«Мордовский» лишмень заводонтень – 90 ие!
Владимир Ильич Нужнов чачсь-кассь Кочкурбуень Семилей велесэ. Тетязо-авазо весе пингест роботызь колхозсо. Вишка шкасто саезь велень цёрынесь содылизе важодемань танстенть, ансяк те эзизе тандавто сонзэ. Школань прядомадо мейле Владимир Ильич служась армиясо, мейле прядызе Н. П. Огарёв лемсэ университетэнь экономикань факультетэнть ды велявтсь тиринь велев Н. К. Крупская лемсэ колхозов роботамо. Шкань ютазь сон кармась те хозяйстванть прявтокс, мейле ютась Кочкуровань райононь велень хозяйствань управлениянь прявтокс. Кемгавтово иеде теде икеле сась Ицялбуев ды саизе эсь лавтов лангс МАПО-нь подразделениянть.
«Агропромсервис» ООО-нть, кона ашти Ицялбуень Оброчное велесэ ды сови МАПО-с, минь содавтынек Агропромышленной комплекссэ важодицятнень чинть каршо. Генеральной директоронть, эрзянь цёранть Владимир Ильич Нужновонь кабинетс совамодо икеле сельмс каявсь покш стенась, конанть лангсо понгавтнезельть те велень хозяйствантень казезь грамотатне, дипломтне, путнезь медальтне ды кубоктне. Ламо иень перть таштавозь казнетне невтить тесэнь важодицятнень покштояк покш трудост, кармавтыть кирдемс каштанчи минек масторонь трудий ломантнень кисэ, сыремтить од поколениянть седейтнес арсема поладомс тетяст-аваст, покштяст-бабаст тевест ды кепедемс седеяк верев од изнявкстнэнь. Те велень хозяйстванть сюпавдояк сюпав историязо, кона ламосо явови минек ёнксонь лия аграрной предприятиятнень эйстэ. Тедеде «Агропромсервис» ООО-нтень топодсть 90 иеть ды минек ули меленек ёвтнемс сонзэ кувака кидензэ, конась ушодовсь 1931 иестэ.
«Агропромсервисэкс» хозяйствась лемдезель 2005 иестэ. Те ней сон республиканть келес гайгиця велень хозяйствань виев предприятия, конасонть кастовить сюро, ламбамо якстерькай, трявить ракшат, потявтови ловсо, миеви сывель… Ютазь пингень колоньгеменце иетнестэ жо сон панжозель «Начало» совхозонть юрсо кода Мордовиянь 27 № лишмень завод. Сонзэ важодема таркакс явозельть икелень помещикенть моданзо. Мекс лишмень завод? Неть таркатнесэ алашатне трявсть-кастовсть 1778 иестэ саезь, помещиктнень туртов лишметне ульнесть аволь ансяк ардтнема ракшакс, сынст микшнилизь масторонть томбалевгак. Советэнь шкасто жо алашатне ульнесть васенце лездыцякс сокицятнень-видицятнень туртов, колхозтнэсэ арасельть зняро тракторт модань соксемс, секскак саезель мель нолдамс истят алашат, конатне а пелевельть стака важодемадонть ды покш сталмотнеде. Истя Оброчное веленть маласо кармасть кастомо васняяк бельгийской алашат. Мейле жо тесэнь специалисттнэ Коневодствань ВНИИ-нть марто путсть ламо вийть «советский тяжеловоз» од породанть нолдамс, конась кармась содавикс весе масторлангонть келес. Хозяйствась кармась лововомо племенной заводокс, те тевенть топавтыяк весе 90 иетнень перть, ялатеке аволь конёв лангсо – «племенной завод» лемесь сась тензэ ансяк 2020 иестэ. Заводось тешкстазель советэнь шкань ламо покш казнесэ: «Знак Почета» орденсэ, СССР-нь ВДНХ-нь 3 сырнень, 11 сиянь ды 15 бронзань медальтнесэ. Союзонь шкасто пелькстамотнесэ тосонь важодицятне сайсть 11 казне, 27 алашатне невтсть од рекордт, кавтотне кармасть масторонь чемпионокс. Вятка лишмесь сайсь Ригасо васенце тарка. Сон усксь 29 тоннат! Покш таликаст ульнесть заводонть виевгавтомасо икелень прявттнэнь А. Г. Коченовонь, И. А. Анцинэнь, зоотехникенть А. В. Шингаревонь. Ламот важодицятнестэ казезельть Ленинэнь, Трудонь Якстере Знамянь ордентнэсэ ды лиясо.
