Кобалень Культурань кудокс 2018 иестэ витнезель-теезель икелень правлениянь кудось, ды ташто чувтонсестэнть (сон бувала ульнесь церковно-приходской школакс) велень библиотекась ды клубось ютасть эрямо одкстомтозь кудонтень. Ней те мазый, кавто этажсо зданиянтень кельгсть администрациясь, библиотекась, Сбербанкось ды актовой залось, косо ютнить эрьва кодат концертт ды лия мероприятият.
Теде башка, явозь нупаль этнографиянь музеентень. А вана омбоце этажсо 2022 иестэ появась содавикс ёвксонь героинянть, Яга-бабанть, эрямо тарказо. Те арсемась кивчкадсь велень эрицятнень марто кортнемадо мейле, конат ёвтызь мелест понгомс васоло эйкакшпингезэст, зярдо шождасто кемезеват тамашань тевс ды арсезеват: парось свал изнясы беряненть.
Яга бабань нупаленть лангсо важодсть Кобалень Культурань кудонь важодицятне. Неть: Елена Геннадьевна Кечуткина, Ирина Николаевна Конакова ды Марина Анатольевна Седойкина. Кедьчелькев аватне эсест вийсэ ды эсест ярмакто витнесть-тейсть Яга-бабань нупаленть потмонзо – эрьва кодамо тюсонь сурестэ кодасть карво пангот, шанжавт ды шанжавонь коцтт, тейнесть эрьва кодат налкшкеть – бабанть эрий ялгинеть: ватракшт, чеерть, гуйть, покш пря коршт, каткат, варакат. Мельтне-арсематнеяк ульнесть эсест, ве ёндо кияк эзь лезда. Кой-мезе рамазель: суреть, коцтт, артомапельть ды лия эрявикс кедьёнкст. Кой-мезе саезель ташто кудотнестэ – этажерка, ташто горобият, умонь шкаф, кшнинь кровать, самовар, столь, ковёр, шаршавт, кияксос ацамот ды ламо лия мезе. Каштомонть теемстэ лездась Михаил Геннадьевич Кечуткин – велень администрациянь прявтось.
Вана кода сёрмадозь А.С. Гринэнь «Алые паруса» повестьсэнть: «Тамашатнень эряви теемс эсеть кедьсэ. Бути ломанень оймесь веши тамашань тев – теик тень сонзэ туртов…» Ды Культурань кудонь важодицятне, мезеяк лангс апак вано, кундасть дивань тевентень, козонь нолдызь весе содамочист ды шкинемань виест. Ды ней, эрьва совицясь дивси сенень, мезе тейсть неть эряза аватне.
Тей совамсто понгат алкуксонь ёвксонь кудынес, конань азоравазо, ломань сэрьсэ Яга-бабась, васты эрьва совицянть ёжов мизолкссо. Теке мерят, пек кеци инжетненень, сонсензэ жо свал ули мелезэ «пидемс» эрьва совицянть покш ашо каштомсонзо, нама, те апаро тевенть теемс тензэ вестькак эзь удала. Яга-бабань нупалень потолокось вельтязь умонь эчке «шанжавсо», конась теезель раужо панкссто. Сюрдов-сярдов чувтонь тарадтнэ истя жо мазылгавтыть Яга-бабань нупаленть. Мерят, «азоравась» аволь умок сась вирьстэ ды поволесь костямс карво пангот (теезь кедьсэ: кодазь ды стазь), нать, меньгак пидевксэнь теемс. Этажерканть лангсо «морямопель» марто суликань кедьгетне ваныть инжетнень лангс эрьва кодамо сёрмадовкссо. Те корты седе – Яга-бабась машты мунямо, секс иля пеце сонзэ марто!
Истя жо тесэ муевить пертьпельксэнь материалонь ламо кедьгеть: илейстэ кодазь кептереть, покш човар марто тенсть – «ливтнема транспортозо», чувтонь кедьёнкст. Яга-бабанть вакссо эрить свалшкань ялганзо – превей покш пря коршось ды Баюн ёвксонь псакась…
Вана истямо ёвксонь таркасо Кобалень эйкакштнень марто ютавтневить ламо мельстуиця мероприятият, эрьва кодат налксемат, конкурст, викторинат, конат кувать кармить мейле ледстневеме сыцятненень. Истямо мероприятиясь, кадык аламос, ялатеке кадовтсынзе неень налкшкетнень – телефонтнэнь – ве ёнов ды кармавтсы абунгалеме эрьванть. Вана кода ёвтызе мелензэ нилеце классонь тонавтницясь Анастасия Девяткина: «Тесэ теке алкуксонь ёвксос понгат!» А Егор Куманёв мелень кепетезь мери: «Монь мельс пек тусь Яга-бабась, мерят, нейке сти ды карми якамо… Натой, аламодо пелезеват эйстэдензэ».
Яга-бабань резиденциясонть, Кобалень эйкакштнеде башка, ульнесть Дубёнкань школань тонавтницятне ды Аграрной техникумонь студенттнэ. Эйкакштнень туртов ютавтозель декоративно-прикладной творчествань коряс мастер-класс.
Культурань кудонь важодицятне паро мельсэ учить ве ёндонь инжетькак ды бажить теемс эштё зярыя нупальть ёвксонь тематнень коряс. Садо Кобалев эйкакшонк эли тонавтницянк марто! Чопавтеде ёвксос ды витинк ёжонк эйкакшпингень масторсо!
Илядо стувтне – тамашатне вакссонок!
Марина Агафонова