Вечкевикс ловныця, тон зярдояк неить килеень гигерь лангсо касыця вирть, чудиця лейть, сэрей пандот, чилисемат ды Мода лангонь ламо лия мазычить? Бути эзить, сестэ тонеть эряви самс Раськень культурань музеев. Ансяк весемеденть ёвтнетяно мельга-мельцек.
Октябрянь 17-це чистэ Эрзянь ды мокшонь раськень культурань музейсэ ушодызе эсь важодеманзо «Берёзовые ситцы» выставкась, кона алтазь декоративно-прикладной ды народной искусствань мастерэнтень, МР-нь народной художникентень, Россиянь Художникень союзс совицянтень А. И. Занкиннэнь 75 иетнень топодемантень.
Васняяк Л. П. Кирюков лемсэ музыкальной училищань студенттнэ Егор Макаров ды Максим Кортиков кецявтызь инжетнень аккордеонсо седямосост.
Выставканть панжомо сакшность ялганзо, малавиксэнзэ ды творчестванзо вечкицятне. Ламо лембе валт ёвтазельть юбиляронтень те чистэнть. Культурань, раськень политикань ды архивень тевень министранть Светлана Баулинань пельде выставканть панжоманзо кис сюкпрянь валт ёвтась сонзэ васенце полавтыцясь Александр Иванович Карьгин. Истя жо лембе валт ёвтась С. Д. Эрьзя лемсэ музеень прявтось Л. Нарбекова. Юбиляронтень сон пачтизе поздоров марто телеграмманть, конась Александр Занкинэнь лемс сась Московсто РФ-нь Художникень союзсто.
Александр Иванович Занкин чачсь 1948 иень октябрянь 28-це чистэ МАССР-нь Кочкуровань райононь Кочкур велесэ. Ансяк, кода тешксты сонсь художникесь, сонзэ кавто тиринь ёнксонзо: «Зярдо тень топодсть нилешка иеть, тетянь-авань ютавтызь важодеме Краснослободск ошов. Авам важодсь банксо, тетям – медицинасо. Истя кадовинекак Краснослободскойс».
1981 иестэ Саранскоень Ф.В. Сычков лемсэ художественной училищань художественно-оформительской отделениянть прядомадо мейле Александр Занкин ламо важодсь дизайн марто. Ды натой студентэкс улемстэ, ХХ пингень 70-це иетнень прядовомсто, ойсэ ды акварельсэ артозь сонзэ пейзажтненень ды натюрморттнэнень путозель покш питне ошонь ды республикань выставкатнесэ.
Инна Ивановна Видяева, икелень журналистэсь ды художникенть умонь ялгазо, ёвтась истят валт: «Александр марто лиснесть кажоткак. Палокшность малав весе картинанзо… Ансяк, паряк, те ульнесь Пазонть пельде невтевкс: сон муизе эсь прянзо допрок лия материалсо, теке седеензэ панжизе весенень, ды ней минь нетяно сонзэ гигерень живописензэ. Мезе ашти ансяк «У лукоморья дуб зеленый» теевксэсь! А ёвтавияк, кодамо вадря тосо раужо каткась, кона яки рисьмеланганть. Ды эрьва важодевксэзэ – те цела философия ды певтеме мазычи!
Ансяк вана монь ацирьгавты се, мекс народной художникенть те шкас арась мастерскоезэ ды весе важодевксэнзэ теи… кудосо, эсь квартирасо. Ды, нама, весе тень пингстэ сонзэ ангелэкс-ванстыцякс ашти вечкевикс низэ Зоя. Секскак мон ёвтан поздоровт течинь выставканть кувалма аволь ансяк тонеть, Александр, истя жо Зоя нить туртовгак…» Вана истя ялгадонзо мелявтозь кортась Инна Ивановна.
Ансяк весементь лангс Зоя Николаевнань ульнесь эсензэ вановтозо. «Васняяк, ёвтавлинь сюкпря весенень, кить тей састь. Тынь алкукскак тиринь ломанть аволь ансяк мирдем туртов, монь туртовгак. Тесэ ламот ризныть, мекс Сашань арась мастерскоезэ. Ансяк, койсэнь, те пек вадря, мекс сон важоди кудосо. Арсинк тынсь, весемесь тееви монь вановтом ало: те жо – шкастонзо максозь ормаменькст ды онкстазь верень давлениясь, шкастонзо сэвезь ямось ды ламо лия тувталт», – вана истя оймавтынзе ризныцятнень Зоя Николаевна, алкуксонь мелявтыця нись ды кеме кудоюртонь ванстыця авась.
«Берёзовые ситцы» невтевкссэнть гигерьстэ ды чувтосто анокстазь малав 200 роботат. Пек вадрясто теезь кедьгетне мазылгавтовлизь куш кодамо нупаленть, седеяк пек велень каштомикелькстнэнь ды ошонь пидема-панема таркатнень.
Важодевкстнэнь сюжеттнэ эрьва кодат – мазый пертьпельксэсь, зярыя жанрань композицият, православиянь тематне. Ламо иень перть шкинемасо важодезь, Александр Ивановичень кармась эсензэ, киньгак ёнов а молиця лувозо. Сон – васенце художник, кона ушодсь эрзянь раськень тешкстнэнь (орнаментэнть) артомо гигерь лангсо. Керсемась, тиснениясь, росписесь, тонированиясь, артомась, пултамось (выжигание) – гигерь марто важодемань весе лувтне сюлмавсть сонзэ теевкстнэсэ, конатнень эйстэ моли кудонь лембечи ды валдо.
