Понедельник, августа 15, 2022
Важное


Покш Игнатовань районсо «8-ое Марта» ООО-сь – велень хозяйствань прявт предприятиятнестэ вейкесь. Сон ашти Ташто Чамза велесэнть ды максы важодема таркат маласо аштиця зярыя велетнень эрицятненень.

Неень шкане предприятиясь важоди сюронь, ламбамо якстерькаень ды тикшень кастомань, сюракшов ракшань трямонь ды ловсонь потявтомань ёнкстнэсэ. Хозяйстванть прявтсо дока ды эсь тевентень чарькодиця аграрникесь Николай Иванович Куманев, конань весе эрямозо сюлмавозь велень хозяйстванть марто.


Весе тевтне прядовома лангсот

Сёксесь сюпав тевсэ велень хозяйствань куш кодамо предприятиянть туртов: прядыть кадовозь сюротнень ды кукурузань урядамонть, пивсыть чиньжарамонть, таргить ды ускить ламбамо якстерькаенть ды, нама, видить озимойтнень ды анокстыть модатнень тундонь видематненень. «8-ое Марта» ООО-со весе неть тевтне топавтозь, кадовсь ансяк ускомс ламбамо якстерькаенть. Кавто-колмо чинь ютазь сонзэяк прядсызь.
– Тедеде ламбамо якстерькайденть видезельть 2200 гектарт. Гектарсто саинек 350 центнерт, зачётсо – 300 центнерт, – ёвтни «8-ое Марта» ООО-нь прявт агрономось Валерий Левщанов. – Иень коряс невтематне а берянть. Кизэсь тедеде псиль ды коськель, седе ламо учомс эзь саво. Истя жо лиссь сюротнень коряскак. Озимой товзюрось макссь 26,5 центнерт гектарсто, яровоесь – 25 центнерт. Шужось лиссь 27,5 центнерт, сюрокс кукурузась макссь 50 центнерт гектарсто. А вана силосокс кукурузась кассь а берянь, сондензэ анокстынек байтяк, ракшатнень андомс саты. Сатышка анокстазь тикшедентькак.
Теке марто Валерий Евгеньевич тешкстызе, тундонь видематненень весе модатне соказь-изазь. Озимень сюротнеде видезь 1,5 тёжат гектарт.
– Важодемасонть механизатортнэнень пек лезды техникась. Сон минек хозяйствасонть малав весе вадря, неень шкань. Автопарконок меельце иетнестэ одкстомтовсь а беряньстэ. Ней вана аволь умок раминек од бензовоз. Сон пачти уштомапеленть паксясо важодиця трактортнэнень ды машинатненень, – ёвтни агрономось Валерий Левщанов.
Ней хозяйствасонть прядыть ламбамо якстерькаенть урядамонзо. Техникась важоди чинек-венек, штобу весе роботатнень прядомс седе куроксто. Истя, эштё кавтошка-колмошка чить ды сон весе ускови. Весе якстерькаенть пачтить Ромодановань сахаронь теема заводов. Те предприятиясь сонськак лезды хозяйстватненень якстерькаенть урядамосо: максы тенст весе эрявикс техниканть, лезды касовкстнэнь усксемасо. Эряви меремс, неть тевтне прядовома лангсот республикань велень хозяйствань весе предприятиятнесэ.

