Пятница, августа 14, 2020
Важное
 
Истямо лем ало историко-культурной форум даволковонь 7-це чистэ ютавтозель Торбеевасо. Сон алтазель Советской Союзонь Героенть М.П. Девятаевень подвигенть теемасто саезь 75 иетнень
топодемантень. Кода сон ютась, ловнодо седе тов.


«ТОНАЧИСТЭ ОРГОДЕМА»

Михаил Петрович Девятаев. А эряви толковамс, кие те ломанесь, мезень кис сонзэ лемс поэттнэ а лотксить сёрмадомо валморот, композитортнэ – ладсеме од морот, журналисттнэ – нолдамо статьят ды башка книгат, режиссёртнэ – фильмат? Весе масторлангось содасы, кодамо подвиг Михаил Девятаев тейсь Ине Отечественной войнасонть, конань толонзо пачк ютась ушодовома чистэнзэ саезь ды сонзэ прядовомас.
Ды ялатеке таго ледстясынек, мезень кис сонзэ лемесь, ламодояк ламо лиятнень марто, кить тюрсть эсест масторонть ды олячинть ванстомаст кисэ, сырнень буквасо сёрмадозь минек масторонь историяс. Лётчикесь-истребителесь Михаил Девятаев войнань васенце читнестэ саезь 1-це Украинской фронтсо 104-це авиаполконть марто эсензэ самолётсо фашисттнэнь эйсэ тапась апак лотксе. Менельсэ тюремстэ правтсь немецень вейксэ самолётт. 1944 иень июлень 13-це чистэ тол алов понгсь эсензэ самолётось. Пек пицевезь, сонензэ савсь кирнявтомс парашютсо. Прамсто ёмавтызе ёжонзо. Истя понгсь фашисттнэнь кедьс. Полонсо улемстэ лия лётчик марто васенцеде снартыксэль оргодемс 1944 иень умарьковсто. Весе оргодицятне кундазельть. Ильтязельть Узедом усиясо концлагерев, косо немецтне анокстасть од оружия – васов ливтиця «Фау-1» ракетанть. Тесэяк Девятаев эзь кадно оргодемадо меленть. Сынь, кеменнест, маштсть саламс немецень бомбардировщик ды оргодемс эйсэнзэ эсенектненень. Те оргодеманть сонсь Девятаев лемдизе рузкс «Побег из ада», эрзякс – «Тоначистэ оргодема». Те ульнесь 75 иеде теде икеле даволковонь 8-це чистэ.

ЛЕЗДАСЬ РОССИЯНЬ
ПРЕЗИДЕНТЭНЬ ФОНДОСЬ

Историяс совазь те подвигенть ды сонзэ теицянть Михаил Девятаевень лемензэ ледстнемга меельце шкастонть эрьва косо ютавтневить урокт, вастовомат, чокшнеть. Сынст ютавтомасо покш путовксозо эрзянь-мокшонь раськень Регионъютконь вейсэндявксонь исполкомонть, конань ушодксонзо коряс анокстазель проект ды кучозель Россиянь Президентэнь фондов. Проектэсь шназель, сонзэ топавтоманть туртов явозельть ярмакт. Сынст лангс нолдазь аудиодиск, кона ёвтни М.Девятаевень эрямодонзо, сонензэ алтазь календарь, портретэнзэ марто футболкат, лият-мезть. Весе сынь казнень таркас явшевить М.Девятаевень лемензэ марто сюлмавозь эрьва кодат пелькстамотнесэ изницятнень, школасо тонавтницятнень ды весе сетнень ланга, кинь лездамост вельде ютавтневить вере ёвтазь мероприятиятне.
Эрзянь-мокшонь раськень Регионъютконь вейсэндявксонь кирдийтне Ю.А. Мишанин, А.С. Лузгин, О.В. Дулкин аволь чавонь кедть сыргасть историко-культурной форумовгак, кона ульнесь даволковонь 7-це чистэ М.Девятаевень чачома велесэнзэ Торбеевасо истямо лем ало: «Девятаевень подвигезэ свал карми Россиясо эриця раськетнень мельсэ-превсэ». Сындест башка, Саранскойстэ якасть ломанть МР-нь Прявтонь Администрациянть пельде – Л.С. Александров, Культурань, национальной политикань ды архивной тевень министерстванть пельде – А.М. Кочеваткин, Мордовиянь И.Д.Воронин лемсэ республиканской вейсэндязь краеведческой музеень прявтось А.М. Чушкин, Мордовия Республикасо Россиянь ДОСААФ-нь прявтось А.М. Тюркин, А.С. Пушкин лемсэ Национальной библиотекань национальной ды краеведческой литературань отделэнь прявт библиотекаресь В.И. Пронина, Мордовия Республикань заслуженной поэтэсь Рая Орлова, Мордовия Республикань заслуженной артисткась Л. Князькова, «Мокшень правда», «Эрзянь правда» газетань, Мордовиянь ГТРК-нь, «10 канал» телепрограммань журналистт ды лия ломанть.

