Тедедень мартонь 14-це чистэ саезь апрелень 20-це чис Мордовия Республикасо ютавтовсь Весероссиянь хоронь фестивалень региононь этапось. Сонзэ анокстыцятне-ютавтыцятне – МР-нь Культурань, раськень политикань ды архивень тевень министерствась, Республикань Раськень творчествань кудось ды Мордовия Республикасо «Всероссийское хоровое общество» аволь коммерческой партнёрствань филиалось.
Российской Федерациянь весе раськетнень культураст, кезэрень коест ванстомга ды раськень хоровой морамонть келейгавтомга 2022 иестэ фестивалесь ютавтови раськень койсэ морыця (истя жо фольклороньгак) хоровой коллективтнень марто.
Мордовия Республикасо фестивалень региононь этапсонть ёрокчист невтизь кемзисемге покш ломанень хоровой коллективть («Л2» категориянь) Покш Березникень, Покш Игнатовань, Инсаронь, Ичалкань, Ковылкинань, Кочкуровань, Чамзинкань, Атюрьевань, Краснослободскоень, Ромодановань, Рузаевкань муниципальной районтнэстэ ды Саранск ошсто, ниле профессиональной коллективть, колмо покш ломанень тонавтнемань коллективть Саранск ошсто («П2» категориянь), истя жо ниле эйкакшонь тонавтнемань коллективть («Л1», «П1» категориянь) Атюрьевань, Краснослободской, Рузаевкань, Торбеевань районтнэстэ.
Региононь этапонь участниктнень конкурсонь программась ульнесь колмо произведениясто, вейкесь конатнестэ моравсь a′cappella. Конкурсанттнэ морызь произведениятнень региононь морамонь коенть кирдезь, истя жо Россиянь ды Мордовиянь раськетнень койтнень-кирдатнень невтезь. Коллективтнень репертуарс совасть эрзянь-мокшонь раськень моротне, авторонь произведениятне, конат сёрмадозь раськень моронь лувсо, рузонь раськень моротне ды лият.
Фестивалень участниктне невтизь творческой ёрокчист репертуаронть кочкамосо ды произведениятнень морамосо. Сынь топавтызь весе эрявикс вешематнень, ды минь ёвтатано поздоровт Весероссиянь хоронь фестивалень региононь этапонь лауреаттнэнень.
«Л2» категориясонть III степенень лауреатокс кармасть: Кочкуровань райононь раськень хорось, «Крыныця» украинань моронь раськень хорось.
«Л1» категориянь II степенень лауреатонь диплом максозь Рузаевкань райононь «Пайгонят» эйкакшонь фольклоронь ансамблянтень.
«Л2» категориясонть II степенень лауреаттнэ: Ташто Шайговань райононь Ташто Теризморгань раськень хорось ды Инсаронь райононь «Мокшаваня» раськень фольклоронь ансамблясь.
Минь ёвтатано сюкпря муниципальной районтнэнь ды Саранск ошонь самодеятельной коллективтненень фестивальсэнть участиянть кис ды арсетяно тенст творческой тевтеемасост покш изнявкст ды весе аравтлувост топавтома.
Елизавета
КАТАЙКИНА,
«Республиканский Дом народного творчества» ГБУК-нь ведущей методист.