Важодемань чизэ ушодови сехте васенцекс

Николай Иванович Дорофеев «8-ое Марта» велень хозяйствань предприятиясо важоди водителекс. Сась тей 2016 иестэ ды сеске озась руль экшс. Сонзэ лангсо ашти лия велева эриця роботниктнень важодема таркав ды мекев кудов пачтямось.
– Роботан УАЗ автомашинасонть. Техникась од, рамазель ютазь иестэ, – ёвтни Николай Дорофеев. – Руль экшсан 1985 иестэ саезь, роботамс савкшнось эрьва кодамо машинасо, ульнесть истяткак, конат седе ламо шкань перть витневсть. Одонть марто, кода илязо уле, покш мелявкст арасть. Вант ансяк важодеманзо мельга, шкастонзо полавтт мезенть эряви ды весе.
Н. И. Дорофеев чачсь теске, Ташто Чамза велесэ. Школанть прядызе ды тонавтнеманзо седе тов поладызе Орданьбуесэ. Тосонь ДОСААФ-со тонавтнизе водителень тевенть ды получась прават.
– Тонавтнемадо мейле служинь армиясо, тосояк, эряви меремс, ульнинь водителекс. Мейле, зярдо велявтынь, важодинь тесэнь ПМК-со, аламос тукшнынь Нижней Новгородов. Тосо, паряк, колмошка иеть ульнинь автобусонь ветницякс. Кувать ошсо эзинь кирдеве, тиринь велесь эйсэнь тердсь-учось. Сынь ды уш мекев ковгак эзинь сыргсе. Эсеть кудосо, семият вакссо ков седе паро. Хозяйствасонть ней вана уш зярыя иеть роботан. Зарплатанть пандыть шкастонзо ды а берянь. Мезе эштё эряви? Пек паро коллективенек. Эрятано ояксчисэ, вейке-вейкенень лездазь. Прявтонок, Николай Иванович Куманев – алкуксонь азор, эсь тевень содыця ды чарькодиця. Сон муи кель-вал эрьва важодицянть марто, лезды аволь ансяк валсо, тевсэяк, – тешксты Николай Иванович.
Теке марто Николай Дорофеев корты, роботась сонзэ а шождатнестэ. Сон ускси лия велетнева эриця важодицятнень, тесэ скалонь потявтыцятнеяк, механизатортнэяк, секскак валскень 3 чассто сон уш важодема таркасо. Скалтнэ чинь куншкас учомо а кармить, сынст потявтомат шкасто. Секскак важодемань чизэ ушодови сехте васенцекс. Истя жо, зярдо паксятнесэ важодить, цёрась ускси тов ярсамопель. Лиякс меремс, сонтемензэ ковгак.

Од специалисттнэ – хозяйстванть нежезэ

Од цёратне Александр Самилкин ды Павел Вирясов хозяйствасонть важодить механизаторокс ды сварщикекс. Сынь кавонест прядызь Кемлянь аграрной колледженть, тонавтнесть «Механизация сельского хозяйства» специальностенть коряс. Од ломантне састь аволь пек умок, теке марто куроксто весементень тонадсть ды кармасть вадря специалистэкс.
Александр важоди механизаторокс. Сонсь шабра Андрелень, важодеме жо эрьва чистэ арды тей. Хозяйствасонть роботась эштё армиядо икеле, ульнесь комбайнёронь лездыцякс. Ютызе службанть ды велявтсь мекев. Тешксты, велесэ чачозь-касозь, косояк лиясо прянзо зярдояк эзь нее. Свал ульнесь мелезэ роботамс техникасо. Тесэ те мелесь топавтовсь. Сон роботы «Маниту» погрузчиксэнть. Кода тешксты Александр, те техникась неень шкане эрявикс куш косо. Сон топавты малав весе тевтнень, конат сюлмавозь фермасо ракшатнень андоманть марто, те техникасонть кепсить-пештить сюронть, фуражонть. Тевтнеде сатышка чинзэ перть.
Павел хозяйствасонть важоди омбоце ие. Сон – шабра Чукало велень. Сонтемензэ велень хозяйствань предприятиясонть истя жо ковгак. Техникадонть тесэ ламо. Вант, тесэ мезеяк кольсь-каладсь, вант – тосо. Эрьва тевсэнть эряви сварщик. Секскак Павел тевтеме а аштекшни. Ды, кода тешкстыть прявттнэ, эсь роботанть топавты пек парсте.
Од цёратне – вадря, эсь тевень содыця специалистт. Сынст лангс хозяйствасонть кемить. Сынь – предприятиянть вандынь чизэ.

Мельвановикс ялгат! Велень хозяйствасо важодицят ды отраслянь ветерант! Покш кенярксчи марто – Велень хозяйствань ды перерабатывающей промышленностень важодицятнень чинть марто! Тынь прявт неже минек райононть ды весе республиканть туртов. Вадря важодеманк эйстэ ашти масторонть вандынь чизэ. Содан, велень хозяйствань ёнксось аволь шождатнестэ. Сон веши аволь аламо вийть ды содамочить, веши свалшкане мелень явома.
Весенень, кить важодить мода лангсо, арсян вадря невтевкст, покш урожайть ды кемема вандынь чинтень. Кеме шумбрачи ды уцяска тыненк ды малавиксэнк туртов!

Н. И. Куманев,
«8-ое Марта»
ООО-нь прявтось.

Юлия Еремина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».