Среда, июня 03, 2020
Важное


Андорра княжествась –те вишинедеяк-вишкине государства, конась ашти Франциянть ды Испаниянть ютксо Пиринеи пандотнень лангсо. Масторось эри туризмань ярмактнень лангс. Пелест эрицятнестэ андорранецт, 25 проценттнэ испанецт, 15 проценттнэ –португалецт. Официальной келесь –каталанской, ансяк ламот кортыть французонь ды испанонь кельсэ. Андорранть покшолмазо– 468 кавонзазь вайгельбеть. Прявт ошось – Андорра-ла-Велья. Масторось явозь 7 ёнксов – паррокияв. Эйсэст эрить 76 тежат ломанть. Пазнэнь кемемань коряс малав весе – католикть.


Андорра. Масторось а марявикс, а ледстневикс ды масторлангонь картасонть эль неявикс. Эйсэнзэ эрить 75 тежат ломанть, те теке вейс саезь минек Рузаевкань ды Кочкуровань районтнэ. Тозонь уцяскась кандызе минек ёнксонь тейтеренть Оксана Сурайкинань малав кемешка иеде теде икеле. Васняяк яксесь пандо прясто лыжасо кирякстнеме, масторось ды ломантне тензэ пек вечкевсть ды истя сон пачкодсь тей эрямо Семен цёрынензэ марто.

Васенце иетнестэ роботась турагентствасо, вастась-ильтясь Россиясто сыця туристтнэнь, мейле ялганзо Карма марто панжсь а покшке лавка, косо микшнесь эсензэ кедьсэ кодазь понань оршамопельть. Климатось тосо чарькодтядо кодамо, государствась ашти сралезь пандо прява, телесь тесэ пек якшамо ды ловов. Кизэсь юты пиземевтеме ды пек пси читне лововить сурсо. Секскак лембе свитратне, платиятне, шапкатне, варьгатне тесэ парсте миевить-рамавить. Оксана аволь свал эрясь Андоррасо, меельце иетнестэ сон тукшнось Португалияв ды Киправ важодеме, эдь сонзэ ули Шенгенэнь визазо, конань коряс тензэ а путовить кодаткак пирявкст. Ансяк Од иенть каршо велявтсь мекев Андоррав, конанть лемди «вишка велинекс». Ушодокшнось таго роботамо ялганзо лавкасо, миеме лембе оршамкат, ансяк мелензэ колызе коронавирусось. Масторось эри туризманть вийсэ, те сонзэ васенце ды вейкине доходозо. Иезэнзэ тезэ пандо прясто кирякстнеме сакшныть 9 миллионт турист. Сыненст вечкевить аволь ансяк курортнэ, Андоррась ней пошлинавтомо торговиця мастор ды тосонь товартнэнь питнест 25-40 проценттэ седе вишкинеть шабра мастортнэнь коряс. Неень шкань стака ормась – коронавирусось, эзизе менстя те вишка масторонтькак ды сон пекстынзе весе границянзо. А мереви ардтнемс пароккиятнень (районтнэнь) ютковаяк. Ней андорранецтнэнень пек стака, эдь сынь мезеяк а кастыть, а нолдыть ды весе продовольствиясь сакшны омбо мастортнэстэ. Сынь пек пелить экономикань кризисттэнть.

Карантинэсь Андоррасо яволявтозель мартонь 13 чистэ ды поладови сон маень 15 чис. Кода ёвтни Оксана, конась эри Энкамп ошсо, тесэ а мереви лиснемс ушов, бути ансяк весть лавкав эли аптекав. Оксана эри пандо прясо а покшке квартирасо церанзо марто. «Минь уш 40 чить, кода аштетяно кудосо. Зярдо яволявтызь карантинэнть, монень, кода Португалиянь ды Россиянь масторонь гражданкантень (Андоррасо гражданствась максови сыцянтень ансяк сестэ, зярдо ломанесь тосо эри 20 иеть), чинь чоп сакшность СМС-т, косо энялдсть тень туемс тиринь масторов, кортасть границятнень курок пекстамодо. Ансяк мон эзинь арсеяк теде, ков кадсынь 5 каткан?» – ёвтни тейтересь.

«Минь васняяк истя жо, кода ламот Россиясо, эзинек кеме, эзинек тандадо, ломантне оймсема читнестэ яксесть вирев сывелень пидеме, налксеме. Сестэ государстванть прявттнэ сеске аравтсть покш штрафт. Ней кудосто стяконь лисеманть кисэ пельдеть саевить 300 еврот. Вете недляс мон лиснинь ушов ансяк кавксть-колмоксть. Весе продуктатнень тень ускить супермаркетнэстэ курьерт. Куватьс учинь тантейкат рузонь лавкасто, окойники пачкодсть тень салтозь калось, якстере якстерькась борщонь пидемс ды чиньжарамотне.
Ошсонть зярс важодить ансяк лавкатне, аптекатне, бензинэнь заправкатне, кой-кона ресторантнэ, конатне усксить ярсамопельть, ды СМИ-тне».

