Январень 19-це чистэ 90 иень юбилеензэ тешксты содавикс театроведэсь, режиссёрось, педагогось, РФ-нь культурань заслуженной важодицясь Василий Сергеевич Брыжинский. Комсь иень перть сон важодсь телевидениясо, мейле 25 иеть – Н. П. Огарёв лемсэ МГУ-со. Теезь-топавтозь ламо тевть: сон нолдась фильмат ды телеспектаклят, панжсь факультет ды тонавтсь студентт.
Чачома чидензэ икеле минек корреспондентэсь якась тензэ инжекс.
В. С. Брыжинский чачсь 1934 иестэ Кочкур буень Од Тягловка велесэ. А весе содыть, сон алкукс чачсь январень 7-це чистэ, Роштовань вене, ансяк метрикантень сёрмадызь се чинть, зярдо тетязо сакшнось документэнть кис.Вана кода сон ледстни эйкакш пингеденть.
– Велесэнек ульнесь ансяк начальной школа, косо тонавтнесть пек ламо эйкакшт, ве классонть – 30. Парта экшсэ аштинек колмонь-колмонь ломанть. Велесэнть Культурань кудо арасель, школась ульнесь клубокс ды пурнавома таркакс. Ломантне пек парсте морыльть эрзянь моротнень, ламо вайгельсэ. Сынь сынсь содасть, кинь васенце, кинь омбоце вайгелесь. Сцена лангсо эрьва покш чистэнть – концерт. Школасо тонавтницятне свал мезеяк анокстасть. Мон пек вечкилинь кунсоломо ды ваномо неть невтематнень. Ульнесть спектакляткак. Налксесть од ломантне. Явсть мель бытовой пьесатненень. Парсте мольсь Ф. М. Чесноковонь «Калдоргадсть ташто койтне» пьесась, мейле – К. С. Петровань «Ташто койсэ», конань ламоксть путнизь. Весень мельс пек тукшность спектаклятне. Неть невтематне совасть потмозон.
Войнадо мейле, зярдо тонавтнинь Семилеень средней школасо, тосо ульнесь пек паро драмкружок, конань ветясь Саранскоень тонавтыцясь Валентина Локтяева. Путсь мартонок пьесат. Ледстнян, минь тонавтнинек 9-це классо, сон саизе «Два капитана» аволь шожда пьесанть. Монень савсь тосо налксемс мик кавто рольть. Эрьва ие районсо ульнесть школань олимпиадат. Минек школась свал невтсь спектаклят. Весть эйкакштне арсесть путомс спектакля, кодаяк эзть муе пьеса.
Сестэ Василий Сергеевич мерсь: «Ужо, мон вейке пьеса неинь, кандса». Мезеяк эзь нее, сонсь арсесь сёрмадомс пьеса. Сёрмадызе. Весенень тусь мельс. Лемезэль – «Комсомольской билет». Фамилиясь, нама, лия ульнесь. Мейле патязо сёвнызе, мекс сёпизе лемензэ. Се шкасто саезь минек героесь сёрмалесь кой-мезть эсензэ туртов. Театрань тевесь пек вечкевсь тензэ. Мельсэнзэ ашти, кода тунда, зярдо тикшесь стадатненень зярс арасель, скалтнэнь ды реветнень ваныльть чаво паксява. Сестэ сынь ялганек стада ваномсто марилизь эсь пряст алкуксонь артистэкс: налксесть эрьва кодат рольть. Сынсь арсильть пьесат, сеедьстэ саилизь войнань теманть, косо ульнесть офицерт ды немецть, артыльть эстест погонт.10-це классонть прядомадо мейле пек бажась молемс театрань институтов. Ансяк эзь саво… Эрявсь туемс Московов, эрявсть ярмакт, косто сынст саемс ламо эйкакшонь триця семиянтень?
– Лелям мерсь: «Ков? Кодамо эйстэть артист? Школав сыргак!» Минек семиясо весе тонавтыцят: кавто патян, лелям, уряжом. Истя монгак карминь тонавтнеме Саранскоень учителень институтсо. Анокстасть эйстэнек рузонь ды эрзянь келень тонавтыцят. Тонавтнема шкасто налксинек спектаклясо. Кавто иеть тонавтнинь. Прядомадо мейле туинь Самара ёнксонь Покш Толканов. Вейке ие роботынь. Школадо башка, путнинек концертт ды спектаклят, сёрмадынь инсценировкат. Иень ютазь саимизь армияв, служинь колмо иеть. Армиясояк савкшнось налксемс военной пьесасо.
Армиядо мейле Василий Сергеевич велявтсь кудов. Важодсь Кочкур буень Од Мурзань школасо, ветясь рузонь кель ды литература. Мейле ульнесь обкомонь инструкторокс, ветясь политкружок. Ансяк оймезэ тердсь варчамс прянзо театрань институтсо. Сон сыргась Ленинградов, косо вете иень перть (1959–1964) тонавтнесь театрань, музыкань ды кинематографиянь институтсо. Мартост важодсть пек превей, эсь тевень содыця педагогт. Се шкане Василий Сергеевич сёрмадсь «Возвращение» покш пьеса. Макснизе ловномс тонавтыцятненень. Сынст мельс тусь, мерсть максомс путомс студентэнь театрантень, сон тень каршо ансяк визделгадсь…
Вузонть прядомадо мейле од ломанесь сась тиринь ёнксов. Тесэ ушодсь важодеме ансяк панжозь телевидениясо режиссёрокс. Роботась эйкакшонь ды литературно-драматической редакциятнесэ. Тосо весе ульнесть од ломанть, эрьвась содылизе эсь тевензэ. Кармасть путнеме спектаклят: Ф. М. Чесноковонь «Кавто киява», П. С. Кирилловонь «Учительница», К. Г. Абрамовонь «Найман», «Ломантне теевсть малацекс», «Качамонь пачк» трилогиязо ды ламо лият. Брыжинский путсь малав кеветее спектаклят. Меельце важодемазо – А. Я. Дорогойченконь «Большая Каменка» содавикс произведениянть коряс.
