Важное
Марина Владимировна Агафонова важоди Саранскоень 3№ школасо тиринь келень тонавтыцякс. Тедеде сон лиссь изницякс «Эрзянь ды мокшонь келень сехте паро кабинет» республикань пелькстамосонть. Кода лия тонавтыцятнеяк, сон пек ризны кельтнень ветямост ды тонавтомаст кисэ. Тонавтыцянь тевтнеде башка, Марина Агафонова – валморонь виев сёрмадыця. Стихензэ лиснесть зярыя вейсэнь пусмотнесэ. Сон кепси пшти темат, яви мель пейдемань жанрантень, мейсэ пек кецявты ловныцятнень. Теевтяно мартонзо содавиксэкс.

– Марина Владимировна, ёвтнек, косо чачить-касыть?

– Чачинь пек мазый ды ёроков ломаньсэ сюпав Дубёнкабуень Кобале велесэ.
 
 
Тесэ чачсть истят эрзянь содавикс сёрмадыцятне, кода А.Арапов, Л.Седойкин, А.Подгорнова. Ды те рисьмесь а прядови течинь чис, нейгак тесэ улить валморонь сёрмадыцят, конат лаказь лакить поэзиянь тевсэнть. Ютксост – Ю.Демяшкина, В.Аристова ды лият.
Авам ды тетям важодсть «Вперёд» колхозсо, конась 80-це иетнестэ лововсь икелев молицякс. Сонзэ опытэнзэ тонавтнеме сакшность натой омбо масторстояк. Сеть иетнестэ строявсть ламо КРС-нь ды СТФ-нь фермат, эмежень ванстомань кевень покш утомт. Ды мейлеяк, зярдо састь стака 90-це иетне, колхозсо ярмактомо важодемаськак пек лездась тетянь ды авань туртов. Ледстнеса, свал ульнесь ловсонок ды сывеленек, тетям-авам кирдильть скал, ваз, тувот, саразт. Колхозось явиль тикшень ды якстерькаень пай, товзюро, шуж, пинеме.
1994 иень ацамковсто кулось тетям, сонензэ ульнесть ансяк 45 иеть. Кода теде а стака кортамс, ульнесь берянь ёнксозо – вечкилизе симеманть. Вана те обуцясь пачтизеяк калмос од-паро прясо. Аванень се шкасто ульнесть 40 иеть. Седе мейле таргась-усксь эйсэнек ськамонзо, мезень кисэ тензэ покш сюкпря! Минь Миша лелянь марто ки соды кода эрявлинек, бути авам косояк а важодевель, сон ламо роботась.

– Мекс школань прядомадо мейле кочкик тонавтнема таркакс Н.П.Огарёв лемсэ МГУ-нь филологиянь факультетэнть?

– Эрзянь келень тонавтыцям Надежда Викторовна Чугунова школасо тонавтнемстэ уш содась, мон сёрмадан валморот, секскак мерсь тень варчамс молемс тонавтнеме филологиянь факультетэв. Ды эсеньгак арасель мелем молемс ковгак лияв. Видьстэ меремс, а янксян те кочкамонть кис. Истят преподавательтне, кода Д.В.Цыганкин, Н.А.Агафонова, В.П.Цыпкайкина, М.Д.Имайкина, Ю.Г.Антонов, И.Н.Рябов, А.М.Кочеваткин ды лиятнеяк кирвазтсть седеезэнь седеяк покш вечкема тиринь келентень. Тонавтнемань перть эрьва ёндо панжовсь икелень тиринь келенть мазычизэ: горниповокс гайгемазо, валдо леень сэтьмечизэ, луганаронь чевтечизэ ды сэнь менелень ваньксчизэ!

– Зяро иеть важодят школасо? Кодамо классо ветят эрзянь кель?

– Школасо важодян аволь умок, 2015 иестэ саезь. Васня саимизь кода ГПД-нь ветиця (группа продлённого дня). Мейле пурнавсть эрзянь келень зярыя част. Ней ветян 2-6-це класстнэсэ эрзянь кель.

