Пенза ёнксонь Кузнецк ошсо эриця эрзянть, те ошсонть эрзянь-мокшонь национально-культурной автономиянь прявтонть Николай Алексеевич Пинясовонь ламот содасызь аволь ансяк Пензань областьсэ, Мордовиясояк. Свал тевсэ, свал эрязкали, кода сонсь корты, а вечки аштеме тевтеме. Кадык 70 иетне вачкодсть, ялатеке Пинясовнень а максат зняро.
Рунгонь молевтесь, келей лавтовтне, видьстэ сельмес ваномась – те профессиональной тешкст. Ды сынь сеске редявить. Сон – запассо офицер, милициянь уголовной розыскень икелень сотрудник, майор, конась эрямостонзо 20 иетнень (1974 иестэ саезь 1994 иес) максынзе Кузнецк ошонь ОВД-сэ служамонтень. Бути ледстясынк, «Отличник милиции» тешксэсь а весенень максневсь сеть шкатнестэ. Сонзэ алкукскак эрявсь служамс. Пинясовонь сон ули, кода улить «За безупречную службу» 3-це ды 2-це степенень медалензэяк. Николай Алексеевичень фотонзо а весть понгавтозельть ГОВД-нь почётонь лазтнэс. Ды а стяко. Милициясо сонзэ служамозо савсь ютазь пингень 80-90-це иетнес, зярдо масторсонть мольсь перестройкась, виест невтсть бандитэнь группировкатне, государстванть ушодсть саламонзо-явноманзо. Неть кажварчтнеде, зыянтнэде тиринь ёнксонть идемась Пинясовонь туртов кармась, рузкс меремс, «делом чести».
Ды аволь ансяк важодеманть коряс, эсензэ, кода од ломаненть, нама, ульнесь мелезэ эрямс сэтьме таркасо, кастомс эйкакшонзо кидеяк апак пеле. Ламо савсь важодемс тень кувалма. Шкань ютазь преступникень вейсэндявксось яжазель ундокс видьс, ошонь Горводоканалось велявтозель муниципальной азортнэнень. Милициясто туемадо мейлеяк оймесь вешсь тевть, ды сон «педясь» общественной тевтнес. Пинясов ней Кузнецк ошка Россиянь ОМВД-нь ветеранонь советэнь прявт. Ды аволь ансяк. Те ошсонть сон сови ламо общественной вейсэндявкстнэс, Боевой Братствас, Пензань областьсэ коррупциянть каршо тюремань нацкомитетэнь представитель… Весе тевтне-валтнэ а ёвтневить. Николай Алексеевичень несак эрьва косто ды сон свал ялга-оя марто, конатне кирдить мартонзо алкуксонь патриотонь лувонть. Сон свал флаг марто ды ансяк икеле! Те эрзянь цёрась пии-палы тиринь ошонь экологиянть, од ломантнень кис, ансяк бу сынь а стявольть берянь ки лангс ды кочкавлизь виденть. Кода кастомс тиринь ёнксонь вечкицякс од цёрынетнень-тейтернетнень? – кевкстинк Пинясовонь. Специальной военной операциянть ушодовома шкасто сон седеяк эрязкавтызе важодеманзо те ёнксонть коряс. Школасо тонавтницятнень, тетяст-аваст марто вастовоматне-кортнематне ютавтневить малав эрьва недлясто. 2023 иестэ Николай Алексеевич ялганзо марто Кузнецкоень школатнесэ спецоперациясонть чавовозь цёратнень лемс панжсть кемгавтово мемориальной лазт ды «Героень партат». Общественной роботанть кис сон аволь весть казезель покш правительственной ды ведомственной казнесэ.
Николай Алексеевич уш кеменде ламо иеть Кузнецк ошонь эрзянь-мокшонь автономиянь прявт, конась сови Пенза ёнксонь автономиянтень. Эрзянь цёрась чачсь-кассь Ульяновской областень Николаевской райононь Губашево эрзянь велесэ. Кузнецк ошов пачкодсь истя: сась тей тонавтнеме зооветеринарокс, а мейле кись ветизе тезэнь райотделс ды тиринь келесь кармась стувтовомо. Ошось – рузонь, эрзят а неят, а муят. Ансяк кие кекшеви икелень милиционердэнть? Кияк! Пинясов муинзе весень ды полады вешнеме, пурнамо вейс. 2012 иестэ ушодовськак Кузнецк ошонь эрзятнень ды мокшотнень вейсэндявомась. Вастовоматне ютнить библиотекатнесэ, выставкатнесэ, Пензань областень национальной фестивальтнесэ, конатнень сынь зярдояк а бажить менстямс. Тиринь кельтнень а стувтомга тесэ сёрмадыть диктантт, ваныть фильмат, сёрмадстыть ды ловныть газетат ды журналт. Николай Алексеевичень лездамонзо вельде минек «Эрзянь правдась» уш омбоце ие пачтяви Кузнецк ошонь эйкакшонь ды покш ломанень весе библиотекатнес. Пинясовонь покш мелезэ содамс, кода эрить эрзятне-мокшотне Мордовиясо, диаспоратнесэ, секскак сон мельспаросо ардтни весе вастовоматнес, яксесь «Равось – ояксчинь лей» этнокультурной экспедицияс, лиясто пачколи Саранскоев эли кучни инжеть автономиястонть, штобу сынь сюлмавольть ялгаксчинь сюлмот редакциянть марто.