Онлайн тонавтнемась тесэ умонь тев

Семённэнь кавто недлят макснесть каникулат, ней сон таго тонавтни онлайн-режимсэ. Те тевесь сонензэ а стака, эдь Андоррасо малав весе школатне тонавтыть дистанционна. Чоп ней ашти компьютер икеле, тонавтыцятне васняяк чарькодевтить теманть, макснить кудов роботат. Физкультураськак ютавтови онлайн.13 иесэ церынькантень те лувось пек вечкеви. Зярдо арасель карантин, Семен истя тонавтнезь ардтнизе весе Европанть. Планшетэсь свал мартонзо ды уроктнень ваномась-теемась сонзэ туртов тонадовикс тев. Оксана ансяк чуросто мейсэяк лезды, зярдо тонавтыцянть марто лисить кодаткак а чарькодемат.

Вейке больниця весе масторонть келес

Андоррасо ней панжозь ансяк вейке госпиталь, козонь усковить коронавируссо сэредицятне. Эйстэст масторсонть ютазь недлянь цифратнень коряс малав 700 ломанть. Кулыцятнеде ульнесть 33, лецязельть 170 сэредицят. 75 тежат эрицятнес панжозь больницясонть ансяк 12 ИВЛ-нь аппаратт ды те пек ацирьгавты весень. «Васняяк минек ошонь аптекатнестэ ёмсесть маскатне, государствась сайнинзе сынст больницянь медперсоналонть туртов», – ёвтни Сурайкина. «Ней сындест сатышка, ансяк а мезекс, ковгак минь церынем марто а яксетяно, ансяк бути балконс пандонь кошттонть лексеме. Кулыцятнестэ тесэ ламот сыре ломанть, конатненень 80 ды седе ламо иеть. Сэредицятнестэ покш процентэсь те больницянь врачтне ды медсестратне. Сынь важодить весе виень путозь, ялатеке рядост вишкалгадыть чиде чис. Аволь умок тенст лездамо сакшность 38 врачт Кубасто, сынст пельде сайсть тестт коронавирус лангс ды малав весень те ормась муезель васенце эли омбоце чистэ. Истя вана лездыцятне сынсь понгсть карантинс».
Апрелень 18 чистэ саезь масторонть келес кармасть ардтнеме лабораторият, конатне кармасть саеме тестт коронавирусонть лангс. Кортыть, бути кинь сон карми неявомо, ловови, сынь уш эйсэнзэ сэредсть, ансяк а содыть теде, ды шкань ютазь, неть ломантне нолдавить важодеме. Лиятненень путови вакцина, ансяк сон зярс арась.

«Медицинась Андоррасо, монь мелень коряс, а пек виев. Россиянь врачтне ламоксть седе превейть ды чарькодицят. Минек Энкамп ошсо, штобу молемс врачнень консультацияс, эряви сёрмадстомс прянть кавто-колмо ковдо икеле. Тесэ кияк а сы тенть кудов, а кучи «куроконь лезкс», бути температурат кассь 40-с, эли кияк а валгстасы давленият уколсо. Весть монь касокшнось 200-с, врачось пейдезь ладсо мерсь: «Вай, кодат тынь рузтнэ пелицят ды сорныцят. Азе, якак пандо прява ды юты. Макссь, видькстан, удовтома таблетка, паро мартон ульнесь давлениянь валгстыця надобия. Се чистэнть саезь мон ней свал рамсян таблеткат-мезть Россиясто ды врачтнененьгак бажан ливтнемс тиринь масторов».

Мейсэ лездыть Андоррань прявтнэ?

Карантинэнть панжома шкастонть саезь масторонть премьер-министрась макссь вал пандомс кудосо аштицятненень башка ярмакт. Тенень явозельть 200 милионт еврот. Мартонть кисэ ярмактне уш састь. Ансяк Оксана ней арси, а кармить ли сынст мекев саемест мейле зарплатасто? «Тесэ мезеяк – кияк тенть стякодо а максни!», – пейди тейтересь.

Кинь туртов киштить полицейскойтне?

Энкампонь эрицятне кода маштыть весёлгавтыть карантинэнь шканть. Эрьва чокшне 8 чассто сынь лиснить балконс морамо, киштеме ды цяпамо медицинань роботниктнень туртов. Теке шкастонть жо ошонть ульцятнева ютыть полицейскоень рейдт. Лиясто сынь нолдыть динамикест эйстэ кенярдовтыця музыка ды ушодыть киштеме вишка эйкакштнень туртов. Тень сынь теить эйдетнень ёжомарямост кепетемга. Алкукскак, ванынек видео интернетстэ (сонзэ а стака муемс), косо полицейскойтне мельспаросо невтить пейдевтиця номер, конань лемдизь тосо «мекшень киштемкат» сынст раужо ды ожо полоса марто формаст кисэ.

Кода корты Оксана Сурайкина, Андорранть эсест эрицятнень туртов арсить панжомс маенть куншкасто. Туристтнэнь самодо, нама, кортамось зярс а моли. Оксана ней а соды, зярдо сы аванзо, патянзо, лелянзо варштамо Московов, Саранскоев ды Инсаров, седеезэ талны сынст кисэ. Эсензэ ды церынензэ кисэ сон истя а пели, пейди, келя, парсте кекшезь аштить пандо прясо ёвксонь замоксо ды арси а лиснемс кудосто ковгак весе карантинэнть перть. Тень тееме кармавты весень, кие ловны минек газетанть: «Аштеде кудосо, ванстынк эсь прянк, эйкакшонк ды малавиксэнк!»

Марина Девятова
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».