Ялатеке заводсонть кастсть аволь ансяк сталмонь ускиця алашат, ульнесь тесэ кумысэнь (лишмень ловсонь) производстваяк. Колмо тёжадо ламо литрат иезэнзэ потявтыльть эльдетнень пельде. Ловсось туиль Бурятияв, Калмыкияв, Башкирияв. Минек республикасо кумысэнь вечкицятнеде аламольть, секскак те ёнксось эзь ванстово. Ютазь пингень 90-це иетнестэ цють эзь пекставо заводоськак, шкатне ульнесть стакат, лишметне микшнезельть, тукшность специалисттнэ, 360 эльдетнеде кадовкшность зярыя. 2009 иестэ, Владимир Ильич Нужновонь прявтокс самодо мейле, «Мордовский» лишмень заводось кармась стямо пильге лангс. Неень шкане тесэ кастовить 55 эльдеть, 7 айгорт-производительть, фермасонть весемезэ кирдевить 150 алашат, истямо породань, кода «советский тяжеловоз», «рузонь рысак», «арабонь скакун», «тракененской» ды «пони». «Мордовский» конезаводонь алашатнень лемест ней, кода икелеяк, гайгить масторлангонть келес ютавтовиця соревнованиятнесэ ды выставкатнесэ. «Сырнень сёксь» содавикс агропромышленной выставкасонть ниле иень перть Мордовиянь айгортнэ сайнить васенце таркат ды а неить конкурентт вакссост. Бразилец ды Жангир – неть айгортнэ заводонть «тештеть». Лия айгортнэяк, бути кучомс соревнованияс, мейсэяк эйстэст а явить.
Инжекс – лишмень кирдиця заводов
Кода мерить, седе паро весть неемс, аволь кеменьксть марямс. Секскак шкань апак сатстне сыргинек лишмень заводов.
Тедедень сырнень медалень саицянть Жангирэнь минь вастынек конюхонть марто ушова якамсто. Сон фермасояк прянзо вети теке выставкасо: юты састо, наянсто, дивавты мазычисэнзэ, рунгосонзо, покшолмасонзо. Вармась вадяши тюжа кувака, кудряв гриванзо, ашо пейтне сусконить панстонть, теке невти алкуксонь породань васенце тешкстнэнь. Жангирнэнь ансяк 5,5 иеть, сон эштё ломанень иетнень коряс 18 иесэ од цёрыне.
Шкань ютазь тесэ пельдензэ учить истят жо мазый вашинеть. «Косто саевсь истямо гайгиця ды а чарькодевиця омбо масторонь лемесь?» – кевкстинек заводонь важодицятнень. «Жангирэнь лемесь саезь тетянзо ды аванзо лемтнень васенце букватнестэ», – ёвтнесь тенек лишме мельга ваныцясь, прявт зоотехникесь Виктор Серафимович Волков. Миненек маряви, алкуксонь изницянь лем! Лия лемтнеяк тесэ максозь седейлембень путозь, алашатнень обуцяст лангс ванозь. Вана, саемга, Крошка эльденть сэрезэ а покш, а сонзэ вашонть Корсиканецэнь уш ней неяви элякалиця ды кенярксов обуцязо.
