Тееведе содавиксэкс: «Комсомольская ЦРБ» ГБУЗ-нь Покш Березникень паллиативной отделениянь прявтось Марина Александровна Кумакшева. Сон чачсь 1980 иестэ. Сыре Шайговань средней школанть «ветес» прядомадо мейле тонавтнесь Н. П. Огарёв лемсэ МГУ-нь Медицинань институтсо, конань истя жо прядызе якстере диплом марто. Од специалистэсь ушодсь важодеме «Большеберезниковская ЦРБ» МР-нь здравоохранениянь муниципальной учреждениясо приёмной отделениянь врачокс-терапевтэкс.
Колмо иес тукшнось эрямо республиканть томбалев, Московсо топавтсь теке жо тевенть. 2011 иестэ велявтсь одов Мордовияв ды поладызе важодеманзо теке жо таркасонть. Иень ютазь кармась республикань «Комсомольская МБ» поликлиникань отделениянь участковой врачокс-терапевтэкс. 2017 иестэ Марина Александровнань тердизь медицинской лезксэнь максомань паллиативной отделениянь врачокс, шкань ютазь аравтызь прявтокс.
Чарькодеви, сынст важодемась пек седе явови медицинань лезксэнь максомань тевденть. Тень мельс саезь, Марина Кумакшева свал тонавтни одонтень, штобу седе видестэ путомс диагнозонть ды теньсэ шождалгавтомс стакасто сэредицятнень уцяскаст. Сонзэ лангс путозь покш канст организационной ды профилактической паллиативной лезксэнть паролгавтоманзо коряс. Васень таркас свал аравты сынст кедьсэ эрицятнень шумбрачист витеманть, ёжост вадрялгавтоманть. Те топавтови васняяк видестэ диагнозонть путозь, шкастонзо терапиянть лезэвстэ максозь, диагностикань од ёнкстнэнь ды неень шкань од технологиятнень тевс нолдазь.
COVID-19 коронавирусной од орманть шкасто Марина Кумакшева важодсь Комсомольской райбольницянь ковидэнь госпитальсэ, косо чинек-венек максовсь лезкс стакасто сэредицятненень.
Ламо иень перть парсте важодеманть кувалма Марина Александровнань улить ламо казнензэ, конатнень ютксо – МР-нь Прявтонь Благодарность.
Течи Марина Кумакшева минек редакциянь инже.
– Марина Александровна, ёвтнеде, кодамо шкасто Покш Березниксэ панжовсь паллиативной отделениясь ды кинень тынк прявтсо коллективесь максы лезкс?
– Республикань поликлиникатнень юрсо паллиативной отделеният улить Мордовиянь весе районтнэсэ. Тешкстаса, 2014 иестэ Покш Березникень райононь центральной больницясо реформированиянь тевтнень ютавтомадо мейле, республикань прявттнэнень ульнесь пшкадема стакасто сэредицятненень лезксэнь максоманть коряс. Эдь минек районсо, кода лиятнесэяк, улить стакасто сэредицят, кинень эряви свалшкань лезкс. Истя, 2017 иестэ Покш Березникень райононь поликлиниканть юрсо панжозель паллиативной лезксэнь максомань отделениясь. Райононь эрицятне те кулянть вастызь седейшкава. Васняяк ушодовсь максовомо квалифицированной медицинской лезкс стакасто сэредиця сыре ломантненень.
Паллиативной лезксэнь максомань отделениятне ламо мейсэ свал явовить лиятнеде. Миненек васняяк сыть сеть, кинь куродызе пек стака ормась. Неть эрьва кодамо форма марто зыянов таргоземат, седеень-санонь, кувать а пичкиця (хронической) орма мартотне, стакасто томбавомадо мейле, деменция ды лия стака орматнесэ сэредицятне. Нурькинестэ, минек отделениясо эрить сеть, кинь мельга эряви свалшкань ванома ды лецямо.
Теде башка, неть ломантненень эряви явомс покштояк покш мель ды каземс седеймарямо мелест кепедемга, ёжомарямост витемга. Эдь ламот юткстост ськамост эрицят. Весе неть тевтнень бажить седейшкава топавтомс минек коллективсэ важодицятне.
