Важное

МВД-нь кинологонь службанть прявт тевезэ – те общественной сэтьмечинть ванстомась кода республиканть келес, истя жо сонзэ томбале. Сотрудникесь ды кискась – те а явовиця пелькс, лиякс меремс, кинологось свал эсензэ кисканть марто вейсэ топавтыть икелест путозь тевтнень. Полициянь старшей лейтенантонть, разведываниянь, служебной кискатнень кастомань, дрессировкань ды тренировкань отделениянь прявтонть Зифа Альмяшевань туртов Мордовия Республикава Кинологонь службань куншкакуросонть важодемась аволь ансяк профессия, те весе эрямонь тев.

Ледстни, васенце киска левксэнть, восточно-европейской овчарканть, эйкакшпингестэ сонензэ казизе тетязо.

– Мон куватьс тетянь-авань кедьстэ вешинь киска, пурнынь азортомотнень, ансяк кудов сынст саемадост эзть мере. Зярдо монень топодсь 11 ие, тетям кандсь тень казнекс киска левкс. Превсэнзэяк арасель, казсь тень аволь ансяк покш мельспаро, истя жо редизе сы шкань профессиям, – корты Зифа Альмяшева.

Ниле пильгсэ оянть мельга якамось пек вечкевсь тейтерькантень, ды сон сайсь мель совамс Россиянь ДОСААФ-нть юрсо кискань кирдицятнень-трицятнень вейсэндявксонтень, косо кискатнень марто важодеманть истя жо топавтсть кинологтне. Сон сеедьстэ яксесь МВД-нь кинологонь куншкакуронтень, яла ламолгавтсь кискатнень коряс содамочинзэ. Зифань кисказо эрясь 8 иеть, теде мейле сон пек ормалгадсь. Тейтеренть арасельть виензэ лездамс ялгантень, эзть сато содамочитне медицинанть коряс. Секскак эсензэ туртов арсизе, школанть прядомадо мейле моли тонавтнеме аграрной факультетэв. Истя лисськак, Зифа «ветес» прядызе ветеринаронь специальностенть. Практиканть свал ютась кинологонь службань куншкакуросонть. Дипломонть получамодо мейле Зифа Альмяшева сась служамо тей. Васняяк важодсь ветврачокс, мейле – младшей кинологокс-инспекторокс. Течинь должностьсэнть вейсэндинзе весе содамочинзэ – левксыявты, касты киска левкстнэнь, ваны шумбрачист мельга, покш мель яви дрессировкантень, тонавты сынст.

Седейлембе марто авась корты профессиянь тевентень совавтыцядонзо, превс путыцядонзо, неть – Александр Мудров ды Александр Бойков. Неень шкане сынь поладыть вечкевикс тевест, куншкакуросонть важодить инспекторокс. Кискатнень вечкемась, сынст дрессировамо маштомась – неть ёнкстнэ вейсэндить весень, кить тесэ важодить.

Зифа Альмяшева 30 иеть важоди кинологонь куншкакуросонть, видькстась, сон а неи эсензэ эрямонзо кискавтомо. Ней питомниксэнть 48 кискат, ды эрьванть марто мусь «кель-вал».

Весть сонензэ гайневтсь Московсто ялгазо ды пачтясь, фабрикасонть, косо тонась важоди, эри киненьгак а эрявикс киска. Авась, куватьс апак арсе, сыргась Московов. Истя сонзэ ды Тимур цёранзо кармась од ояст – сырнень ретриверэсь.

Кискась эрясь мартост сисем иеть, те шканть перть кармась семиянь пелькскекс. Сонзэ куломадо мейле, Зифань валонзо коряс, кудось чамсь. Зярыя шкань ютазь сынь вастовсть Бакара марто. Те ульнесь Чебоксары ошсо, ков Зифа якась инжекс ялганстэнь. «Мон ансяк варштынь сельмезэнзэ: раужот, налксицят, ды сеске чарькодинь, те монь эйдесь». Киска левксэськак сеске редизе од азоронть, чокшнень перть аштесь кедь лангсонзо. Зифа кортызе ялганзо максомс кисканть сонензэ. Ды эзь маняво, фокстерьерэнть пек вадря профессиональной ёрокчинзэ, сынь кармасть службань коряс напарникекс – вейсэ важодить уголовной тевтнень панжомаст коряс.

 Зифа истя жо теевсь ялгакс Белла немецень овчарканть марто, сеедьстэ сайни эйсэнзэ кудов. Мартонзо вейсэ ванстыть общественной сэтьмечинть, важодить преступлениятнень ды правань коламотнень профилактиканть ды а нолдамонть коряс.

