«Минь вейсэ!» фестивалесь прядовсь, ансяк сондензэ мейле кадовсь та-кодамо а ёвтавикс тансть, истямо, кодамо свал эрси, зярдо прядови кизэсь. Лиядсть ломантне, конатнень марто минь вастовинек, ды сынь кадовсть минек седейтнес. Самай сынст ютксот Удмуртиянь Алнашской райононь Оркино велестэ «Выль зардон» фольклорной ансамблянь бабинетне, конатнень морамост, киштемаст, валдо чамаст ды мизолксост сеске саизь полонс ваныцятнень. Эрьвась, ловт, эйстэст неинзе эсензэ сырькаензэ, теке вастовсь эйкакшчинть марто, зярдо бабинетне эштё ульнесть вийсэст.
Вана кода сёрмадсь сырькайтнеде Интернетсэ Саратовань инжесь Екатерина Морозова: «Дивавтымим сынст лиятнень ёнов а молиця энергетикась, валдо вановтост. Сормсевезь чамакиськест лангс апак вано, чамаст марявсть одокс ды валдокс. Марявсь, эйсэст чипаень лембе ды каштомосто ансяк таргазь кшинь тансть. Весень ульнесь мелест кутьморямс сынст марто, токшемс эйсэст. Сырькайтне, теке эйкакшт, кидеяк апак визде кенярдсть пертьпельксэнтень ды те ёжомарямось ютыль вакссост аштицятненень».
Миненекак сынь марявсть морыця вишка нармушкинекс ды кода а кортнемс сынст марто. Тень теинек мельспаросо.
Удмуртиянь бабинетне – Антонина Сергеевна Николаева, Анна Петровна Александрова ды Галина Сергеевна Балашова, конатнень минь «кундынек» Отяжелесэ «Шумбрат!» эрзянь ды мокшонь кенярксчисэнть, аволь васенцеде Мордовиясо, комсешка иеде икеле сынст тердтнинзе фестивальс «Торама» ансамблясь. Пек вечкевкшнесь. Тедедеяк Саранскоев сакшность покш мельсэ. Вастневсть ламо фольклорной коллектив марто, невтизь ёрокчист зярыя сцена лангсо. Сынь овсе аволь профессиональной морыцят – велень простой эрицят. Кие важодсь фермасо, кие лавкасо, кие колхозсо. Весе ламо эйкакшонь триця ават. Кеветее иеде теде икеле, зярдо аватне лиссть пенсияс, сась тенст мель панжомс эсест морамо курыне. Се шкастонть тёкшс кузекшнесть землячкаст – Удмуртиянь «Бурановские бабушки» ансамблясь. Сынст уцяскась, содавиксчись, макссь сёлмот ды эрязкавтынзе лиятненьгак. «Бути сынь истя куроксто теевсть «тештекс», мекс бу а варчамс миненекак?» – арсезевсть сырькайтне, ды истя чачсь «Выль зардон», эрзякс – «Од чилисемась».
Удмуртиянь сырькайтне морсить раськень кезэрень морот, сцена лангсо невтить койть-кирдат. Оршамопельтнень кие сонсь стакшнынзе, кие таргинзе горобиясто. Ледстявсть сюлгамонь-кирьгаксонь теемань койтнеяк: наряжизь пряст эрьгесэ, монистасо, пилекссэ. Весе моротнень ансамблясь морси гармошкавтомо. Сынст «паргинесэ» ламо эрьва кодат фестивальть аволь ансяк Удмуртиясо, лия ёнкссояк. 2013 иестэ аватне изнясть «Мир Сибири» этномузыкань раськеютконь фестивальсэ «Койтнень-кирдатнень ванстыцят» номинациясонть. Ульнесть лия покш изнявксткак, ансяк бабинетне аволь тень кисэ ардтнить: сынь бажить весенень невтемс удмуртонь лия ёнов а молиця культуранть. Ды теить тень седейшкава.
