Иневанькс Феодор Санаксарской храмонь Недлячинь школань эйкакштне аволь умок содавтызь Пайгармань Параскево-Вознесенской тейтерь-авань монастыренть.

Масторлангсо иневанькс таркатнеде пек ламо, эрьвась эйстэст содавикс эсензэ историясо, сюпав духовной питнейчисэ. Минь свал бажатано молемс ковгак васов, а содавикс таркав. Лиясто ойменть ванськавтомга, седеенть оймавтомга саты тенек маласо уликс иневанькс таркаськак. Истя, вейке оймсема чистэ Феодор Санаксарской храмонь настоятелесь, протоиереесь отец Георгий вейсэ эйкакштнень марто якасть Пайгармань Параскево-Вознесенской тейтерь-авань монастырев.

Аравтозь шкастонть сынь сыргакшность ки лангов паро ёжосо, храмонь настоятелесь кинь перть ёвтнесь те тарканть историядонзо, ветясь эйкакштнень марто духовной кортнемат. Тосо сынь ульнесть Пазонь литургиясо, конань ветясь отец Георгий, исповедовасть ды причастясть.

Эйкакштнень туртов ютавтозельть экскурсият кода храмонть потмова, истя жо весе территорияванть. Те шкастонть сынь экшелясть иневанькс лисьмапрясонть, сюконясть те монастырень Параскевань лемсэ прявт пазавантень.

Экскурсиядонть мейле эйкакштнень каванизь кашадо, симдизь тикше марто чайде. Од ломантне неизь, кода тосонь эрицятне седейшкава топавтыть монастырьсэ уликс ламо тевтнень. Сынь тосто амольдясть кода духовной, истя исторической содамочить.

Омбоце чистэнть уцяскавсто ды паро ёжосо велявтсть мекев Саранскоев. Те таркась тенст казсь ледстнемат ламо шкас, макссь эйкакштненень духовной сюпавчить ды вийть школасо седе парсте тонавтнемантень.

Анокстызе Валентина Юдина