– Сатныть-арасть учебниктне, методической пособиятне, валкстнэ?

– Неень шкане, сюкпря, те весемесь сатны. Школатнесэ муеви эрьва кодамо литература. Интернетэськак парсте лезды.

– Тынк школасо ули эрзянь келень кабинет?

– Тиринь келень кабинет ули, ды натой апокшке музей марто, конась истя жо нолдтневи тевс эрзянь келень уроктнесэ.
 

– Кодат стакачить печтить неень шкане тиринь келень тонавтыцятне? Секе-тев марятано, кода киртить тиринь келень частнэнь…

– Стакачитне неень шкане аштить вана мейсэ. Ве ёндо варштамс, эрятано Мордовия Республикасо, косо эрзянь ды мокшонь кельтне лововить тиринсекс малав пеледензэ ламо эрицятненень. Ацирьгавты седей, зярдо уроксо эйкакшось покш мельспаросо ёвтни, келя, сырькаезэ, покштязо, тетязо ды натой авазояк – эрзянь ломанть, ансяк сонсь эйкакшось сеедьстэ а соды вейкеяк вал эрзякс. Ды чарькодеви, те аволь сонзэ чумось. Истя арсизь тетятне-аватне, конат тиринь келенть ловить а эрявиксэкс, эли, рузкс меремс, неперспективнойкс. Тень таркас весе покш мель явить англань келентень. Васняяк ёвтавлинь, илядо арсе, мон молян англань келень тонавтоманть каршо. Зяро ломанесь соды кельть, зняроксть сон превей ломань. Ансяк тень пингстэ а эряви стувтнемс тиринсентькак. А эряви стувтомс: кить минь ды косто минь. Тонавтыцясь ськамонзо аламо мезе теи. Эйкакшонтень кудосояк малавикс ломантнень марто эряви кортамс эрзянь кельсэ. Невтемга, тонавтыцясь уроксо максы од валт. Ды бути тонавтницясь сынст тонавтнесынзеяк, лезэсь теньсэ аламо. Бути неть валтнэнь а кинь марто ды а косо карми ёвтнемс, шкань ютазь сынь стувтовить. Секскак эряви теемс истя. Кадык минек келесь карми гайгеме эрьва косо: кудосо, ушосо, СМИ-сэ, Интернетсэ! Ве валсо, эряви покш пропаганда, сестэ кияк а мери: тиринь кельтне косояк а марявить ды киненьгак а эрявить. 

Омбоце стакачись ашти вана мейсэ. Школатнева эрьва ие кармасть киртямо эрзянь ды мокшонь келень частнэнь. Те лувось сыргась сестэ, зярдо тонавтомань программатнес кельгстизь омбоце омбо масторонь кельтнень. Чарькодеви, певтеме тетькемс ды эцемс школань программатнень а мереви, секскак те шкане ёртовить, истя меремс, «а эрявикс» предметтнэ.

– Марина Владимировна, варчник-арась эсеть виеть тонавтыцянь кодамояк пелькстамосо?

– Те тундостонть ульнесь пелькстамо: «Лучший кабинет мордовского (эрзянского, мокшанского) языка», косо прям невтия монгак. Тень пингстэ лисинь изницякс васня муниципальной, ошонь пелькстамосонть, мейле саинь васенце тарка республикань теке пелькстамосонтькак. Те монь васенце истямо покш изнявксом. Сехте покш казнекс тень пингстэ ульнесь «Равось – ояксчинь лей» экспедицияв молемась. «Александр Свешников» теплоходось саимизь Нижний Новгород ошсто Макарьевкань авань монастырентень, мейле – Казань, Чебоксары ды Козьмодемьянск оштненень. Истямо питней казнесь а стувтови куватьс, мезень кисэ покш сюкпря МР-нь Культурань, национальной политикань ды архивень тевень министерствантень ды Финнэнь-угрань раськень Равчирень куншкакуронтень!