Мартост кортамсто минек дивавтымизь вейке ёнксось: эрьванть лавтов удало поводезель кескавсо нулань някине. Алнашской районсо истят «мунетне» (удмуртокс – няка) эштё кой-косо ванстовсть. Сынст пек дивавтыця историяст.
Кортыть, неть някатне эрьва кодамо тамашадо ванстыцят. Теевить сынь нуласто, конатне мекев-васов минень-сюнокс тапарявить, ды лиси някине прине, кедне ды рунгине марто. Фигурканть лангс оршавтови палине ды пацине. Ванстома някась анок. Бути туят васов, сонзэ эряви саемс мартот. Сехте паро поводемс «ялгиненть» удалов кескавс. А мешияк ды весемеёндо вансты апаро ломанде.
Истят някинетнень удмурттнэ путнилизь лавсес ансяк чачозь эйкакшонть пряпес, штобу ванстомс берянь ломанде, апаро сельмеде. Тешкстама, някатненень зярдояк а артыльть чамат. Кезэрень удмурттнэ кемильть, бути няканть ули чамазо, сестэ сонзэ эйс совави лия ойме, ды аволь свал те оймесь канды паро – сеедьстэ ансяк апаро тевть.
Ванстыця някатне ульнесть ломантнень марто весе эрямост перть. Сынст понгавтнилизь кудова, тейнильть свадьбаскак ды меельце киланговгак кулыцянть марто кандолазс путовиль «ялгинезэ».
Някинетне тейневильть аволь ансяк нуласто, лиясто сеньстэ, мезе кедь алов понгиль: пиче тарадсто, крёсткекс сюлмазь палкинестэ. Тевс нолдавсть пенге цюркинеть, сюродо, куловдо ды натой пурьгине палаксонь принетнеде пештязь кескавнеть.
Сэредиця ломаненть лецямга някинесь теевиль пиштяканть оршамопельстэ. Истямо няканть удмурттнэ кандылизь вирев эли путылизь ломанень а якамо таркас, максыльть тензэ лем ды энялдыльть лецямс ормалгадозенть.
«Те шкас те коесь эзь ёма, – ёвтнить «Выль зардон» ансамблянь морыцятне. – Минек Алнашской районсо улить истят таркат, ков ёртневить-кандовить неть някатне. Ансяк сындест киненьгак а содама, эйзэст эшкевезь, ломанесь, секень вант, карми сэредеме эли кудов канды зыян. Минек сырькаенек эштё ёвтнильть, келя, някатнень яла некшнилизь коткудавонь пизэ лангсто, сэрей чувто прясо понгавтозь эли кекшезь чувто потсто. Кедьс сынст саемс а мереви зярдояк!»
Вана истят мельстуиця ёвтнемат минь карминек содамо «Чилисемань» сырькайнетнень марто вастовомсто. Зяро раськеть эрить Россиянть келес – зняро сынст лия ёнов а молиця коест ды эрямонь лувост. Покш уцяска аламошкас вейсэндявомс сынст марто ды теевемс седе сюпавокс!
* * *
Те материалонть сёрмадомсто Удмуртиясто сась паро куля: сентябрянь 15-це чистэ тосо васенцеде тешкстызь Раськень оршамопелень чинть. Алнашской районось истя жо эзь кадово ве ёнов: тосонь эрицятне Интернетс путнесть эсест фотографияст удмуртонь мазый платиясо-панарсо #ЭтноМодно хештэгенть ало, сакшность эйсэст важодема таркав, ютавтозельть онлайн-викторинат, панжозельть раськень оршамопелень выставкат, эйкакштне школасо кунсолость урокт те теманть коряс, артсть някинеть, ютавтозельть этнодискотекат, козонь совамс меревсь ансяк раськень тешкс марто оршамосо. Пек паро мелесь-арсемась, удмурттнэ ней те чинть кармить тешкстамо эрьва иень сентябрянь колмоце пецястонть. Мекс бу миненекак а вейсэндявомс те од коентень ды а арсемс эсенек эрзянь ды мокшонь раськень оршамопелень чи? «Эрзянь правдась» кепеди кавто кедть те меленть кис!
Марина Девятова