Понедельник, октября 18, 2021
Важное

Саранскойсэ ушодовсь «Мордовия многонациональная» проектэнть лувсо «Вейсэ-марса» этнокультурань марафонось. Сонзэ ютавтыть «Россиянь раськетнень Ассамблея» вейсэндявксонь минек ёнксонь отделениясь, Республикань Раськень творчествань кудось ды МР-нь Культурань, национальной политикань ды архивень тевень министерствась. Кенярксчись панжовсь Республикань Культурань кудонть икеле.



– Ушодовсь лия ёнов а молиця ды мельстуиця проектэсь. Колмо ковонь перть эрьва субутасто тесэ кармить гайгеме республикасо эриця минек раськетнень моротне. Национальной культурась – те раськень ойме. Ванстодо келенк, культуранк, ванстодо сень, мезе минек ули, – кортась МР-нь Культурань, национальной политикань ды архивень тевень министрань тевтнень топавтыцясь С.Н. Баулина.

Культурань марафонсонть эсь мазычист ды ёрокчист невтьсызь ошонь ды весе районтнэнь артисттнэ, профессиональной ды самодеятельной коллективтне. Сынь казить аволь ансяк морот ды киштемат, истя жо невтить койть-кирдат.
– Минек республикасо эрить 119 раськеть. Эрьванть эсь культуразо, коензэ. Парсте невтеви декоративно-прикладной творчествась, кедьчелькев ломантнень теевксэст. Весе карми ютамо ушосо. Мереви самс ваномо весенень. Программась сюпав ды мельстуиця, арсян, вечкеви весе ваныцятненень. Сехте паро номертнэ кочкавить «Шумбрат» кенярксчинтень. Кемтяно, муевить од тештинеть, – ёвтнесь Равчирень финнэнь-угрань раськетнень культурань центрань прявтось Е.Н. Ломшина.

Панжомань чистэнть тесэ морасть: Г.И. Сураев-Королёв лемсэ «Келу» фольклорной ансамблясь, морамонь ды киштемань «Умарина» коллективесь – минек республикань визитной карточкатне, Россиянь заслуженной артисткась, Мордовиянь народной артисткась Нина Маркова, Мордовиянь филармониянь артисттнэ.
Омбоце чистэнть РДК-нть вакссо концерт невтсть Дубёнкань ды Ельникень районтнэ.

– Покш мельсэ сынек «Вейсэ-марса» кенярксчинтень. Ускинек содавикс морыцянок. Те – Поводелень «Эри ведь», Кочкурвелень «Эрзянь ава», Дубёнкань «Морамо» ансамблятне, Ломаты велестэ «Чишмя» татаронь дуэтэсь. Састь ськамост морыцятне Елена Кичкина, Елена Сухинина, Иван Бояркин ды ламо лият, – кортась Дубёнкань райононь Культурань кудонь художественной руководителесь О.В. Василькина. Тиринь райононзо кисэ морамо сакшнось Александр Дёмкингак.

Ольга Викторовна 2008 иестэ саезь морси «Морамо» народной ансамблясо (ветицяст А.К. Старцева). Чачсь Поводелесэ, школань прядомадо мейле тонавтнесь М.Е. Евсевьев лемсэ МГПИ-сэ. Эйкакшпингстэ саезь свал морси: ськамонзо, хорсо, ансамблясо. Ульнесь концертэнь ветицякс. Ней уш зярыя иень перть «Морамо» ансамблясо. Тосо сисем ломанть. Сеедьстэ ардтнить морамо Ульяновской областев. Сехте вечкевикс ды учовикс фестивалест – «Шумбрат, Мордовиясь». Сонензэ анокстыть малав иень перть. Репертуарсост эрзянь ды рузонь морот.

Декоративно-прикладной творчествань выставкасонть невтевсть «Терракота» гончаронь студиянь ветицянть А.Х. Хамидулинэнь ды лия кедьчелькевтнень А.И. Руськинань, Т.Н. Конаковань, И.Н. Конаковань, И.Ю. Карасёвань, Г.Н. Симбирцевань теевксэст. Картинат, някат, сёвонень кедьгеть, сапонть, шальть, налкшкеть, тейтернетнень туртов мазый заколкат-бантикть... Мезе парось, весементь меревсь рамамс.
«Вейсэ-марса» культурань марафонось поладови седе тов. Субутасто, июнень 12-це чистэ, тесэ кармить Орданьбуень, Ковылкинань ды Темниковань районтнэ. Ушодксось 14:00 чассто. Моледе ваномо!

Татьяна Маторкина
Фототне Эдуард Ретунскоень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».