– Инескеть, пачтядо, те лецямонь учреждениясонть зяро важодицят ды кинь бу Тынь ледстявлинк башка?
– Тешкстаса, неень шкасто паллиативной лезксэнь максомань минек отделениясонть важодить вейке врач, медицинской вете сестрат ды отделениянь ниле ванськавтыцят (уборщицат).
Ледстяса, минек коллективсэнть важодить тевест парсте содыця, чевте седей ды паронь арсиця ломанть. Сынь свал анокт вейке-вейкенень лездамо ды, бути эряви, полавтомс куш кодамо шкасто ды тевсэ.
Те отделениянть панжомань васенце читнестэ саезь ушодсь важодеме старшей медицинской сестрась Ольга Гульняшкина. Ольга Владимировна машты видестэ ладямо важодицятнень тевест. Сонзэ лангсо эрявикс лецямопельтнень коряс заявкатнень анокстамось ды шкастонзо минек учрежденияв пачтямось. Истя жо сон ваны медсестратнень тевест парсте топавтоманть мельга. Теке шкасто сон эштё топавты процедурной медсестрань тевенть: путни капельницат, уколт ды истя седе тов.
Ольга Гульняшкина палататнес свал сови мизолкс марто, эрьвантень муи чевте вал. Кодамо берянь аволь бу уле седейсэнзэ, соды, сынст кедьсэ эрицятненень а мереви совамс истямо ёжомарямо ды кежей варштавкс марто.
Истямо лувонть минек отделениясо кирдить весе важодицятне. Нать, а стяко, аволь ансяк минек отделениясонть улицятне, сынст малавикстнэяк, кить сакшныть варчамост, тень секе-тев редить ды ёвтыть сюкпрянь валт.
Аволь шожда тевест младшей медицинской персоналонть. Невтемга, куш Татьяна Викторовна Макейчевань, Надежда Анатольевна Кулагинань, састь тенек важодеме аволь умок. Тенст савкшны якамс сеть сэредицятнень мельга, кить сынсь мезеяк а теевить, стака ормась а максы стямс ацавкстнэнь лангсто.
Самай сыненст ды лия ялгатнененьгак сави аволь ансяк андомс ды симдемс, оршамопелест полавтомс ды процедуратнес пачтямс, эштё кунсоломс мелявксост-ризксэст, оймавтомс седеест. Виде, те важодемась васов аволь весенень топавтови, ламот бу авольть цидярдо… А сынь теке тиринь ломанест мельга якить ды эштё мизолкст тенст казить. Истя жо седейшкава тевест топавтыть истят важодицятне, кода Татьяна Михайловна Лепёшкина ды Ирина Николаевна Калинкина.
Минек отделениянть панжома шкасто тесэ важодить тевест парсте содыця палатно-постовой медицинской сестратне. Сынст весень улить высшей категорияст. Неть: Ирина Борисовна Филиппова, Надежда Васильевна Аношкина, Вера Евгеньевна Азаркина. Тешкстама, сынст покш важодемань опытэст здравоохранениянь учреждениятнесэ. Икеле савсь тенст те тевенть топавтомс кода эсест велень фельдшерэнь-акушерэнь пункттнэсэ, истя жо пурнасть содамочить райбольницясо.
– Марина Александровна, инескеть, пачтядо, кодат документт эрявить, штобу пачтямс тыненк стакасто сэредиця ломань?
– Паллиативной отделениясо лецямось ютавтови икелепелев анокстазь аравтлувонь коряс, штобу весенень сатовольть таркат. Стакасто сэредицятне васняяк пшкадить велень фельдшерско-акушерской пункттнэс, теде мейле фельдшертнэ сынст ильтить врачтненень. Седе тов врачтнень пельде направления марто сыть миненек.
Чарькодеви, районсонок неень шкасто эрицятнестэ седе ламотне пенсионерт ды сыре ломанть. Стакасто сэредицятнень седе сеедьстэ ильтить минек отделенияв, косо эрьва ёнксонь лезкс максыть тевест парсте содыця специалистт.
Валентина Юдина