Неть читнестэ республикань эйкакшонь ды од ломанень «Надежда» приютсонть ульнесть ламо инжеть. Сыненст сакшность: Мордовия Республикань Прявтонть пельде лездыцязо М.Г.Лушенкова, МР-со УФНС-стэ – В.Н.Крайнов, Саранск ошонь Октябрьской судсто – Т.В.Щеголькова, Орданьбуень светотехнической заводсто – А.Е.Куршев, «Капитал-МС» ООО-сто – О.Н. Солдатова, «Европак» ООО-сто – О.Ю.Швецов, «Технострой М» – В.В.Большаков, «Эверест» лавкатнестэ – О.С.Ягдина ды лият.
Инжетне эйкакштненень сакшность аволь чавонь кедть. Невтемакс, республикасо Седеймарямонь ды шумбрачинь фондонь прявтось Л.В.Никонова те учреждениясонть эриця эйкакштненень тейсь покш казне, макссь кемень путёвкат «Сырнень суркс» маршрутонть коряс. Тов сыргить сехте кунсолыцятне ды парсте тонавтницятне.
Ламо лембе валт ды паронь арсемат эйкакштненень ды тосо важодиця коллективентень ёвтась МР-нь Прявтонь лездыцясь, те учреждениянь Попечителень советс совицясь М.Г.Лушенкова. Мария Григорьевна башка мель явсь приютонь прявтонтень Т.В.Барашихинанень, сонзэ прявтсо коллективесь ламо теи тосо эриця эйкакштнень эрямост валдомгавтомга, сыненст седейлембень каземга, эйстэст алкуксонь ломанень ливтемга. Неть паро арсематнень поладынзе «Ардатовский светотехнический завод» ОАО-нь стратегической развитиянь коряс директорось А.Е.Куршев. Те разнэ эйкакштненень сынь пачтясть ламо эрьва кодат канцтоварт. «Капитал М» ООО-нь прявтонть Ольга Николаевна Солдатовань валонзо коряс, сынь сеедьстэнь инжеть те учреждениясонть аволь ансяк кенярксчитнестэ, сакшныть лездамо эйкакштненень свал.
Покш лезкс приютонтень максы «Европак» ООО-сь, сынь свал анокт максомс асатыцянть ды лиясто сехте пек эрявиксэнть.
Тешкстасынек, «Европак» ООО-нь прявтось Р.А.Абдуллов аволь вейке иень перть топавты седеймарямонь тевть те учреждениясонть эрицятнень лезэс.
Те чистэнть эйкакштне инжетненень невтсть мельстуиця концертэнь программа: киштемат-морамот, театрализованной представления, конась алтавсь школасо тонавтнемань темантень.
Те мероприятиянть ушодовомадо икеле Саранск ошонь Феодор Санаксарской церьковань настоятелесь отец Георгий баславинзе эйкакштнень школасо парсте тонавтнеме, покштнень кунсоломо ды пшкадсь весе пурнавозтненень пастырень вал марто.
Весе неть мелень витиця тевтнень прядовомадо мейле эйкакштнень учость тантей каванямопельть.
Валентина ЮДИНА