Вторник, сентября 29, 2020
Важное

Нижегородской ёнксонь Дивеево веледенть марсесть ламот. Сон содавикс аволь ансяк минек масторсонть, весе мирэнть келес. Содавикс жо Серафимо-Дивеевской монастыренть коряс, косо ванстовить Иневаньксэнть Серафим Саровскоень мощатне.



Аламошка ёвтнетяно неть таркатнеде. Серафимо-Дивеевской монастыренть юрс совить колмо соборт: Троицкоесь, Преображенскоесь ды Благовещенскоесь. Серафим батюшканть мощатне ванстовить Троицкой соборсонть ды понгомс тов мереви свалшкане храмонь важодема шкастонть. Тесэ жо, соборсонть, ашти Пазонь Авань «Умиление» пазавась. Службатне ютавтовить эрьва чистэ Троицкой ды Преображенской собортнэсэ мельга-мельцек.

Преображенской соборонть эйстэ ушодови Иневанькс Канавкась. Сонзэ эряви ютамс эрьвантень ды 150-ксть ловномс «Богородице Дево, радуйся» молитванть. Таркась те лия ёнов а молиця ды вейкине весе масторонть келес. Иневанькс Канавкась чувозь Богородицанть кармавтоманзо коряс. Канавканть мельстуиця историязо, а седейстэ ютыця чекамось тесэ алкукс теи дивань тевть. Баягань кудынеденть мейле ашти церьковань цела комплекс. Вейке зданиясо аштить сеске колмо церьковат: Казанской храмось, Рождества Христовань церьковась ды Рождества Богородицань храмось.

Дивеевань модась сюпав Иневанькс лисьмапрятнень ламочисэяк. Веенсттнэ аштить теске, Дивеевасо – Пантелеймононь ды Пазонь Авань лисьмапрятне. А вана батюшканть Серафимень лисьмапрясь ашти веленть эйстэ аламодо ве ёно, Цигановка велинесэнть.
Ведесь неть лисьмапрятнесэ ванькстэяк ванькс. Тесэ экшелямодонть мейле истя паролгады ёжот, весе рунгот шождалгады! Илядо стувто тестэнь веденть саемс мартонк кудовгак. Сон пек паро ойменть лецямга.

Зярдо масторонть лангс каявсь коронавирусонь зыянов ормась, Дивеевань монастыресь ды, нама, иневанькс весе лисьмапрятне пекстазельть ломантнень туртов. Службатне жо ульнесть свал, ды священнослужительтне озность орманть туемадо, свалшкань сэтьме эрямонть велявтомадо. Тэсэнь иневанькс таркатне жо учость ломантнень самонть. Аволь умок, медьковонь 24-це чистэ, монастыресь панжозель сыцятнень туртов. Эрямось кармась ладявомо.
Неть читнестэ минь содавтынек неть иневанькс таркатнень. Нама, ломантнеде тесэ зярс аволь пек ламо ды топавтовить вешематнеяк – якить маскасо. Ансяк неяви, ломантне пек учость монастыренть панжоманзо.

Паряк, а стяко карантинэсь каязель медьковонь меельце читнестэ. Ули тесэ Пазонть тешксэзэ. Эдь умарьковонь 1-це чистэ – Серафим Саровскоень ледстнема чизэ ды, коень коряс, медьковонь 31-це ды умарьковонь 1-це читнестэ ютавтовить покш мероприятият. Тедедеяк ветявсь покш анокстамо. Коень коряс, Преображенской соборонть икеле площадьсэнть ладязель сень. Сонзэ алов Троицкой соборстонть ливтекшнизь Серафим Саровскоень мощатнень марто раканть. Эрьва ие те чистэнть тезэ пуромкшныть ламодояк ламо ломанть, сакшны Патриархось. Тедеде кенярксчинь мероприятиятне ветявсть аламодо лия лувсо. Арасель палаткань ошкесь ды суткадо седе куватьс сыцятнень туртов кемекстазель самонь контролесь: паломниктненень эрявсь мартост коронавирусонь ормасо а сэредемадо справка. Те весемесь теезель ломантнень шумбрачист ванстомга.

Нама, Серафим батюшканть ледстнема чистэнть понгомс Дивеевав – покш уцяска. Ансяк, бути седейсэнк ули Пазнэнь кемема, а эряви ваномс чинть ды шканть лангс, содавтынк неть иневанькс таркатнень. Тесэ тынь эсь прянк алкукс марясынк шождакс ды ваньксэкс.

Юлия ЕРЕМИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».