– Минь содатано, тон умок яват мель шкинемантень, валморонь сёрмадомантень. Кода весемесь ушодовсь? Зяро иесэ кармить сёрмадомо?

– Сёрмадомо карминь кемнилее иесэ. Васенце шкастонть лездасть Кобалень школань тонавтыцятне. Минек школасо свал тейневсть паро мероприятият, сценарийтнень эйзэст арсилинек минсь, Интернет арасель. Сеедьстэ сынст тейнинек валморо марто, конань сёрмалемс савсь эстень. Тень кисэ покш сюкпря воспитательной важодемань коряс завучентень Марина Николаевна Демяшкинанень. Вана неть мероприятиятнес эрявськак арсекшнемс пеедькшнемань валморот. Ломантнень мельс пек тукшность монь строчкатне. Се шкастонть саезь карминьгак явомо мель юморонтень.

Мейле кармасть эйсэнь тердтнеме сёрмадыцянь семинаров. Тосо домка ды пшти валост ёвтылизь истят содавикс сёрмадеенек, кода: А.Арапов, П.Любаев, И.Калинкин, Л.Седойкин, Маризь Кемаль, Н.Ишуткин ды ламо лият.
– Кодамо темас седе пек вечкат сёрмадомо? Мезесь сехте пек талновты?

– Тематне саевить неень шкань, рузкс меремс, злободневнойть, мерьсынек, политикадо, Интернетэнть «вечкемадо», пияницядо, нузяксчиде, велетнень ёмамодо ды лиядо. Улить истя жо лирикань валморот тиринь ёнксто, пертьпелькстэ ды вечкемадо. Седе пек вечкеви сёрмадомс пейдевтиця валморот, ансяк те весе ашти потмоёжонть эйстэ: кодамо ёжось, истят валморотнеяк.

– Чарькодеви, валморотнеде таштавсть ламо. Зярдо миненек, ловныцятненень, учомс тонь книганть лисеманзо?

– Те кевкстемась эсень туртовгак ашти каршо валтомо. Бути видестэ ёвтамс, весемесь ашти ярмаконь арасьчисэнть. Тонавтыцянь пандоматнень марто васов а туят ды прядот верев а кирнявтат. Чарькодеви, эряволь нолдамс куш вейкешка пусмо, ансяк аволь маласо шкастонть…

– Марина Владимировна, ёвтнек мезеяк семият эйстэ. Кода вечктядо ютавтомс юткошканк эли оймсема чинк?

– Мирдем марто эрятано кемголмово иеть. Юрий Александрович важоди «Ватт» фирмасо ванстома тевень прявтонь полавтыцякс. Те иестэнть ули покш кенярксонок: омбоце цёрам тусь васенце классос. Васенцесь – сисемецес. Кавонест тонавтнить парсте. Покш цёрам ламо ловны, вечксынзе география, история, физика предметтнэнь. Парсте чарькоди эрзякс. Кудосо кортнян мартонзо тиринь кельсэ. Кизэнь перть эйкакштне оймсить монь тиринь велесэ – Кобалесэ. Ошсо оймсема читнестэ якатано вирев, парков, эйкакштне якить ошонь сырькаест туртов. Лиясто весе вейсэ ковгак ардтнетяно. Саемга, маныть сёксня якинек Болдинав, мелят кизна – Лермонтовонь Тарханы усадьбав. Сёксень ды телень чопода чокшнетнень ланга якатано ульцяв тиринь ошка якамо. Зярыяксть иезэнзэ якатано театрав. Эрьва чокшне ловнотано ёвтнемат ды ёвкст. Вишкинесь пек вечксы «Чилисема» журналонть. Тосто ловновты ёвтнемат ды ёвкст. Кизна вечктяно ютавтомо чокшнетнень ульцясо. Лиясто рестатано сывель, кал. Тиринь велесэ шкань ютавтомась мелезэнек тукшны сехте пек!

– Сюкпря седейшкавань кортамонть кисэ!

Татьяна МАТОРКИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».