Вторник, мая 21, 2024
Важное

Рузонь драмань театрасо ютась учовикс премьерась. Тесэ невтевсь Россиянь ды Мордовиянь культурань заслуженной роботникенть В. С. Брыжинскиень «Каргонь кинь ломанть» саганзо коряс спектаклясь. Покш тевентень кундась режиссёрось-путыцясь, МР-нь народной артистэсь Н. П. Большаков. Сонзэ валонзо коряс, сынст театрасо умок эзть путне спектакля эрзянь ды мокшонь раськень тематиканть коряс, меельцеде истямо путовкс ульнесь комсь иеде икеле, А. Пудинэнь «Дон Стефано» спектаклясь алтазель С. Д. Эрьзянень.



Путовксонть лангсо важодемась ушодовсь мелят. Меельце ковтнень перть актёртнэ ды постановочной группась чинек-венек роботасть тень коряс. Спектаклянть ваномо малавиксэнзэ марто сакшнось пьесанть авторось, театроведэсь ды драматургось В. С. Брыжинский. Тешкстасынек, те иень январьстэ тензэ топодсть 90 иеть. Лембе вал марто сонензэ пшкадсть МР-нь Эрзянь ды мокшонь раськень регионъютконь общественной вейсэндявксонь прявтось Юрий Мишанин, Н. П. Огарёв лемсэ МГУ-нь Национальной культурань институтонь прявтось Елена Антипкина ды режиссёрось-путыцясь Николай Большаков.

«Минь саинек саганть ансяк васенце пельксэнзэ. Весе, мезе арсинек теемс сцена лангсо – топавтовсь. Актёртнэ – профессионалт, сынст кис а мелявтан. Спектаклясонть улить технической ламо ёнкст, видеоэффектт. Нама, мон талнан, кода весемесь юты», – кортась режиссёрось спектаклянть ушодовомадо икеле.

«Каргонь кинь ломанть» путовкссонть невтеви Емельян Пугачёвонь восстаниядонзо мейле шкась. Ламо сатотсь эрзятненень, ломантнень лангс, кить сыргакшность Пугачёвонь марто, ульнесть каявомат. Тиринь масторсо лангсост нарьгасть ды эйсэст чавность. Прявт героесь велявты кудов, сайсы-пурнасы семиянзо, кить кадовсть эриекс, мартонзо моли ялгазояк ды туить вирев. Сынь вешнить тарка, косто кияк аволизь муе. Чаво таркасо, кедьсэ узере марто ушодыть од эрямо. Васня эрить шалашсо, мейле – землянкасо, седе тов стявтыть зимник. Мейле Пазось максы тенст ракшат. Лия велетнес яказь, сынст карми улеме сюрост. Сынь пек бажить стявтомс од кудо, вельмевтемс толонть ды раштамс-кастомс буест-раськест. Эрямонь килангсо вастовить паро ломанть, конат лездыть печтямс мелявкстнэнь ды стакачитнень.
Башка валт эряви ёвтамс артисттнэнь лемс. Прявт геройтнень налксить МР-нь заслуженной артисттнэ Денис Кручинкин (Нечай Кочкуров), Оксана Сизова (Нуянза низэ), Геннадий Арекаев (отец Анкудин). Лембестэ вастозель од актрисанть Ирина Крупяковань налксемазо (Кочкуровтнень Радай цёрынест). Виев ды паро образ невтсь Денис Михеев (Олёшка Нарайкин). Кода а шнамс Александра Надоровань (Васёна) ды лиятнень.

Геройтнень лангсо эрзянь мазый оршамопельть. Костюмтнень коряс важодсь Ольга Зевайкина художникесь. Мультимедийной ёнкстнэнь вельде ваныцятне понгсть геройтнень марто вирь чирес, косо морыть нармунть, шольни ведесь, косо ушодови Кочкуровтнень од эрямост. Велькссэст – маней ды тештев менелесь, кува юты Каргонь кись.

Спектаклясонть минек кезэрень шкань историясь, ломантнень уцяскаст ды покш вечкема – эрямонть, эсь раськенть, тиринь масторонть, койтнень-кирдатнень, цёранть ды аванть ютксо. Ды те вечкемась изни весементь. Ламот кортыть-пелькстыть, мекс путовксось путозь рузонь кельсэ (ютавтызе писателесь ды журналистэсь Т. С. Баргова). Мезе теньсэ берянесь? Кадык седеяк ламо ломанть сонзэ вансызь, содавтовить эрзянь раськень эрямо пингенть марто.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».