Ноябрянь 3-це чистэ 75 иень юбилеензэ тешкстызе содавикс прозаикесь, Россиянь Писателень союзонь членэсь Николай Яковлевич Тремасов. Сон 1994 иестэ сась важодеме «Эрзянь правдав» корреспондентэкс. 2000 иестэ ладязель главной редакторонь полавтыцякс ды те таркасонть важодсь 2012 иенть самс.
Н. Я. Тремасов чачсь Дубёнкань райононь Дубёнка велесэ, сокицянь-видицянь семиясо. Тесэ прядызе средней школанть. Малав кемень иеть важодсь стройкасо каменщикекс, монтажникекс. Творчествань кинзэ ушодызе 70-це иетнестэ. Васенце зарисовканзо, корреспонденциянзо лиссть «Саранскжилстрой» трестэнь «Строитель» ламо тиражонь газетасонть. Теке жо шкастонть кеме сюлмот кирдсь республикань газетатнень ды Мордовиянь Гостелерадионть марто.
1981 иестэ сон ютась роботамо «Мордовпромстрой» трестэнь «Трибуна строителя» ламо тиражонь газетав, кавто иень ютазь ары сонзэ редакторокс. 1983 иестэ совась СССР-нь Журналистэнь союзс. 1985 иестэ прядызе Мордовиянь М. Е. Евсевьев лемсэ государственной пединститутонь химико-биологической факультетэнь заочной отделениянть.
Журналистэнь тевенть топавтоманзо пингстэ Н. Я. Тремасов ушоды художественной произведениянь сёрмадомо. 1983 иестэ «Звенья» вейсэнь сборниксэнть лиссь «Касарка» васенце ёвтнемазо, а уш 1989 иестэ Мордовиянь книгань издательствась нолдызе «Ржавый топор» ёвксонь васенце книганзо. 1991 иестэ нолдызе «Нежности волчицы» омбоце книганзо.
Ловныцятне мельспаросо вастызь Н. Я. Тремасовонь «Отказ от земного» повестень книганзо (1995). Сонзэ эйс совасть ниле повестть: вейкесь – фантастикань, косо эрямонь смустенть чарькодемга мода лангонсесь сюлмави космосонть марто, ды колмо ёвтнемат: вечкемадо, мелявксто ды ломанень уцяскадо, конань а кочксить, сон эрьванть эсензэ.
Авторось а стувтни эйкакштнедеяк. 1997 иестэ нолдазь «Какая бабочка красивее» книгась алтазь вишка эйкакштненень. 2011 иестэ лиссь «Дивань штере: ёвкст» книгазо.
Николай Яковлевич, сёрмадомадо башка, ютавты рузонь сёрмадовкстнэнь эрзянь кельс. Истя, 2004 иестэ Роштовань кенярксчинтень сонензэ максозель Саранскоень ды Мордовиянь Архиепископонть Варсонофиень пельде Почётонь диплом, церьковань сёрмадовкстнэнь эрзянь кельс ютавтоманть кис.
Вадря роботанть, раськень культуранть ды келенть касомантень покш путовксонть кис 2006 иестэ Н. Я. Тремасовнень максозь МР-нь культурань заслуженной роботникень лемесь.
Н. Я. Тремасовонь творчествазо лиятнень эйстэ явови домка арсемасо, сёрмадовицянть коряс аволь мельтемекс улемасо. Сонзэ произведениятне сёрмадозь вадря, мазый кельсэ. Авторось содасы эрямонть. Н. Я. Тремасовонь произведениянзо мельстуицят ды ловновить покш мельсэ.
Николай Яковлевичень нинзэ Галина Викторовна марто кавто эйкакшост – Светлана тейтерест ды Александр цёраст. Светлана, тетянзо ладсо, кочкизе сёрмадомань тевенть. Сон прядызе Московонь М. Горький лемсэ литинститутонть. Лиссь уш «Колыбельная» васенце книгазо, конань кис максозь тензэ Мордовиянь од сёрмадыцятнень ютксо лауреатонь лемесь.
Николай Яковлевич, «Эрзянь правда» газетань коллективесь арси тенк кеме шумбрачи, уцяска, паро ёжо, сэтьме эрямо!