МР-нь Някань государственной театрась неть читнестэ ульнесь театрань зярыя фестивальсэ.
Чувашиясо ютасть «Карусель сказок» някань театратнень раськеютконь II-це фестивалесь ды «Одинаковыми быть нам необязательно» лия ёнов а молиця ваныцятнень туртов театрань образовательной раськеютконь VI-це фестиваль-форумось. Эсь путовксост невтеме тей пурнавкшность эрьва костонь театратне. Сынь невтсть спектаклят зярыя темань коряс: героико-патриотической, национальной, экспериментальной, моноспектаклят, бэби-театрат. Сыненст питне путсть театроведтнэ, критиктне, искусствань заслуженной деятельтне.
Минек театрась «Карусель сказок» фестивальсэ невтизе Л. Шаховань «Певец народной красоты» путовксонть, кона содавты ваныцятнень Мордовиянь народной художникенть Федот Сычковонь эрямонзо ды творчестванзо марто. Те спектаклясь лиссь изницякс «Раськень культурань невтеманть ды кепедеманть кисэ» номинациясонть.
Истя жо Някань театрась ульнесь «В гостях у Мойдыся» V-це фестивальсэ, кона ютась Сыктывкар ошсо. Тосо невтезель А.Финкень «Три поросёнка и Волк» путовксось. Сон пек тусь ваныцятнень мельс. Сынь сёрмадсть ламо лембе валт артисттнэнень. Тешкстызь актёртнэнь виев налксемаст, мазый декорациятнень, музыканть. Актёрось Иван Чиндяйкин казевсь «Омбоце планонь сехте вадря роль» номинациясо (Верьгизэнь роленть кисэ). Някань театрань труппась якась Коми Республикань Раськень музеев, косо сынст содавтызь коми раськень историянь ды культурань сюпавчитнень марто.
Анокстызе Татьяна Маторкина