Сехте покш питне ваныцятне макссть К. С. Петровань «Ташто койсэ» спектаклянтень. Савкшнось налксемс аволь ансяк артисттнэнень. Аламо ульнесть келень содыцят. Сестэ тердсть од ломанть университетэнь национальной отделениясто, кинь ульнесь мелезэ налксемс. Студенттнэ эзть явово профессиональной артисттнэнь эйстэ. Спектаклясь мольсь кавто чокшнеть. Кармасть сакшномо сёрмат: невтинк эштё весть. Записьсэ мезеяк арасель, весе ютась видьстэ эфирсэ! Те стака, роленть эряви содамс педе-пес. Студиясь вишкинель, ансяк 22 квадратной метрат, пелензэ сайсь телевизионной покш камерась. Шкань ютазь Василий Сергеевичень ладизь главной режиссёрокс.
В. С. Брыжинский, спектаклятнеде башка, анокстась телеочеркть ды содавикс ломантнеде кинофильмат. Саемга, писательтнеде К. Абрамовдо, П. Левчаевде, И. Пиняевде, артыцядонть В. Илюхиндэ ды ламо лиятнеде. Теде мейле Василий Сергеевичень эрямосо ушодовсь од пелькс. Сон сёрмадсь эрзянь ды мокшонь раськень театранть коряс диссертация. Кармась важодеме Н. П. Огарёв лемсэ МГУ-нь эстетикань кафедрасо. Се шкане эрзянь ды мокшонь ломантне пурнавкшность васенце Инекужос. Мольсть покш кортамот эсенек театрань панжомадо, тиринь искусстванть кепедемадо. Вейке чистэ рана валске Василий Сергеевичень кудосо гайгезевсь телефонось. Гайневтсь Н. П. Огарёв лемсэ МГУ-нь сестэнь ректорось А. И. Сухарев, кона тердизе кортамо. Сон кортась од факультетэнь панжомадо, конась бу анокставоль эрзянь ды мокшонь искусствантень ды культурантень ломанть. В. С. Брыжинскиень седеезэнзэ прась те мелесь, те тевесь пек паро. Сон ёвтызе мелензэ лемдемс тонавтнемань од тарканть национальной культурань факультетэкс. Истя панжовсь од факультет, косо деканокс ладязель Василий Сергеевич. Сон састыне пурнась перьканзо ломанть, тонавтыцят. Панжозельть хоронь, хореографиянь, музыкальной, библиотечной отделениятне. Василий Сергеевич пек бажась панжомс актёронь отделения. Сон панжовсь. Вете иес весть пурнасть од ломанть. Сонзэ важодемстэ ульнесть кавто выпускт. Валонзо коряс, тонавтницятне ульнесть эрзят ды мокшот, содылизь тиринь келест. Факультетэсь нолдась ламо киштицят, морыцят, библиотекарть.
В. С. Брыжинский нолдась аволь аламо монографият, книгат, научной важодемат. Неть: «Народный театр мордвы» (1985), «Мордовская народная драма» (2003), «Сиянь рисьминеть. Мордовские народные игры и хороводы» (2002), «Мордовские народные игры» (2009, 2016), «Актёр классической школы» (2007). Неявикс таркасо ашти колмо томсо «Каргонь кинь ломанть» сагазо, косо 25 пьесат. Шкась невтеви Пугачёвонь восстаниянть шкасто саезь течис. Эрьва пьесась алтазь кодамояк шкантень. Событиятне молить эрьва косо. Эрзянь ды рузонь кельтнесэ книгатнень лездась нолдамс цёразо Сергей Васильевич. Рузонь драмань театрась путы те пьесанть коряс спектакля.
Василий Сергеевич Брыжинскийнень театранть ды телевидениянть лезэс покш путовксонзо кисэ максозь Россиянь ды Мордовиянь культурань заслуженной роботникень лемтне, аволь весть лиснесь МР-нь Государственной премиянь лауреатокс. Сон – лия ёнов а молиця, превей, алкуксонь ломань. Раиса Никоновна нинзэ марто вейсэ сэтьместэ ды апак сёвно эрясть малав 50 иеть (низэ зярыя иеде икеле тусь эрямосто). Чачтсть-кастсть кавто эйкакшт, цёразо Сергей – бизнесмен, тейтерезэ Марина – врач. Улить кавто нуцьканзо ды аволь умок чачсь правнуцьказо.
«Эрзянь правда» газетань коллективесь ёвты В. С. Брыжинскийнень 90 иень юбилеензэ кувалма седейстэ молиця лембе валт. Арсетяно кеме шумбрачи, вийть, паро ды сэтьме эрямо!
Татьяна Маторкина