молемс тонавтнеме: вишка класстнэсэ тонавтыцякс эли рузонь келень ды литературань. Пек вечкевсть тензэ рузонь келень уроктне. Прядызе школанзо ансяк «ветес» ды кармась тонавтнеме Ицялонь педагогической училищасо. Зяро кадрат минек республикантень нолдась тонавтнемань те таркась! Тесэяк од тейтересь тонавтнесь парсте. Якась пионервожатоень мастерствань школав, студенткакс улемстэ кизна важодсь лагерьсэ. Прядызе педучилищанть якстере диплом марто, вейкеяк «нилезэ» арасель. Комиссиясь мерсь кочкамс, ков молемс седе тов важодеме. Ламо школатнень ютксо ульнесь эсензэ Ицялонь школаськак. «Мезекс васолга якамс? Тосо уш весень содасыть», – путызе превс авазо.
Истя, 1987 иестэ Марина Четвергова кармась тонавтомо Ицялонь школасо. Нейгак лембе ды паро валсо ледстни тонавтыцятнень, кинь марто важодсь васенце иетнестэ. Сон ульнесь однэ, прядызе теке школанть, вастызь лембестэ ды, нама, ламо лездасть. Невтемакс, МР-нь заслуженной учителесь Вера Петровна Калинина.
Марина Ивановна заочна тонавтнесь Н. П. Огарёв лемсэ МГУ-нь исторической факультетсэ, теде мейле – М. Е. Евсевьев лемсэ МГПУ-со (сестэ МГПИ) начальной классонь тонавтыцякс. Прядынзе якстере диплом марто. Лиссь мирденень, чачсь цёразо. Эряви меремс, тетянзо ёндо весе патянзо ульнесть тонавтыцякс, прядсть педучилища ды пединститут, пингест перть важодсть учителекс.
– Ломанентень эряви улемс эсензэ таркасо. Мон пек вечкан эйкакшт. Мелявтан эрьванть кисэ. Маряви, содан эйстэдест тетядост-авадост ламо. Вишка класстнэсэ – сехте паро, мельстуиця урокт. Чалган классонь поровтонть трокс валскень 8 чассто – ды стувтовить весе апаротне, мелявкстнэ, тевтне. Седеетькак эжи, зярдо ваныть лангозот превей сельминетне. Ванан лангозост ды уш редяви – кинь кодамо сферасо учить изнявкст. Ниле иеть ды теке нармушкинеть туить ливтязь седе тов. Конат кедьсэнь тонавтнесть, ней якить 6-це, 10-це классов. Ды те шкас чийнить тень, кевкстнить, кода тевень, чаракавтымизь-эзимизь васенце классонь эйкакштне. Ушоваяк а ютыть вакскан, пшкадить, шумбракстнить, кутморить. Седеетькак эжи, седеяк ламо вийть пурнавить, лисни, а стяко важодят, – корты Марина Ивановна.
М. И. Четвергова 2-4-це классонь тонавтницятнень туртов вети «Содак ды вечкть тиринь келенть» кружок. Ризны, эрзянь келень содыцят арасть, велест рузонь, кудосояк эйкакштне а марить те кельсэнть кортамо. Эрзянь келесь тенст теке омбо масторонь кель. Тень лангс апак вано, сыненст вечкеви кружокось. Мелят Ицялонь школась кочказель духовно-нравственной тонавтомань пилотной проектэнь ютавтомань таркакс, тесэ тевс нолдавсь «Культура и традиции мордовского народа» курсось. 4 «Б» классонь тонавтницятнень марто сынь эрзянь кельсэ путызь «Теремок» ёвксонть-спектаклянть.
– Ёвксонть минь невтинек школасо весень туртов. Эйкакштне морасть ды киштсть. Сынь мельспаросо тонавтнить эрзянь кельсэ стихть. Ансяк теде икеле, нама, эряви ёвтнемс тенст, мезде стихотворениясь, мезде тосо кортави-пачтяви. Чарькодеви, истямо кружоконь вейке часось те пек аламо. Кружоков сакшныть мельспаросо, сынсь вешить тонавтнемс стихть, кевкстнить, косо карматано ловномост. Школасонок ули истямо кой – сёрмадсынек эйкакштнень видеос, кода ловныть стихть. Мейле школань фойесэ нолдасынек сынст телевизорс, переменасто сынь тосо ловныть. Мелят Изнямонь чинтень истя тейнинек, – ёвтни тонавтыцясь.
Марина Ивановна начальной школасо тонавтомань коряс завуч. Школасост малав 400 эйкакшт. Юткстост 164 тонавтницятне – вишка классонь. Весемезэ кавксо класст. Мезе парось, школантень сыть важодеме од тонавтыцяткак. Марина Четвергова анок лездамс эрьвантень. Эдь сонензэяк эсь шкасто венстясть лезксэнь кедь. Од специалисттнэнь ютксо эсензэ тонавтницязо, сон васенце ие вети география.
Весе неть иетнень перть аволь весть полавтневсь школань программась. Тонавтомань методикасо ульнесть ламо од вешемат. Марина Ивановна бажась эрьвастонть саемс эстензэ сехте вадрянть, лезэнь кандыцянть, эрявиксэнть. Эрьва учителенть эсензэ тонавтомань лувозо. Ды сонзэяк ладявсь эсензэ методиказо. Профессионалокс улемга – эряви ламо важодемс, ламо мезень пачк ютамс. Сон тонавты ды кармавты эйкакштнень арсемс, максомс питне те эли тона тевентень. Уроксонзо сэтьме, весе кунсолыть, кияк стяко а чары-вели.
Ламо иень перть парсте важодеманзо кисэ Марина Ивановна аволь весть казевсь покш казнесэ. Мелят изнясь омбоце тарка «За нравственный подвиг учителя» республикань пелькстамосо. 2022 иенть прядовомсто МР-нь Прявтось А. А. Здунов казизе «МР-нь заслуженной тонавтыця» лемсэ. Эсь шкасто сон невтекшнизе прянзо «Учитель года» пелькстамосо, лиснесь муниципальной этапонь призёрокс, те ульнесь сестэ, зярдо ансяк ушодсть ютавтомо конкурсонть.
– Бути вечксак профессият – ойметькак палозь палы, покш кеняркс марто ютат важодеме. Весе неть иетнень перть кодаткак стакачить тетятнень-аватнень ды эйкакштнень марто арасельть. А неян эсь прям лия профессиясо. Вечкан ваномс эйкакштнень лангс, чарькодемс мелест-арсемаст, неемс сынст паро ёжост. Эйкакштне эрьва косо вейкетть. Сынст эряви вечкемс, чарькодемс, кунсоломс, – вана истят тонавтыцянь салавачить ёвтнесь тенек минек героинясь Марина Ивановна.
Татьяна Маторкина