Декабрянь 19-це чистэ МР-ва Россиянь МЧС-нь Главной управлениясь Специализированной пожарно-спасательной частьсэ СМИ-тнень туртов ютавтызе «Реальные пожарные. Испытание стихией» квестэнть.
Журналисттнэнь теизь содавиксэкс пожарнойтнень ды идицятнень важодемаст марто, ютавтсть мельстуиця экскурсия, невтезель частенть весе техникась, конадонть подразделениясонть 38 единицат – 8 основнойть, 18 спецтехника, медслужбань, РХЗ-нь службань (радиационно-химическая защита), аварийно-спасательной машина, BMW ниле мотоциклат ды эрявикс оборудования марто ламо лия. Эрьвась эсензэ лангсо варчинзе эсь прянь ванстомапельтнень – СИЗ-нть (средства индивидуальной защиты), неть: каска марто оршамопелесь, кислородонь баллон марто маскась. Экскурсиянть ютавтызе МР-ва Россиянь МЧС-нь Главной управлениянь ГПС-нь ФПС-нь СПСЧ-нь начальникесь – внутренней службань подполковникесь Евгений Сергеевич Шиповский. Журналисттнэнь пурнамс лездась МР-ва Россиянь МЧС-нь Главной управлениянь пресс-службань прявтось Юлия Витальевна Безунова.
Теде мейле ютавтовсь сонсь квестэсь. Васняяк чопода фургонсто эрявсь муемс теплодымокамерань лисема таркатнень, конатнесэ пожарнойтне тонавтнить апак учонь зыянтнэсэ эсь прянь ветямонтень. Невтемга, зярдо качамодо пештязь кудосто эряви муемс толонь полонс понгозтнень ды таргамс сынст оляс. Мейле эрявсь ютамс алкуксонь толонть-качамонть пачк – ОППП-нть (огневая полоса психологической подготовки пожарных и спасателей). Ушосо анокстазь кшнинь кузтематнень вакссо ниле таркасо кирвазтезельть ташто чарыть, конатнеде мольсь виев тол ды раужо качамо. Кутьмерес понгавтсть кислородонь баллон, конань сталмозо кемень килодо ламо, чамась весе кекшезель маскасо, илязо толось авторда пряс ды качамось илязо понго тевелявтнес. Эрявсь эрязасто чиемс, куземс-валгомс анокстазь пирявкс марто таркатнева. Нама, миненек, тейтерь-аватненень, тень теемс а шождаль. Сюкпря, весе пирявкстнэнь ютамост перть тевсэ ды валсо лездасть инструктортнэ.
Апак учо карминек свидетелекс сенень, кода идицятне анокстыть алкуксонь толонь мадстемас. Вейке минутань перть цёратне оршизь ванстыця комбинезононть ды ливтизь машинанть базасто. Те вана эрязачи! Карминек чарькодеме, истят цёратнень марто пелемс а мезде. Ансяк эрьвантень эйстэнек эряви парсте содамс толонь а нолдамга эсь прянь ветямонтькак. Ды бути уш истямо зыянов тев лиссь, сеске гайневтема содавикс номертнэва: 01 ды 112.
Те квестэсь невтизе, тесэ а важодить лавшот ды пелицят! Истямо таркас молить ансяк виев ойме ды покш седей марто ломанть, конат анокт эцемс толс ды идемс лиянь.
Декабрянь 27-це чистэ Россиясо тешкстави Идицянь чись. МЧС-сэ важодить эсь тевест содыця алкуксонь профессионалт, конат стака ды зыянов шкасто лездыть ломантненень. Толонь мадстицят, идицят, ведьпотмова укшныцят, кинологт, лётчикть ды Россиянь МЧС-нь ламо лия специалистт топавтыть задачаст толонь мадстемстэ, чрезвычайной ситуациятнестэ, ведьс ваямсто, лездыть ДТП-с понгозтненень ды лия зыянтнэнь шкасто. Кода свал, эсь профессиональной покш чист идицятне ютавтсызь боевой постсо. Арсетяно тенст певтеме шумбрачи, оймевий ды седе ламо кенярксов ды сэтьме чить сыця Од иестэнть!
Марина Агафонова