Те пондельникстэнть, октябрянь 23-це чистэ, Николай Алексеевич тешкстызе эсь юбилеензэ. Миньгак сюлмавтано вейс сеть поздоровтненень, конатне састь тензэ те кенярксов чистэнть. Арсетяно ансяк кеме шумбрачи, а ютыця эрязачи, эштё ламо иеть кандомс лезкс эрзянь раськентень, тиринь ёнксонтень ды маласо ломантненень.
Марина Девятова
«Эскеть бу теемс
истят ломантнестэ…»
Николай Алексеевичте ёвтнемась а карми пешксекс, бути минь а ёвтнетяно сонзэ кудораськеденть, конасонть сон чачсь ды конанть сон пурнызе-теизе малав 50 иеде теде икеле. Кода уш ёвтнинек, Пинясов чачсь Ульяновской областьсэ эрзянь покш семиясо. Тетязо, Алексей Иванович, ды авазо, Наталья Павловна, тонавтсть эйкакштнень улемс видечинь кирдицякс, а манчицякс, вишкинетнень ды сэредицятнень кисэ аштицякс. Истямокс Коля касськак. А кода сон вечкиль ракшинеть! Секскак тусь тонавтнеме Пенза ёнксонь Кузнецк ошонь зооветеринарной техникумов. Мартонзо тонавтницятне те шкас ледстнить, кода сон а вечкиль ломань лангсо раксицят, свал стиль сетнень каршо, кить покордыльть тейтерькатнень эли згилильть тонавтыцятнень лангсо, секскак тензэ мерсть «Шеф». Сонзэ редизь ошонь райотделсэ ды саизь дружинникекс. Техникумонть прядомадо мейле од цёрась аламошкас важодсь колхозсо ветеринарокс, мейле саезель армияв. Служась десантникекс, мейле таго велявтсь Кузнецк ошов ды мусь тарка уголовной розысксэ. Тесэ вастовсь сы шкань вечкевикс нинзэ Валентина Ивановна марто, конась кармась од милиционерэнть кеме нежекс. Сонсь жо Пинясов сеске теевсь ошонь легендакс: кидеяк а пелиця, прявттнэде а виздиця, вал мельга зепес а эциця. Обуцянь неть ёнкстнэ а весенень вечкевсть, колмо каявомат лангозонзо ульнесть важодеманзо шкасто. Роботадонть ламоль, ансяк содамочитненьгак эрявсть кепедемс, ды Николай Алексеевич кармась заочна тонавтнеме Московсо МВД-нь академиясо, конань парсте прядызе 1984 иестэ, ды ютась важодеме оперативной дежурноекс.
Кинь мирдезэ эли малавиксэнзэ роботыть полициясо, содыть, кодашка канст кандыть сынст козяйкатне. Валентина Ивановна жо мирдензэ марто трясть-кастсть ниле эйкакшт: колмо цёрат ды вейке тейтерь. Ламо эйкакшонь триця семиясь кенериль эйкакштнень футболс, хоккейс ды эрьва кодат кружокс ветнеме. Эрямось мольсь кода весень, эйкакштне кассть. Састь 90-це иетне, кода весе масторсонть, эрямось стакалгадсь, оштнень пештизь бандитэнь группировкатне, сестэ пек ламо од ломанть стясть а виде, зыянов ды куломас ветиця ки лангс. Пинясов майорось, кода «Спрут» содавикс фильмасонть Каттани комиссарось, ульнесь сеть ломантнестэ, конатне ветясть покш тюрема закононь колсицятнень марто. Истя лиссь, вейке банданть мельга пансемстэ, сонензэ савсь салава тозонь совавтомс Ваня цёранзо. Тень кувалма Николай Алексеевич янкси весе эрямонзо перть – цёранть чавизь… Вейке вачкодьксэнть мельга омбоце: Коля цёразо армиясто самсто экшендсь, эзизе вансто прянзо, кудов сазь, понгсь больницяв. Врачтненень эзь изняво ормась – сепсис.
«Бути аволь роботам ды превей ним, а содан, мезе бу мартон улевель, – корты Николай Алексеевич. – Истямо монь, нать, крёстом, конась максови эрьвантень виензэ коряс, ды мон карман кандомонзо, зярс Пазось максы. А стяко кортыть, весе эрямось – те тюрема!»
Ней Николай Алексеевич мельспаросо ашти тейтерензэ Наташань ды цёранзо Алексеень кувалма, сонзэ ниле нуцьканзо ды вейке правнукозо. Ды сон весе эрямонзо перть кадови тенст кеме нежекс ды превс путыцякс. Тетяст меремазо сынст туртов – закон! Сонензэ пек ладить поэтэнть Н. Тихоновонь стихотворениясто валтнэ: «Эскеть бу теемс истят ломантнестэ, масторлангонть келес а муевить седе кеме эскеть!»