Ромоданова посёлканть куншкакурова ютамсто сельмес каяви кезэрень ашназа-сэнь зданиясь, конанть, кода карминек содамо, кувака ды мельстуиця историязо. Сон строязель 1901 иестэ, кода тесэнь храмонть сторожка. Умок уш арась те храмось, ансяк сторожкась яла эри. Тесэ 2014 иес роботась Ромодановань муниципальной историянь-краеведениянь музеесь, конась панжозель 1985 иестэ, сон пурназель историянь тонавтыцянть Черышевань ды лия эрицятнень вийсэ, а мейле райононь власттне саизь эсест вановт алов.
Зярдо районсонть кармасть мекев велявтомо кезэрень зданиятнень Рузонь Православной Церьковантень, музеенть ильтизь Ромодановань 1 № школав, а сторожкась ютась епархиянтень ды сонзэ юрсо благочинноенть Владимир Кугушевень вийсэ панжозель духовно-просветительской центра. Шкань ютазь мекс-бути те исторической зданиясь кадовсь чавокс. Райононь прявтось Сергей Ведяшкин, сонзэ полавтыцясь Елена Шаталина ды культурань роботниктне, конатне мелявтсть музеенть кисэ, пшкадсть епархияв энялдома марто: велявтомс зданиянть историянь-краеведениянь музеентень. Тевесь удалась, ды ней музеень сотрудниктне аламонь-аламонь одов кандтнить экспонатт кезэрень кудонтень. Теде миненек ёвтнесь сонзэ прявтось Ольга Владимировна Пыжьянова.
– Минь покш мельспаросатано, музеесь таго велявтсь тиринь кудозонзо ды ней уш, ловт, одкстомтозь. «Культура» нацпроектэнть лувсо миненек максозельть 2 миллионт 63 тёжадо ламо целковойть ды сынст лангс витнезельть-петнезельть колмо нупальтне, стенатне, кияксось, рамазельть витринат. Миненек прась уцяска понгомс проектэнтень, эдь минекесь вейкине музей Мордовиясо, конась ловови муниципальноекс. Июльстэ арсетяно панжомс музеенть официальна. Пароль бу эштё артомс фасадонть, арсетяно, теяк топавтови.
Тесэ панжовить кавто залт: этнографиянь ды воинской славань. Стявттано интерактивной доска ды киоск. Совамо нупалентькак а кадсынек чаво, арсетяно тозонь пурнамс эсенек ёнксонь артыцятнень выставкат.
Неть читнестэ Ольга Владимировна максы весе виензэ, штобу экспонаттнэ, конатнеде 1165, муевлизь эсь таркаст. Лездыть тензэ школань тонавтницятнеяк. Ней музеесь карми эрямо весе вийсэнзэ, а карми ваномо школань графикенть лангс ды азоравазо сонзэ истя жо карми вейке. Ольга Владимировна ней тесэ прявткак, экскурсоводгак, зярс весе тевтнень теи ськамонзо. Кода сонсь корты: «Ськамон весень кисэ ды весе – монь кисэ!» Пыжьянова комсь иеть роботась тосонь Культурань кудосо, ды ней сонзэ тердизь те таркантень. Образованиянь коряс сон биолог, ансяк пек вечки история.
– Эсеть семиянть, тиринь ёнксонть, масторонть историянть эряви содамс весенень, – корты музеень прявтось. – Мон тенень тонавтынь эсь эйкакшон ды карман содавтомо ней инжетнень. Фондонок сюпав, музейсэнть пурнавозтнень эйстэ невттяно ансяк 20 %. Залтнэсэ кармить невтневеме раськень оршамопельть, кезэрень курмот-кармот, тесэнь художниктнень артовкст, райононь содавикс ды почётной эрицятнеде материалт. Воинской славань залсонть пурнави информация Советской Союзонь Геройтнеде, ВОВ-нь участниктнеде, невттяно фронтовой сёрмат, казнеть, лия документт кода Ине Отечественной войнасо, истя жо Афганистансо тюриця воинтнэде ды СВО-нь участниктнеде. Экспозициясь карми одкстомтовомо эрьва иестэ.
Зярдо панжсызь музеенть, «Эрзянь правдань» корреспонденттнэ арсить эштё весть самс инжекс Ромодановав ды неемс весементь эсест сельмесэ.
Марина ДЕВЯТОВА