Отяжелень райононь Аловелестэ Татьяна Николаевна Калашникова 45 иеть важоди эйдень кужосо стряпицякс-пидицякс. Сон уш комсь иеть пенсиясо, ансяк тевензэ кадомс мелезэ арась. Пек уш вечксынзе эйкакштнень ды эсь важодема тарканзо, свал бажи пидемс тантейстэ, оймень путозь. Зяро эйдеть трясь-андсь Татьяна Николаевна – а ёвтавить, а лововить.
Зярдо-бути Аловелесь ульнесь покш велекс, шабра велень эрицятне натой лемдилизь «Китаекс», колхозось гайнесь Мордовиянть келес, эйдень кужосонть таркаткак а сатыльть, 120 якицят ульнесть… Ней шкась полавтовсь, велеськак пек чамсь, ансяк кадозь кудынетне покордазь ваныть сувсо вельтязь вальмасост. Эйдень кужонтень якицятне ве кедь лапасо лововить, бути кизна седе ламо кармить якамо. Тевтне пиресэ, тингесэ, вирьсэ ламолгадыть ды бабатнень арась шкаст ваномс нуцькатнень мельга, секскак аютко шкасто сынст ильтить кужов. Тесэ пшти вановт ало ды свал тантейстэ андозь-симдезь. Татьяна Николаевна кудосояк икеле ламо стряпась, сонзэ колмо эйкакшонзо: Алёна, Владимир ды Елизавета. Сынь уш покшт, эрьванть ули эсензэ семиязо. Сырькаенть ниле нуцьканзо.
Исяк, июнень 13-це чистэ, Татьяна Николаевна Калашникова тешкстызе эсь чачома чинзэ, тензэ топодсть 65 иеть. Сонзэ эйкакшонзо, содамонзо, урьвазо, нуцьканзо арсить тензэ ламо паро ды казить истят валт:
«Вечкевикс авай ды сырькай!
Ёвтатано теть поздоровт чачома чить кувалма! Масторлангсо арась истямо ломань, конань бу минь путовлинек тонь ваксс. Тон минек сехте паро, сехте мазый ды сехте чевте седей ломаненек. Покш сюкпря теть миненек паронь тееманть кис. Ансяк тонь седей вакссо миненек лембе, ансяк тон седейшкава кецнят вадря уцясканок кис ды истя жо пек ризнат, зярдо мезеяк лиси апаро эрямосонок.
Авай, весе седейстэ арсетяно теть кеме шумбрачи, уцяска, оймеёжонь сэтьмечи, мелень-арсемань топавтома. Кувака эрямо теть! Эдь зярс тон эрят, семс минь кадовтано эйкакшокс. Кадык тонь кудовальмасот седе кувать а мади толось!»
– Зярдо эйкакштне вишкинельть, – ёвтни Татьяна Николаевна, – свал бажилинь уштомс каштомо ды каванямс сынст прякадо-сюкородо, сывель ямдо. Кодаткак мультиваркат, духовкат а эрявить, каштомось азоравантень сехте васенце лездыця. Ямтне-кашатне пиить, сеске каят кши, каймакт ды прякат. Весе цела чи андозь-симдезь. Саить ашо кшикочом – почодсызь сахарсо, рошксенть – чиньжарамонь ойсэ вадьсызь ды салсо верьга почодсызь. Кудосо-пиресэ тевтнеде свал ламольть, ракшатнеде цела кардаз. Ней кортыть, кияк ковгак а кенери, а кода минь од порасто весе кенерилинек? А содан. Нать, Интернетэсь сестэ арасель, тонась, келя, ламо шка салы, секскак ней, маряви, эрямось седе куроксто юты. Эли те сыречись истя сы…
Татьяна Николаевна сонсь ламо эйкакшонь триця семиясто. Тетязо-авазо трясть-кастсть кавксо эйкакшт, весень тонавтневтизь школасо, макссть, кадык аволь высшей, ялатеке образованият. Сынсь важодсть колхозсо ды арсесть эйкакшост туртов уцяскав эрямо. Секскак зярдо Таня тейтерест кортазевсь профессиядо, авазо ёвтась мель тонавтнемс поварокс. Кавто иеть училищасо теке толкс кивчкадсть, ды од поварось велявтсь мекев велев ды сеске саезель ансяк панжозь эйдень кужов. Ёжов ды виде рунго од тейтересь сеске тусь мельс эсест велень цёрантень, ды сынь налксесть свадьба. Татьяна Николаевнань мирдезэ истя жо пенсиясо, важоди велень хозяйствань предприятиясо ды кудоюткова. Мирдть-нить кирдить тувот, вазт, саразт. Кортыть, лездыть эйкакштненень, эдь ошсто паро сывель а муят, эсетсесь сехте вадря ды алкуксонь.
Татьяна Николаевна, роботадо башка, эштё кенери «Лисьмапря» эрзянь авань ансамблясояк морсеме.
– Пурназель те ансамблясь уш умок, – корты Калашникова, – сестэ эштё райононь прявтокс ульнесь М. А. Сурков. Сон ставтовтськак миненек эрзянь раськень оршамопельть, конатнесэ те шкас ардтнетяно морсеме концертс Отяжелев, Саранскоев «Шумбрат, Мордовия!» фестивалев. Пароль бу одкстомтомс, прявттнэ кортыть, ярмакт арасть. Сестэ монсь арсинь стамс эстень кезэрень кудавань юбкат-панарт, галойть, пижеть-ожот, ды теинь мазый конёвпанкссто «живой твет» – истя минек Аловелесэ мерить пряс путовиця цецянь каштазонтень, таргия лавтов лангс авань ташто маркизетовой пацянзо, конань эрзянь кудаватне пек вечкилизь ды свал ванстыльть горобиясо.
Татьяна Николаевна тешксты, эрзянь койтне кармить эрямо, бути минсь карматано ванстомост ды невтемест эйкакшонок туртов, кода минек покштянок-бабанок, тетянок-аванок. Лиякс а кода, эрзянь оймесь ды келесь ванстовить ансяк велетнесэ!
Марина Девятова