ЦЕЦЯТ ВОЙНАСО МАШТОВОЗТНЕНЕНЬ

Торбеевав пачкодезь, васня путозельть цецят войнасо маштовозтненень кеврунгонтень. Коень коряс, цецятнень путомсто каятотсь орудиянь зэрть. Залпонь нолдыцятне – од солдатт, конат састь Саранскойстэ. Мейле инжетне ютасть сывелень ды ловсонь промышленностень Торбеевской колледжев, косо ульнесь вастовомась. Васня содавтозельть те учреждениянть марто, косо анокстыть специалистт сывельстэ ды ловсосто ярсамопелень нолдамонь коряс. Экскурсиянть ютавтызе колледжень прявтось, Мордовия Республикань Госсобраниянь депутатось Ю.В. Тутуков. Сон мельспаросо невтнесь, мейсэ сюпав сынст учреждениясь. Эряви меремс, ульнесь мезе лангс варштамс ды мезентень дивамс. Эрьва кодат лабораториятнеде, компьютерной класстнэде башка од ломантнень туртов тесэ панжозь ламо спортивной секцият: виень варчнемань, сэрень кепсемань, чийнемань-якамонь ды лият. Анокстазельть выставкат, косо невтневсть оружият ды экспонатт, конат ёвтнесть Торбеевань районсо чачозь геройтнеде. М.Девятаевде башка Торбеевань мода лангсо эрямост ушодызь Советской Союзонь Геройтне С.Ф.Ахромеев, П.Т.Павлов, Г.Е.Резяпкин. Сынст леместкак тесэ а стувтнить. Кода М.П.Девятаевнень, Торбеевань куншкакуросо сынст туртов стявтозь кеврунгот.

Колледжганть якамсто редязель, эрьва косо понгавтозельть М.П. Девятаевень чачонзо марто покш баннерт. Героенть портретэзэ понгавтозель нупальсэнтькак, косо мольсь вастовомась.
Форумось, ков пурнавкшность седе ламо од ломанть, ушодозель Россиянь гимнанть гайгемасо. Васенце валось – Торбеевань прявтонтень С.Ф. Шичкиннэнь. Сергей Фёдорович тешкстызе: Торбеевань эрицятне покш мельспаросо аштить эсест землякост кисэ ды весементь теить сонзэ валдо лементь кепедемга.