Килеень гигересь – пек мазый материал, эйсэнзэ ламо эрьва кодат тюст: сельмень кериця ашосто саезь чопода-тюжас, мезесь максы теемс эйстэнзэ мазый ды седейс совиця картинат. Гигерь ланга артомась содавикс ХV пингестэ саезь, ансяк течи мартонзо важодить пек аламот. Пертьпельксэсь «артсы» гигеренть эсензэ ладсо, мазылгавты эйсэнзэ эрьва кодамо кикстневкссэ, тешкссэ. Азё вешнек, мезе «ёвтыксэль» теть истямо «артовксось». Тесэ эряви арсемс ды неемс сень, мезесь а сеске неяви-чарькодеви. Аволь эрьвантень тееви пертьпельксэнь мазычистэнть апак кола картина. А.И. Занкиннэнь те тееви. Сонзэ паннотнень сюжеттнэ – мазый пейзажт, лейть, сёлтт, церькова марто вирть... «Лесное озеро», «Музыка и море», «Среди скал» ды лия композициятне малавикст ваныцятненень, паряк, секс, эдь эрьвась эйстэст неи тиринь ёнксонь мазычинть. Неень выставкасонть невтневить гигерень 30 паннот.
– Александр Иванович, кода тееви истямо мазычись?
– Эрьва важодевксэсь тееви куватьс. Васняяк эрявикс гигеренть эряви муемс, мейле костямс, илязо киря. Весе пейзажтне теезь ташто чувтонь гигерьстэ. Вана «Лунная дорожка» васенце важодевксэм. Зярдо керия чувтосто керенть, сеске састь мельс истят ледстнематне: эйкакшпингстэ веть аштекшнинь Мокша леенть чиресэ ды неинь, кода Ковонть эйстэ ведьганть венстявсь валдо ян. Ней вана сон тесэ, артозь, ансяк ожо ковонть конёвсто керия ды педявтыя. Истя лиссь анок картина. Ды се шкастонть саезь карминь ваномо, мезе ёнов моли те-тона гигересь.
– Косто сась вечкемась важодемс чувто марто?
– Мон ульнесь покштям, кона эрясь Кочкуровасо, сон кулось 93 иесэ. Юткошкасто свал кодыль карть. Вишкине сестэ ульнинь, вечкинь тензэ «лездамо». Ледстнян, сон кодасы каренть, кадсы ваксозон, сонсь туи тевень тееме, а мон те шкане калавтса – бажинь содамс, кода каресь калады. Сы покштям, варшты, каресь калавтозь. Прянзо кундасы: «Вай, Саша, мейс таго калавтык?..» А монень те тевесь марявсь пек мельстуицякс. Покштянь лемезэль Осип Кузьмич, секскак куринкасонть сонзэ тетянзо лемсэ мерильть тенек – кудонь леменек ульнесь Кузинькань.
– Косто сайнетядо артомань мельтнень?
– Лиясто сонсь пертьпельксэсь ёвты, кода лемдемс ды мезе теемс те эли тона гигеренть марто. Кода-бути весть молян вирьга, ванан, килей ашти ашо-ашо. Сеске чачсь мель теемс пейделькань кужо. Мон ансяк керинь сынст гигеренть лангс ды артовксось ульнесь анок.
Кода мерсь умонь ялгазо, МР-нь заслуженной художникесь ды РФ-нь Художникень союзс совицясь Валентина Козлова: «Александр Иванович – уникальной художник. Монь сехте пек дивавтыть сонзэ пейзажтне. Те кода истя эряви неемс пейзаж кочказь чувтонть лангсто! Валт арасть… Ды мезесь нусмакавты, зярс минь эрятано – киненьгак а эрявтано, куломадонок мейле кармить кортамо ланганок, кодат ине ломанть ульнинек, ды ушодыть тонавтнеме творчестванок. А мекс бу тень а теемс эрямсто? Минь минсь ламо мезе бу ёвтневлинек эседенек…» – нусмакалесь Валентина Филипповна.
1975 иестэ саезь Александр Иванович ульнесь республикань, регионъютконь, весероссиянь, раськеютконь выставкатнесэ. Сон – весероссиянь ды раськеютконь конкурстнэнь ды фестивальтнень дипломант. Важодевксэнзэ ванстовить С. Д. Эрьзя лемсэ музейсэ, Россиянь ды омбо масторонь частной пурнавкстнэсэ.
Выставкась карми важодеме Эрзянь ды мокшонь раськень музейсэ ноябрянь 7-це чис. Моледе, ванынк певтеме мазычинть!
«Эрзянь правда» газетань коллективесь Александр Ивановичнень арси кеме шумбрачи ды ламо вийть! Седейсэнзэ свал моразо килеень симфониясь ды творчестванзо вечкицятнень оймес кадовозо свалшкас! Икелепелев улезэ эштё аволь вейке юбилейной выставка! Чачома чи марто, ине артыця!
Марина Агафонова