Кинологось истя жо ледстизе Лайма овчарканть, сон уш кулось. 2012 иестэ те кискадонть кармасть содамо республикань келес, сон идесь ломанень эрямо. Зыянов тевесь лиссь «Силовик» гаражонь вейсэндявкссонть, конась ашти Саранскоень Строительной куросонть. Зифа кисканть марто мольсть ушова, ваксозост чийсь сыре ломань ды пачтясь, вейке гаражсонть ацетонь чинеденть лепиясть кавто цёрат.

– Монь гаражось ашти каршост. Неинь, сыре ломанесь красясь гараж  потмонть. Ванан, сон куватьс а лиси, зярыя шкань ютазь гаражонтень совась цёразо. Тонаськак ёмась. Молинь варштамо мезе тосо лиссь. Неинь, каськань кенкшесь панжадо ды тосо (1,5 метрань сэрьсэ) празь кавто ломанть, – ёвтнесь цёрась.

Гаражонтень совамсто Зифа редизе, седе сыре цёрась уш кулось, омбоцесь эштё лекси. Авась истя жо чарькодсь, верев сонензэ ськамонзо сынь а кепедевить, ацетононь чинеськак пек виевель. Гайневтсь мартонзо важодицятненень, тердсь медицинань куроконь лезксэнь служба. Врачтнень самс цератнень кепедизь верев. Од цёрантень Зифа явсь медицинань лезкс. Колмо минутань ютазь тонась сась ёжос. Врачтне мейле толковизь, бути лезксэсь а максоволь шкастонзо, цёрась куловоль… Тетязо уш эзь идеве. Весе те шканть перть Лайма ульнесь азораванзо вакссо.

Эштё вейке ялганть, Каста овчарканть марто, конась важодсь кулявтомо ёмазтнень вешнеманть коряс, сынь идизь куломадо сыре бабанть. Тевесь лиссь Рузаевка ёнксонь Хованщина велесэ 2017 иень сундерьковсто. Авась сыргась шабра велев ды ёмась. Ветявсть вешнемань виев тевтеемат, тердезельть волонтёрт. Ниле чинь перть ванновсть веленть маласо весе таркатне. «Меельце метратнень ванномсто, Каста кармась онгомо ды чийнеме ве таркасо, – корты Зифа. – Мон чиинь малазонзо ды коське сэрей тикшенть потсто неия празь сыре аванть, сон ульнесь ёжосо, ансяк овсе вийтемель, кельмезь ды вачоль. Куроксто ваксозонок састь ломанть, аванть оршавтынек, тердинек медицинань куроконь лезкс ды пачтинек больницяв».

Те тевденть Зифа натой ёвтнесь Россиянь МВД-нь министрантень Владимир Колокольцевнень – Тейтерь-авань раськеютконь чинть каршо сон тердезель Московов, тосо сонензэ ёвтасть лембе поздоровт ды тешкстызь покш казнесэ.

– Неень шкань кодамояк техникась ды аппаратурась а полавтсы кискань судонть. Куш кодамо техникась калады, максы аволь виде куля. Кискатне жо тень коряс пек кемевикст. Служебной кискатнень таликаст преступлениятнень панжомасо покштояк покш. Те ракшанть судозо – лия ёнов а молиця инструмент, конась ломанень судонть коряс реди кементь тёжадо седе ламо эрьва кодат чинеть, – ёвтни Зифа. – Эрьва чистэ зярыя часонь перть кискатнень марто ютавтовить тренировкат, якатано мартост ошонь куротнева, ламо ломанень пурнавома таркатнева, лавкатнева, усксетяно транспортсо – истя ушодтано анокстамо службантень. Те – тевс совавтомань пелькс. Зярдо жо кискантень топоди ие, сестэ ушодови виев дрессировкась.

Сынь теке ломанть, эрьванть эсензэ обуцязо, секскак дрессировканть шкасто тевс нолдан важодемань башка ёнкстнэнь – веенст вечкить налксеме, омбонст тантейстэ ярсамо. Кискатне редить монь ёжом, марить эйсэнь. Видестэ мартост важодемась – те цела искусства. Бути сёвнат кисканть, эряви алкукс кежейгадомс лангозонзо, рангомс, сон чарькодезэ: азоронтень мезесь-бути мельс а тукшны. А уш бути шнамс, сестэ седейшкава, кискась седеяк вадрясто карми важодеме. Паряк, секскак минек службасонть арасть ве ёндонь ломанть.

Анокстызе Татьяна  Аксенова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».