Важное

Ожоковонь 5-це стэ кенярксчист тешкстызь тонавтыцятне. Тень кувалма Республикань Культурань кудосо ютавтовсь покш промкс, тонавтыцятненень поздоровонь ёвтамо сакшнось Мордовиянь Прявтось Владимир Волков.
Сон тешкстызе, алкуксонь тонавтыцясь свал максы седе ламо школань программанть коряс. Сон лезды эйкакшонтень чарькодемс эсь прянть, панжомс ломанень обуцянь сехте вадря ёнкстнэнь, муемс эсензэ ки эрямосонть.

– Тынь эрьва чистэ виевгавттадо од ломантнень обуцясо истят ёнкстнэнь, кода важодеме вечкемась, од тевтнень ушодомась, видестэ арсеме маштомась. Тынь бажатадо невтемс тонавтницятненень, кода эрявить видечись, парсте прянь ветямось, вейке-вейкенень мелень явомась, тиринь масторонть ды республиканть вечкемась, – мерсь Владимир Волков. – Неть чарькодематне а тонавтневить учебникень коряс, сынь а саевить Интернетстэ. Неть эрямо лувтне путовить тонавтыцянть эрьва чинь важодеманзо вельде, кастовить эсенк примерэнк вельде, «сельмеде сельмс», «седейстэ седейс» кортамонть пингстэ. Покш сюкпря тень кисэ, мельвановикс тонавтыцят!
Мордовиянь Прявтось мерсь, масторонь тонавтомань системанть икелев покш тевть путы «Образование» нацпроектэсь: совамс масторлангонь кемень сехте виев мастортнэнь юткс, ладямс тонавтомань системанть тиринь масторонь историянь ды культурань койтнень коряс.

Ёвтызе, таштамковонь 27-це чистэ масторсонть тешкставсь оштё вейке кенярксчись – Воспитателень чись.
– Эйдень кужонь важодицятне топавтыть покш тевть эйкакштнень кастомасо-тонавтомасо. Тонавтомань сехте васенце эскелькстнэсэ эйкакшось марязо мелень явома ды кисэнзэ мелявтома, чарькодезэ, сон ёроков, кармазо явомо мель тонавтнемантень, одонть чарькодемантень, – мерсь Мордовиянь Прявтось. – Тень туртов условият минь тейтяно.

Таштамковсто Мордовиясо меельце сисем иетнень перть панжозь 59 эйдень кужот. Ды течи республикасонть 3-7 иесэ эйкакштнень туртов улить таркат эйдень кужотнесэ. Улить башка стакачить яслянь группатнень коряс. Кавто иетнень перть строявить оштё кемголмово эйдень кужот Саранскойсэ ды республикань кавксо ёнкстнэсэ.
В.Д.Волков тешкстызе, Россиясь свал ульнесь содавикс тонавтомань койтнесэ, виев школасонть, тень эряви ванстомс, тевс нолдамс сехте вадря важодевкстнэнь, шкасонть варчазь программатнень ды методикатнень.
– Текень пингстэ минек образованиясь ладязо аволь ансяк течинь, истя жо вандынь сехте покш вешематненень. Меельце колмо иетнень перть строинек вете од школат. Истямо эрязачи республикасонть зярдояк арасель. Эрявить оштё од школат. 2024 иенть самс Мордовиясо строявить сехте аламо ниле школат: кавто Саранскойсэ ды вейкень-вейкень – Торбеевань ды Лямбирень районтнэсэ, – мерсь МР-нь Прявтось.

Ёвтызе, 2020 иестэ нолдави тевс «Земский учитель» программась, поладови тонавтыцятнень зарплатаст кастомась, ванстовить грантонь явоматне, од тонавтыцятненень пандовиця надбавкатне, велень тонавтыцятнень туртов социальной гарантиятне. Республикань 177 тонавтыцятненень пандовить премият олимпиадасо изницятнень анокстамост кисэ.

Вете иетнень перть школатнес ды эйдень кужотнес важодеме састь 2,5 тёжадо ламо од специалистт. Бути 2010 иестэ школатнесэ 35 иеде одт тонавтыцятнень пельксэсь ульнесь 7%, течи жо – 30%. Таштамковонь 1-це чистэ те отраслянтень састь оштё 500 ламо од тонавтыцят. Неть математикань, физикань, информатикань, омбо масторонь кельтнень тонавтыцятне.

– Тонавтыцятнень туртов сехте редявикс казнекс аштить сынст тонавтницятнень изнявксост. Тедеде Мордовиянь школасо тонавтницятне Весероссиянь олимпиадатнесэ сайсть 40 казнень таркат! – тешкстызе Владимир Волков. – Ёроков эйкакштнень туртов лицейсэ тонавтницятне сайсть 27 медальть раськеютконь пелькстамотнесэ. Нама, неть изнявкстнэнь удало тонавтыцятнень эрьва чинь стака тевест. Покш сюкпря тенк, вечкевикс тонавтыцят, важодеманк, превейчинк, мелень явоманк, седейлембенк кисэ! Кадык эйсэнк свал палы шкинемань толнэсь, а лепами эйкакштненень содамочинь каземань мелесь. Арсян тенк кеме шумбрачи, уцяска ды весементь сехте паронть!
Эсест пельде тонавтыцятне ды эйдень кужонь воспитательтне ёвтасть сюкпрянь валт республикань прявттнэнень ды башка Владимир Волковнень региононь педагогтненень лезксэнь явоманть кисэ.
МР-нь Прявтось явшесь государственной покш казнеть сехте вадря педагогтненень, истя жо явшесь дипломт ды ярмакт сехте вадря тонавтыцятненень, кить изнясть Весероссиянь пелькстамосонть.
Залонтень весе пурнавозтненень казевсть цецят Мордовиянь Прявтонть пельде. Вадря казнекс кармась мельстуиця концертэсь.

Татьяна АКСЕНОВА
Фототне Эдуард Ретунскоень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».