ИСТОРИЯСЬ ВЕСЕМЕНТЬ АРАВТНЕСЫ ЭСЬ
ТАРКАВАНЗО

Форумсонть кортыцятне васенце меленть явсть сень лангс, кода омбо масторонь кой-кона «политиктне» ингельде пельде кармасть велявтомо ютазь войнанть марто сюлмавозь тевтнень, апак визде кенгелить Россиянть лангс, снартнить вишкалгавтомс Советской Союзонть путовксонзо изнямонть туртов. Те весе канды зыян весе масторонок туртов, сехте пек од ломантнень трямо-кастома тевсэнть. Секс, кода мерсь Ю.А. Мишанин, весементь эряви теемс неть кенгелематнень лоткавтомга. Тень туртов сехте виде кись – таргсемс архивтнестэ икеле кекшезь документтнэнь ды сынст вельде невтемс, мезень пачк савсь ютамс минек масторонь ломантненень ды кодамо питнесэ тенст сатотсь фашисттнэнь каршо тюремасо изнямось. Седе тов сон яволявтсь: «Течи минь пурнавинек сень кис: таго весть ледстямс алкуксонь историянть ды сеть ломантнень, кить тейсть те историянть се шкастонть».
Ютазь войнасо изнямонть туртов покш путовкс тейсь Мордовияськак. Теде кортыть Советской Союзонь Геройтнень леместкак. Сындест 123. Колоньгемень ломантне – «Слава» орденэнь кавалерт. Мельспаро ледстямс военачальниктнень, армиянь генералтнэнь лемест: М.А. Пуркаев, И.В. Болдин, С.К. Горюнов, контр-адмиралось И.Г. Блинков. Фашисттнэнь каршо тюреме Мордовиясто тукшность 250 тёжат ломанть. Сынст ютксто пелест эзть велявто мекев кудов. Ламотнень эйстэст те шкас апак сода, косо чавовсть, косо наксалить сынст ловажинест. Секс нейгак минек школатнесэ улить поисковой отрядт, конатне вешнить ды мукшныть сеть таркатнень, косо мольсть тюрематне ды чавовсть ломанть. Истямо отряд ули Саранск ошонь 28 школасо. Сон лемдезь М.Девятаевень лемсэ.

Эзть учне кармавтомат тылсэяк. Теезель Рославльской дивизиясь. Мордовиянь эрицятнень ярмак лангс теезель «Мордовский колхозник» танковой колоннась. Тесэ весе, сынст ютксо седе ламотне ават, якасть Сура чирева окопонь тееме, кона лемдезель «Сурский рубеж».
А зяро майсемат савсь печтямс тылсэ ломантненень, зяро сельведть валомс ютазь войнань шкастонть. Сынст эйстэ эзь мене Девятаевтнень кудосткак. Аванзо 13 эйкакштнень эйстэ (Михаил кемголмовоцель) сисемтне чавовсть войнас. Кодамокс эряви улемс, стувтындерясынек, зяро зыян кандсь ютазь войнась?
Кортамотнеде башка форумсонть гайгсть мороткак. Морыцятне – Мордовия Республикань заслуженной артисткась Л.Князькова ды Торбеевань артисттнэ. Невтезель «Догнать и уничтожить» видеофильмась.

СВАЛ ВАНЬКС УЛЕЗЭ ВЕЛЬКССЭНЕК МЕНЕЛЕСЬ

Улемс Торбеевасо ды а совамс М.Девятаевень музеев? Тосо весе экспонаттнэ ёвтнить Героенть эрямодонзо. Се чистэнть музейсэнть ульнесь эйкакштнень ютксо артовксонь пелькстамосонть, кона ютавтозель теде икеле, изницятнень каземаст. Марявсь, Торбеевасо арась истямо школа, косо тонавтницятне авольть тее эсест артовкст. Лисни, ютазь войнань темась токши сехте вишкинетнень седеесткак. Ансяк миненек, седе покштненень, эряви апак лотксе ледстнемс ды видестэ невтемс сень, мезе ульнесь сеть тюрематнестэ, зяро верь валозель, зяро эрямот сайсь ютазь войнась. Ансяк сестэ, зярдо весе кармить содамо, мезес пачти войнась, велькссэнек зярдояк а кармить зэрнеме орудият ды менелесь зярдояк а чополгады раужо качамосо.

Раиса ЩАНКИНА


О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».