Кода корты Владимир Ильич Нужнов, тесэ арась вейкеяк ломань, кона бу саволь лишмень заводов ды а вечкевельть тензэ лишметне. Эдь неть ракшатне пек превейть, парсте марить ломаненть оймеёжонзо. Лишме мельга весе 11 важодицятне эсь тевень алкуксонь вечкицят, тесэ тентеме кодаяк. Ламо вийть лишметнень ванстомс-кастомс стака шкатнестэ путсь Сергей Петрович Стрельцов, кона важодсь тесэ 40 иень перть ды аволь умок тусь эрямостонть. Ней заводось лиссь мелявкстнэстэ ды лишметнень улить тантей ярсамопелест, лембе кардазост, эрязасто ветяви племенной роботась. Айгортнэнь рамамо сакшныть аволь ансяк Россиянь лия регионтнэстэ – омбо масторстояк. «Агропромсервис» ООО-нь прявтонть Владимир Нужновонь мельсэнзэ-превсэнзэ панжомс заводонть историянь выставка. Уш пурназь ламо экспонатт. Ваномо сыцятнень вешнемс а сави – заводов экскурсияв сакшныть ламо эйкакшт, инжетне яла пачколить семиянек, роднянек-раськенек. Коронавирусонь кезовось, нама, киртинзе ваныцятнень. Ве шкастонть сынст овсе а мерильть нолдамс. Паро, неть читнестэ экскурсиятне таго панжовсть ды лишметнень лангсо ардтнеме, сынст ламбамо сахардо каванямо тердевить весе лишмень вечкицятне. Минсь неинек, лишметне тошнакадсть вишка ялгинест кисэ! Владимир Нужновонь мельсэ совавтомс «Мордовский» лишмень заводонть туристической кластерс. Эдь Ицялбуесэ ули мезе невтемс – тесэ жо Кирилл Патриархонть покштянзо кудынезэ, Смольноень карьерэсь ды заповедникесь, «Визит-центрась», «Тумо атякшонь пизэнь» таркинесь. Авасоло Покш Болдинаськак. Весе неть таркатнень вейс пурназь, лиси мельстуиця туристической маршрут. Косотадо, турфирматне?
Агрофирмасонть кияк а кадови эрямо таркавтомо
Кода уш сёрмадынек, лишмень кирдема заводстонть ушодовсь хозяйстванть историязо, ялатеке сон ней аволь ансяк алашат касты. Те хозяйствасонть 8 тёжат гектартнэнь лангс видневи товзюро ды ламбамо якстерькай. Техникась тесэ одкстомтозь, роботась ветяви од технологиятнень тевс нолдазь. Сисем иень перть «Агропромсервисэсь» сайни васенце таркат «Союз сахаропроизводителей России» пелькстамосонть якстерькаень видиця предприятиятнень ютксо. Кардотнесэ кирдевить 1200 сюракшов ракшат, 560-тне эйстэст потявтовиця скалт, конатне иезэнзэ максыть 9 тёжат литрат ловсо. Весемезэ велень хозяйствасонть важодить малав 140 ломанть ды получитькак а беряньстэ. Весе од специалисттнэнень агрофирмась лездась рамамс эрямо таркат. Бути минек ловныцятнестэ кияк вешни важодема тарка ды а пели роботамс фермасо, тесэ мельспаросо учить эйсэнк! Оброчное посёлкасонть ули весемесь парсте эрямонть ды важодеманть туртов: школа, эйдень кужо, Культурань кудо, велеванть яки автобус, конась сюлми эйсэнзэ райцентранть марто. Предприятиясь лезды школантень ды эйдень кужонтень витнемс-петнемс латотнень, артомс стенатнень… Сынсь важодицятнеяк зярдояк а кадовить лезкстэме, бути лиси кодамояк мелявкс.
Эрьва иестэ агропромышленной комплексэнь роботниктнень кенярксчинть каршо тесэнь специалисттнэ, механизатортнэ ды ракшань кастыцятне казевить паро казнесэ ды премиясо! Истя карми тедедеяк. Минь жо эсенек ёндо арсетяно те кеме хозяйствантень седе товгак кирдемс саезь виде кинть, ды кенярксчинть кувалма весенень ёвтатано пси поздоровт, шумбрачи, кадык тынк кудотнесэ карми ансяк валдо, лембе ды касы парочись!
Марина Девятова
Фототне Эдуард Ретунскиень